日期：08年8月17日
地點：鳥巢
快要入場了，不過入場前，幾乎人人都爭住做一件事，就係捉住班打扮得古靈精怪既外國人合照！這方面，中國觀眾似乎較遜色，最多都係身披國旗而已，跟外國人既創意，相差太遠了。
一見全身綠色的，就知是愛爾蘭粉絲。
這兩名芬蘭擁躉，不斷被人邀合照（包括我），幾經艱苦先甩到身。
一眾西班牙支持者，嗰幾位女仔幾靚女喎。
入場又係冇難度，由於田徑比賽玩足成晚，由6點到接近12點，中途又不可離場（否則就入唔返嚟），晚餐要在這裏搞掂，小食店選擇甚少，兼排晒長龍，其中一條隊，睇落少人啲，我哋就排啦，排咗十幾廿分鐘，先發現個Counter用一張殘舊紙皮寫上：「呢條龍只係攞香腸」，要排其他線畀完錢，先過嚟攞嘢食，我自己眼大睇過龍就冇得怨，但最慘只寫中文，賣嘢食位女子又唔識英文（係完全唔識，仲屎過陳克勤），搞到前面位外國人完全唔知乜事，最後一肚氣走咗！呢方面，中國仍有極大改善空間。
買完嘢食，搵番個位先，哈！都唔錯喎，喺第十幾行，距離跑道好近，對正100米條直路，不過我哋接近起跑位置，睇起步就一流，但睇衝線就……Sorry，都係要睇番大電視。
仲有喎，我哋附近都好多空位，又話爆晒既？
入到場，梗係影下聖火啦，不過我真係冇咁老土，扮拎住支聖火呀！
至於睇比賽既感覺嘛！老實講，喺屋企睇電視一定好過，睇100米、100米欄仲好啲，睇擲項、跳項，都無雷公咁遠（特別係跳遠，基本上乜都睇唔到），結果又係睇大電視為主，而且成績顯示又唔係太清楚，有時都唔知邊個領先緊。
玩足成晚，唔係每項賽事都啱睇，好多賽事只係初賽（好似女子100米欄、男子千五米同男子跳高），吸引力有限，男子鏈球同女子跳遠，個人都只係一般，男子一萬米決賽，最後嗰一個圈就幾刺激，但之前嗰24個圈，就真係有啲悶！不過女子三千米障礙賽就確係幾刺激，仲見證埋俄羅斯嬌娃破世界紀錄添！至於全場戲肉，就係女子100米，真係「渣」一聲就完！
可能你會話，你講到唔值得入場咁，又唔係，因為仲有好多嘢睇，例如睇下各國運動員同觀眾既反應，好似牙買加包辦女子100米三甲，班粉絲即刻攞國旗出嚟，選手又會攞住國旗繞場一周，又真係好興奮，而且唔好以為攞咗冠軍既先慶祝，好多亞季軍一樣好開心咁繞場答謝大家支持，其實全世界好似只得中國人，睇金牌睇得咁重既啫！第二第三已經好好既成績啦！
此外，間中仲有前一日比賽既頒獎禮，我哋就睇到女子馬拉松頒獎禮，總算見證中國國旗喺鳥巢升起（呢個場面其實好少見架），又見到男子100米頒獎禮，第一次聽到牙買加國歌。全場起立，一齊聽國歌，一齊睇升旗，感覺好特別。仲有喎！大會好有心，知道邊位運動員生日或就快生日，佢比賽完之後就播放生日歌，都幾溫馨架。
我哋個位，距離100米直路都幾近架！
跨欄比賽完畢，大會義工用車仔收欄，一架車負責兩條賽道，幾分鐘就收晒，勁！
呢位就係奪得女子馬拉松既周春秀，我用數碼Zoom拍攝，所以質素好差！
今屆賽事，五星旗可以喺鳥巢升起，真係五隻手指數得晒，吖！提提大家，女子馬拉松冠軍係羅馬尼亞選手！
100米頒獎禮，中間嗰位保特高過隔離兩位幾多！
比賽完畢，三甲選手就拎住國旗繞場一周！
牙買加包辦女子100米三甲後，班擁躉即刻拎國旗出嚟耀武揚威！
睇完比賽，已經快12點，唔好以為北京好熱，入夜之後，愈睇愈凍，加上唔夠飽，真係幾惡頂。
好彩，由鳥巢鬆人出奇地快（亦可能係我哋個位接近出口），一陣就走咗，好過喺香港大球場散水多多聲，呢個時候，鳥巢、水立方同電視大樓都著晒燈，超靚！
不過鳥巢一帶冇停車場，我哋要先搭地鐵去北土城站（架地鐵仲鬼咁迫人），再搭旅遊巴返酒店，返到去，已經點幾兩點囉！
晚上既鳥巢，靚過日頭多多聲！
水立方著咗燈，簡直就好似一粒寶石！
奧林匹克公園中央既電視大樓，仲識得變色添！
遇到一班打扮型仔既荷蘭擁躉，佢哋好大擔兼貪玩（典型荷蘭人性格），竟敢扮攻擊大會保安！班公安冇理佢，不過換轉係我咁玩法，應該即刻畀人「塔」返警局。
奧林匹克公園站既月台，天花一舊舊，唔係太鍾意。
北土城站就靚得多，以青瓷做裝飾，好有中國特色。
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
