第一次遊北京，真係好開心，好多難忘事，不過最難忘既，始終係回程既經歷。
由於慳錢既關係，我哋選擇坐火車，坐的是硬臥（邊捨得買軟臥呀！），每一排有三層碌架床，我算醒，霸咗個上層位，雖然上落唔方便（好似有樓梯，但我通常一撐就跳上去，身手幾好！），勝在自成一國，我就將背囊擺喺枕頭位，咁就唔怕小偷啦。最衰就係最低一層，個個都坐喺度，好唔方便。每排與每排之間，有張枱仔，旁邊既走廊位，就有幾張伸縮椅。
全程車總共要四十幾個鐘，即係兩日，途中雖然會停車，但我哋普通話唔掂，唔敢落車，全程屈喺車度。只記得半夜停站，啲小販就會隔住窗口賣嘢，好鬼墟冚，嘈到我瞓唔著。
車上既廁所，自然秉承中國傳統，所以解決就係最慘情既事（特別係開大），可免則免！當然更唔使指望有得刷牙洗臉啦（好似全程都冇刷過牙），我見有啲人喺停站既時候即刻落車刷牙。
飲水都唔見得好好，因為架車只供應熱水，仲係熱到滾嗰隻，我哋啲膠水樽唔用得，好彩有人帶埋鐵水壼，我哋就將熱水倒入水壼，再慢慢等佢凍番啲，不過六條大漢分一個水壼既水，一陣就飲完啦，所以我哋將水壼吊出車窗外，希望涼風可以令啲水快啲涼。
車上啲飯盒都好難頂，最弊唔見有垃圾桶，食完之後，就咁掉出窗外，有個鬼佬遊客問啲垃圾掉去邊，我個Friend教佢掉出去，個鬼佬就喃喃自語話：「原來這就是中國文化。」
車上乜娛樂都冇，有啲人就喺度玩啤牌，最記得有幾個唔識英文既大陸人，竟然可以教唔識中文既鬼佬玩「鋤大D」，真係中西溝通既最佳典範！不過我就乜都冇玩，有時扮型望下窗外，更多時間就瞓喺床上吽下吽下，幾乎想跳車咁滯！捱呀捱！幾經艱苦終於捱到廣州。
網上照片
來源：www.hkrs.org.hk/photogallery/
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
