日期：08年5月19日
地點：香港→紐瓦克→紐約
說是逍遙遊，但出發前一點也不逍遙，剛剛相反，無論公事私事都挺忙碌，當然啦！放咁多日假喎，要做定所有嘢，跟好手尾先飛得，真係煩到死！
好了，終於到起飛當天了，即時覺得無憂無慮，那種心情實在久違了。
我們乘坐美國大陸航空，因為價錢較平宜的大韓和日航都Full晒，國泰又太貴，就選搭大陸航空，直航15小時（已經是最快了），而座位又不算寬敞，好彩今次我預早定咗路口位同中間位，先冇咁辛苦（坐喺中間的史提芬未必咁諗）。
美國大陸航空既飛機餐認真麻麻，不過勝在多戲睇，足足有三百幾部，仲可以自行Pause、Rewind同Fast Forward，不過大部分電影冇中文字幕，我求其睇咗部《魔盜王》同《天生一對》，睇多陣報紙雜誌就瞓嘞！老實講，就梗係瞓得唔好。
捱咗十幾個鐘，終於到嘞！先要入境，我仲算OK，不過史提芬就畀入境官員寸咗幾句，有啲唔開心，其實呢啲情況預咗架啦！攞完行李過埋海關，終於來到美國了。
紐瓦克機場位於新澤西，四周其實好荒蕪。
不過我們並非抵達紐約，而是新澤西州的紐瓦克機場，雖然好近紐約曼哈頓，但就要轉車。我們先搭Sky Train（即係無人駕駛列車）去火車站，不過機場的指示認真麻麻，我們也找了一會才找到。然後便乘坐前往紐約Penn Station的火車，大約1小時後，終於到達紐約曼哈頓的Penn Station！仲未到呀！因為J的家並非位於曼哈頓，於是又要轉乘地鐵，我們拿著幾件大行李，架地鐵又多人，真的累壞了。
最慘中間仲要轉一次地鐵，大家都知，紐約地鐵出名複雜，部分地鐵站有幾個名，我只記得轉車站其中一個名，但地鐵站的標誌牌卻顯示另一個，搞到我以為未到，卒之Miss咗，又要去另一個月台搭番轉頭，但月台之間要行樓梯，我又要抬住大大件行李走呀走，到達J家，成身散晒，那時已是下午5點，即是香港凌晨5點（兩地時差剛好12小時），不一會便撻落床瞓著，後來起身食晚飯都冇乜胃口。
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
