日期：92年8月
地點：華山
難忘景和事：
坐火車捱通宵－－上回說到，我們被「老點」，被逼坐硬座南下，車程要大半天，還要在車上過夜，雖然我們有位坐，但坐在硬梆梆的椅子上，也不容易睡得著，何況還要睇實行李，好不容易睡了一會，一停站又要小心。
車內的情況也甚恐怖，走廊上、椅子下，幾乎看得到的空位都有人，這些人也不理甚麼，有位就瞓，所以我經常話，中國人真係好捱得！試過一位同伴去廁所，去咗成個鐘先返嚟，原來他找不到任何位可以行，你話多人成點？
捱下捱下，到了翌日早晨，來到華山站，就是我們目的地。
一來到華山站，即刻成個西瓜解下渴先。
殺上華山－－來華山市，就是為了上華山，同行一位女子，有卑高症，不想上山，但我們千辛萬苦來到，又不想放棄上山。於是只得兩個選擇，一，她留在山下，我們上山，二，鼓起勇氣跟我們上山。畀你會點揀？她就選擇跟我們上山，咁又係，上山至多嚇親，一個人留在山下，有乜事就叫天不應。
「自古華山一條路」，上華山，好簡單，就是不斷地上樓梯上山路，這些山路，不是香港柏架山那些山路，而是接近垂直，不時要手腳並用，或捉實鐵鏈，或扶住梯邊，莫講話「論劍」，想走快步都唔容易。
我們不斷行呀行，大概行了大半天，到了傍晚，總算來到山上，我都好佩服自己，前一晚幾乎冇瞓過，仲可以行成日，換成而家，應該暈低咗。晚上就住在這裏，山上住宿認真麻麻，冇空調，冇得沖涼，不過捱咗成晚，呢晚都算好瞓。
山上有甚麼景點，已經完全忘記了，只記得初段尚算平坦。
跟住愈行愈「金」，盡是這些接近垂直的階梯，好彩旁邊有鐵鏈就扶手。
幾經艱苦來到山上，坐在崖邊，清風送爽，又實在好舒服。
冒死行棧道－－翌日就在山上逛，華山不算大，不過都有多條路線可供選擇，部分路線更是棧道，即是在峭壁之加些木板、鐵鏈之類，造成一條人工的道路，路下面往往就是懸崖，我們怕死，盡量避開棧道，不過來到華山，不行棧道又好像有點浪費，於是間中也冒死站上棧道拍照，假如那些木板然爛了，咁就Bye Bye……
咪睇我好輕鬆咁，其實向後走一步就係懸崖。
山上不少地方都有欄河，以保障遊客安全。
點解我上山都要戴黑起既？
咪睇我好輕鬆咁，下面係見唔到底，假如塊板一爛，除非輕功絕世，否則必定粉身碎骨，而家我一定唔搏。
上到華山點可以唔論劍，我呢招係乜呢？唔通就係傳說中的降龍十八掌？
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
