日期：92年8月
地點：內蒙古
難忘景和事：
大片草原勁興奮－－我們離開北京，下一站是內蒙古，上次北京坐火車落廣州，坐到癲！今次只是一晚，部分人還成功Upgrade至軟臥，相對來說冇咁辛苦。可惜，當心入面諗住順順利利既時候，上天就總是要告誡大家了，所以接著的火車之旅就「金」囉……不過那是後話。
翌日一早到達車站，一步出呼和浩特車站，就有無數人湧過來，當然是旅行社或旅館的職員啦，我們左揀右揀，終於選定了一家（其實也不知如何選擇，只是撞手神而已），旅行社仲拍晒心口幫我哋班軟臥車票。
車子離開城鎮，過了不知多久，窗外是一大片綠，眼前是一望無際的草原，點綴著數個碧藍的湖泊，實在靚絕，我們實在按捺不住，立刻大叫停車，然後就在草原及湖邊狂拍照。
一大片草原，加上湖泊作及牛羊點綴，心情實在好興奮，不過點解我個樣咁囂既？
住蒙古包蓆地而睡－－不久便來到我們住宿的地方，住的是一個個蒙古包，而且不是今天那些有床有枱的蒙古地，而是真的蓆地而睡，廁所就喺蒙古包外，仲要五個大男人迫埋一齊，老實講就唔多好瞓，不過嗰晚就好瞓瞓喎，點解？一陣先解釋。安頓好後，我們便出外逛逛，騎馬騎駱駝，看看「敖包」。
我背後這間就是蒙古包，外面睇好似好大，其實入面只可以瞓五個人。
蒙古包四周就是一大片草原。
草原經常可見插上綁布條木枝的小石堆，就是「敖包」，是旅客祈求好運之用，要順時針繞石堆三圈，在地上撿三塊小石丟到石堆中，再許願，忘記當年許了甚麼願，反而記得其中一位同伴在拍攝此照片時話：「嘩！我哋啲Pose咁似《舊朋友》MV既？》」
來到內蒙古，例牌要騎下駱駝影張威水相。隻駱駝大概畀人騎慣，都冇乜反應。
蒙古馬果然係矮細啲，加上有人拉住，零危險，悶到瞓著，反而同伴想試下策騎，馬伕即時放手，只見那馬一支箭標出去，快到吖！
敬酒唔飲畀人鬧－－到了晚上，是晚飯的時候了，當然有烤全羊，食食下，當地人一邊唱歌一邊捧著酒瓶酒碗過來，原來是敬酒，人人有份冇走雞，這些酒，當然不是啤酒或Choya梅酒，而是濃度極高的米酒，見前面幾個男子，一喝即刻上腦，唔飲又唔係，點扮呢？開始有幾位女子決定「扮飲」，即是把酒杯拿到嘴邊，然後快速地倒到地下，我也有樣學樣，飲了半碗，倒了小半，也覺好啃！
大概眾人掩飾手法極差，幾達盲都睇到之地步，終於有當地人忍不住說了一句我到今天都記得的話：「浪費就是罪！」我知！浪費梗係唔好，但我真係唔飲得吖嘛，你想我哋點？飯後不久，酒氣攻心，那一夜，氣溫很低，但我們並不覺冷，還在草原上失控地高歌，當然，晚上亦仲好好瞓啦。
大家咪以為我見有酒飲就笑，其實係強顏歡笑加苦笑咋！
被逼坐硬座－－翌日坐車回呼和浩特，旅行社當初講明可以幫我們購買往華山的軟臥車票，結果，當然是諸多藉口，總之就係冇軟臥，只得硬座，去華山要整整一晚，呢次慘咯……
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
