日期：08年4月7日
地點：美孚
因事要到美孚，發現已經多年沒到過這裏了。算起來，美孚已有四十年歷史，是香港最早期的大型屋苑，以前好威架！而且交通實在超方便，坐地鐵去旺角只需15分鐘，難怪仲咁多人鍾意住。
當然，如今覺得有點殘舊了，好多裝飾仲係千百年不變，以前叫做靚，而家就有啲落伍嘞。好似萬事達廣場個噴水池仲喺度，隔籬商場條旋轉樓梯亦保留，不過水池條橋整得型咗，地鐵站亦靚仔咗，而大堂亦冇以前咁舊，聽講連電梯都整過，以四十年樓齡嚟講，算唔錯嘞！
萬事達廣場好似冇乜變樣，仍然有噴水池，不過條橋就由中式（仲有紅色欄）改成銀色Look。
呢個菜市場，而家已經荒廢，以前附近仲有檔報紙檔，今次去都唔見咗囉。
美孚大部分單位都有露台，仲種滿植物添。
呢條旋轉樓梯，四十年不變，夠晒經典！
呢種燈，好70年代呀！
難忘回憶
我最記得美孚有幾件事，第一，附近就是荔園，以前有得去荔園，真係興奮到暈架！第二，美孚與荔園之間的海灣，以前是海灘，後來填平來起公園、圖書館及足球場，我都喺度踢過幾次波；填海之後，我們仍會到泳棚游水，一落水就係深海，都幾驚架！泳棚仲有得剪髮，好似收得幾平添！
仲有，我記得美孚入面有好多乜廣場物廣場，好多噴水池，周圍又種咗唔少植物，環境都唔錯架。我試過中秋節夜晚喺度行，好多一家大細都嚟賞月，好熱鬧好開心。
此外，以前天橋底有個幾大既遊樂場，仲有沙池，當年被讚善用空間，後來又話大塵，對細路健康唔好，所以拆咗。
後來連對出海面都填埋海了，出現了一大片草地，在香港簡直難得一見。不過到咗2000年11月，草地又變成嶺南公園，採用嶺南建築風格，都幾靚架！我最記得嗰條超長石春路，行到好痛呀！
當年在萬事達廣場留影，細個既我型到吖。（攝於80年代初）
當年在此過中秋節，還特登自製火箭燈籠，震驚全場。（攝於80年代初）
美孚的外貌，五十年不變。（攝於90年代初）
94年到過公園一遊。（攝於94年5月）
當日這個涼亭，不知拆了沒有？（攝於94年5月）
香港好難見到一大片草地，這裏以前也是海，後來因起西鐵而填平，草地後嚟因為起嶺南公園，所以又消失咗。（攝於1997年）
後來這裏起了嶺南公園，都整得幾靚，不過我諗後面的單位寧願冇填過海。（攝於2000年）
嶺南公園分10個景區，建築物圍繞水池而建。呃！唔好問我點解咁鍾意唔望鏡頭。（攝於2000年）
公園種咗6,000棵樹，處處綠草如茵，坐上草地上，真係好舒服呀。（攝於2000年）
這裏還有個古井及石碑。（攝於2000年）
精細的窗花雕刻，真係好靚。（攝於2004年2月）
久不久喺度行下都幾舒服架。（攝於2004年2月）
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
