日期：2007年10月13日
N年前去過倫敦的大英博物館，展品之豐富，只可以用誇張來形容，我走馬看花，也看了大半天。
最近香港藝術館舉辦大英博物館藏珍展，我便決定去逛逛。入場費30元，都唔算好貴，入場都幾嚴，水樽唔畀帶，雨傘又要收埋，唔通驚我無啦啦發癲開遮整爛晒啲展品？不過聽聞最近有人在巴黎破壞咗幅印象派名畫，小心啲都啱既。
展覽分兩個廳，慢慢逛的話，大概要逛兩小時。分成多個類別，一個展廳展出了古代東亞、美洲、非洲、大洋洲及伊斯蘭世界的展品，都算豐富，入口有個日本的木雕的佛像頭，不過我最鍾意的，還是尼日利亞的銅雕，啲雕像好卡通好得意架！
另一邊則以西方世界為主，中間先擺放了古羅馬時期酒神的雕像，雕功真的好精細，還有羅馬皇帝哈德良及他的同志愛人的頭像。然後由美索不達米亞開始，到古埃及、古希臘、古羅馬、中世紀歐洲、近代歐洲，最特別的展品，當然是古埃及的木乃伊及其棺木，此外又有達文西、拉斐爾、林布蘭的作品，但並非他們最著的作品。
雖然是星期日，好彩都唔算好多人，至少不用像睇「清明上河圖」咁，畀人催生晒吖！這天先看了草間彌生，再睇埋咁多文物，感覺好充實。
展覽唔畀影相，大家想睇就自己入場睇啦。
門票上的是木乃伊的棺木蓋，據說此棺木蓋會帶來不幸，因此被稱為「不幸的木乃伊」，大家看看，那面孔是否有點似泳兒？
入場還派發這紀念品，圖案是酒神的雕像。
大會派發的場刊，印上了多件展品，回家還可以慢慢欣賞，若嫌不夠，還可以買本紀念畫冊，不過要成300蚊，我就唔制嘞。
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
