日期：08年5月22日
地點：紐約（自然博物館）
乜嘢係Dum Dum？咪係《翻生侏羅館》入面識講嘢嗰個巨型石像囉，《翻生侏羅館》的故事背景就是美國自然科學博物館（但實際沒有在此取景）。
現實中的博物館，不會見到展品周圍走，但館方把各種標本配上像真度極高的背景，又確實栩栩如生，似足會行會走。仲有，片中見到追住主角的恐龍骨，現實中就放在大堂，還有三間恐龍展廳，展示這種巨獸的歷史、種類及生活習性等。
我們最想找到的，始終是可愛的Dum Dum（其即是復活節島的巨像），由於博物館超大，起初找不到，左找右找，才發現Dum Dum就藏在太平洋原住民展區的盡頭，還要穿過其他展區，實在不明館方點解要將呢位「明星」收得咁埋，不過唯一好處就是遊人少，唔使同人爭位影相。最記得拍照之時，幾名外國遊客見到石像，也是大叫「Dum Dum」，證明此名幾咁深入民心。
不過逛咗好耐，我們都找不到老羅斯福總統、匈牙利王阿提拉及印第安女子的雕像，應該是電影虛構的。
講咗咁耐，唔好以為我們參觀此館只為《翻生侏羅館》，其實博物館好大，展出世界各地動物標本，真係好值得慢慢睇，可惜當日時間有限，我們逛了足足兩個鐘，也只能走馬看花而已。
博物館旁的地鐵站，以星空作圖案，好有自然Feel。
自然博物館最近舉行名為「Horses」的展覽，所以館外也擺放了很多馬的雕塑，展覽要另外收費，所以沒參觀。
弊！大堂有恐龍骸骨，我變咗賓史迪拿，畀恐龍追呀！
在恐龍展廳內，又有另一副恐龍骨！
在海洋館可看到一些深海的動物！
動物標本配上像真度極高的背景，猶如走進野外的世界！放心，係標本啫，唔會撲出嚟既。
這些是美洲野兔的標本，成排掛住喺度，好慘呀！
放心！這些不是標本，只是印第安人塑像而已，不過始終找不到片中那印第安女子。
這個就是Dum Dum，其實是復活節島的石像，不過真係好Cute。
館內的植物區，還擺放了一棵巨樹的標本，大到離譜，唔知棵樹本來有幾高呢？
《翻生侏羅館》有講過老羅斯福，館內搵唔到他的雕像，不過搵到好多相片，原來老羅斯福非常支持該館。
自然博物館旁就是Rose Center科學館，設有放映室和太空大爆炸展館，不過我們沒時間看，只到太空磅量量體重，特別是月球那個磅，磅完之後肯定充滿自信。
用這個月球磅量度體重，我只有4.9磅，史提芬更是0磅！
站上這個太陽磅就大鑊，我變成三千幾磅！
呢架係用來探索火星的太空船！
館內仲展出太陽系八大行星模型，最大呢兩個係木星同土星。
臨走仲可以去紀念品店買隻青蛙架。
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
