第15屆世界盃
年份：1994年6月17日至7月17日
地點：美國
名次
1.巴西
2.意大利
3.瑞典
4.保加利亞
‧主辦國
世界盃終於來到一向忽視足球的美國了，起初還以為美國會成為歷史上第一支初賽出局的主辦國，但最終還是成功躋身十六強（多謝艾斯高巴的烏龍球）。
不過為了遷就歐洲的時間，不少球賽安排在正午舉行，美國南部夏天熱得恐怖，難怪不少歐洲球隊都發揮不出水準，即使南歐的意大利，踢到決賽加時已經腳軟，反而中東球隊沙地卻如有神助，其實正是拜氣溫所賜。
‧賽制
這屆賽制沿用上屆，每組首兩名出線加最好成績的四支第3名躋身16強，然後再採淘汰制。不過新增了黃金入球，即是加時那隊射入便即時勝出，初時以為會鼓勵大家進攻，但後來發現雙方在加時都不敢進攻，寧願迫和踢十二碼，幾年之後，黃金入球便被廢除了。
‧主題曲
這屆大會主題曲是《Gloryland》，典型體育盛事那種主題曲，懶係Grand，唱到好似美國教會啲聖詩咁，不但唔鍾意，其實一早就無晒印象。無綫主題曲應該是黎明的《獻出激情》，有啲悶，反而則炒上屆亞視條橋，挖來志偉同林敏聰唱《搞事世界盃》，加埋林尚義featuring，都幾過癮，歌詞夠啜核：「從前我愛西德隊，魄力冇問題 ！永遠冇話失咗聯繫 ，射波好似禁制，走位走到鬼咁齊 ，冇幾何發軟蹄 ……現在我愛巴西隊，腳法秀麗，永遠係好少越位，射親波冇浪費，
搓波好似搓老泥，更應該冇問題 ……」
至於亞視，我諗好少人會好似我咁記得叫《熱燙的宇宙》，主唱者是田蕊妮，當年只得十幾歲的她，可是未來偶像爭霸戰冠軍呢。
‧吉祥物
這屆的吉祥物叫Striker，我都好似曾經有一隻，不過個樣傻傻的，有啲似Scooby-Doo，唔鍾意。
‧世界盃形勢
鳴鳴鳴……多得泰萊，自我睇世界盃以嚟，唯一一次沒有英格蘭份！真係喊都無謂！
不過法國同日本仲慘，都係最後一戰臨完場失波，無緣決賽周，特別係法國，只要主場最後兩戰攞1分就得，但竟然兩場全輸，我同事仲因為太老定，報錯咗法國入圍添！瘀爆！
上屆冠軍西德不見了，改成德國後，實力不升反跌；亞軍阿根廷有巴迪斯圖達，馬勒當拿在賽事中更老「馬」有火，點知原來係食藥；意國前面靠巴治奧，後面靠巴里斯，真係踢死人；數嚟數去，巴西奪冠都好合理，至少有「夢幻組合」羅馬里奧加白必圖，可惜教練係都唔肯落朗拿度，睇唔到三位天才並肩攻堅係點既樣。
‧傳播媒介
經過上屆慘痛一役後，無記痛定思痛，部署帝國反擊戰。這屆無記同亞記身份調轉，挖來林尚義，加埋原來的蔡育瑜、鍾志光之類，陳譚新與郭家明在提供專業意見。又「抄考」亞記成功經驗，無記完全將94年美國世界盃視包裝成綜藝節目，李克勤奠定世界盃主持地位；有一眾明星靚女撐場，總之就熱熱鬧鬧，「阿倫」、「阿叻」和「志偉」這個福祿壽三星有急才又有幽默感，阿叔又成日話要打電話比福士，當正當時的德國隊教練係佢老友，亦令賽事充滿娛樂性。
反觀亞記就玩反璞歸真，強調專業，評述除咗尹佬之外，有陳炳安、陳燿武、徐國安、譚兆偉、仇志強，睇牌面都輸晒啦！亞記又懶係勁，喺直播之前高價搵許冠文做《許冠文陪你等睇波》，老實講，許冠文都Out晒啦！佢嗰種幾十年不變的演繹方法愈嚟愈唔吸引，當然又係失敗。據悉兩台收視係9:1之比，我雖然喺亞記工作，都不得不承認輸到貼地。
亞視最威既，其實係賽前既宣傳片，一個師奶球迷打小人廣告叫人拍案叫絕，仲擺埋當年廣告大獎！總算威過下！
‧個人經歷
不過我就真係幾爽，因為負責英文台，班英文評述開波前自己會搵外電資料，我都無乜嘢做，即係有人畀錢我睇波咁滯！所以我場場睇晒，雖然要捱夜，但好在公司準備咗大量零食（公司仲會請個臨時工專責買零食），我就不斷食吓睇吓，仲有，直播畫面後面通常會見到幕後工作既地方，我又貪得意喺後面「邑邑揚」，而家諗起都覺得好笑。
其實這屆真的好開心，唔使做有波睇，雖然收視好差，但臨完結時都有啲唔捨得。
仲捉住評述陳炳安、仇志強等人合照。
‧難忘一刻
--馬勒當拿已不復當年勇，但初賽仍然好Fit，記得一場射入一球後，仲仆埋鏡頭發晒癲咁，後來發現佢食藥，難怪難怪！
--要數今屆最黑仔的球員，就是哥倫比亞的艾斯高巴，他在對美國之戰擺烏龍，亦令熱門之一哥國初賽出局，跟住回國仲畀人殺埋。
--公司有位頗情緒化既同事，經常發老脾，記得佢捧既荷蘭隊被淘汰之後（輸畀巴西），陳燿武仲走去撩佢，我哋真係好驚佢突煞發癲！又有一次，英文台主持譚拔士唔知講咗乜，佢又突然狂鬧譚，又猛用中文話佢「扮球星」之類，譚都唔知乜事，真係幾好笑！
--決賽由意大利對巴西，我們齊齊返廠，大家都好High，記得一位同事係少數捧意大利的，仲無啦啦帶咗支意大利旗返嚟，跟住英文台有位意國人做嘉賓，見到有人揮動自己的國旗，都不知幾開心。其實決賽唔多好睇，最慘一個入波都冇。 ‧難忘人物
--俄羅斯前鋒沙連高射入六球，好似好勁咁，其實要多謝今屆勁跌Watt的喀麥隆，他在對喀之戰射入五球，破晒紀錄，睇嚟都幾難破！
--巴治奧是今屆的悲劇英雄，在對尼日利亞之戰射入關鍵入球，以一人之力救了意大利；其後兩仗也為意國立下戰功，但來到決賽，雖沒入波，但也可見他極努力，但加時之時已可見他腳軟（大佬！美國幾熱喎！），最後射十二碼，又係嗰句，專蝦球星！
--今屆開始多咗一啲特別手勢，我最記得白必圖既湊仔姿勢、K安達臣學自美式足球既手勢都好鬼型！
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
