日期:08年8月17日
地點:前門、王府井
今日為咗工作,又係一早仆起身,又係做咗成朝!
跟住就去咗前門,呢度啱啱重建過,懶係回復返上世紀二、三十年代既繁華景象咁,不過其實大部分店舖都未開,就算開咗,都係食肆為主,而且間間都大排長龍,其中一間仲有員工企喺門口,大嗌午餐已售罄,大家唔好再排隊,呢度係步行街,但或者係星期日既係,人潮之洶湧,只可以用恐怖嚟形容,中國實在太多人嘞!
知道喺呢一帶唔搵到食,我哋決定搭的士去王府井,走去小食街醫下肚先,跟住去奧運紀念品店行吓,當然,又係人頭湧湧!
去前門時,經過胡同,家家戶戶掛起五星旗,好有氣氛,可惜呢啲胡同已經賣少見少!
我後面就係前門既牌坊,你睇下面幾多人!
前門將會重開電車,不過要等奧運之後,而家只係擺喺度畀人影相比!
前門太多人,跟住走咗去王府井小食街,都唔少人,不過好彩都搵到位!
首先梗係整番條烤羊肉串先啦!
王府井大街有間好巨型既紀念品店。
不過都係人山人海,好似唔使錢咁!
跟住走去書城,順便買咗隻開幕禮DVD,50蚊,買嚟做紀念都好!
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================