日期：2010年5月26日
地點：Le Peranakan Hotel、East Coast Road
5點幾就來到新加坡，過關超快，新加坡人效率值得一讚。
新加坡樟宜機場外貌有點像香港機場，好新好靚好光猛，最值得一讚的就是有地鐵（不是機鐵啊）接駁，非常方便。我們酒店在東海岸（East Coast），坐地鐵前往，雖然要轉一次車，但半個鐘就到，每位只需SG$1。
關於新加坡地鐵，還有很多事可以講，不過最特別的，就是其車票，這種車票像八達通般在閘口「嘟」一「嘟」就得，但出閘後那門票點處理呢？我們正奇怪，發現要到售票機退票，我們開頭又唔多識用，花了不少時間，認真古怪！
出了地鐵，就要步行往下榻的酒店Le Peranakan Hotel，為了慳錢，所以揀了套票之中最便宜的那間，註明沒有星，號稱「Boutique Hotel」，橫掂都係夜晚瞓覺啫，無所謂啦！不過當日去旅行社畀錢時，那位票務員不講酒店名，卻說「你揀咗最平嗰間酒店」呀！唓！好失禮你咩！
看地圖，由地鐵站前往酒店好像不算遠，就行下啦，行行下，發覺唔對路，就問街邊的檔口，檔主說：「好遠架！你坐巴士啦！」於是坐巴士前往，盛惠SG$1，不久巴士便來到，上車後再過兩三個站就到East Coast Road，若果步行，相信要20分鐘左右。來到以後，再行一會，終於來到酒店。
之前上網已睇過酒店外貌，由舊式平房改建，親身來到，也覺幾型仔。不過一入所謂Lobby，就嚇一跳，因為細到連梳化都擺唔落，接待員帶我們上房，一入去，嘩！細到吖，一張大床已佔了全房大半空間，連擺喼都幾乎無位，電視要放在牆的一角（而且收得清既台都無幾個），連張櫈都擺唔到，雖然有衣櫃，但竟然無衣架，我啲衫點掛呀？
不過房間還算乾淨，洗手間反而幾大，在企缸上仲有個大大的天窗，感覺不錯，後來我們還發現，在天窗下晾衫，唔使一日就乾晒，正！
酒店由舊式平房改建，外貌就真係幾型！
其實整條East Coast Road都是這類房屋！
房間真係超細，電視要掛在牆角。
旅行袋同喼要放在枱底，好彩我哋唔係好多嘢！
反而浴室就好大，仲有個天窗，不過也是全間房唯一的窗戶。
安頓好，先到附近逛逛，我們沿著East Coast Road向西走，大約十分鐘後，兩旁的食肆商店漸漸多起來，應是這一帶旺的區域，這裏有便利店、生果檔，還有很多食肆，我們見到有文東記，但這天舟車勞動，又攰又熱，胃口一般。便決定到五星雞飯，吃的卻不是雞飯，而是食福建麵，連侍應都有點奇怪！
食飽飽，我們在街上逛了一會，發現一間很大的便利店，裏面不但有各式飲品食物，連生果都有得賣，真方便！當然，我們又是例牌買了不少零食回去，可惜房間太細，又不想躺在床上吃零食，有點不方便！好彩住兩晚就搬房，就忍多兩日啦！
我們在五星沒有吃雞飯，點了福建麵（SG$4.5），濕濕的，雖然開胃，但不是我喜歡的，反而家鄉嫩豆腐（SG$6）幾好味，至於魚圓湯（SG$3）就真係無乜特別。
食完以後實在太熱太口喝，又點了冰冰，我們分別點了什果椰果冰（SG$3.5）及花生紅豆冰（SG$3），爽晒！
我們發現這間便利店，大如小型超市！
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
