難忘的景和事：
天安門廣場旗海飄揚－－第一日上晝先去搵酒店，搵完之後就去天安門廣場，仲畀我哋遇到紅旗飄揚，好壯觀，可惜第一日就撞正落雨，有啲冇癮！
長城買證書－－我哋Join咗Local Tour去長城，架旅遊巴仲坐滿人，好鬼逼！上到去當然不斷影相，仲買咗張「登上長城證書」添，我哋笑稱係「好漢證書」。
遊故宮講錯嘢－－心情真係好激盪！特別係穿過太和門，望到前面一片廣闊既空地上，屹立著太和殿，真係好宏偉！不過，我哋係言談間講到慈禧太后，我話佢後生時候好靚架，跟住仲好沙膽咁話：「江青後生既時候都好靚啫。」旁邊有個陌生人即刻插口話：「呢啲嘢你都夠膽講既？」而家諗番，當年真係冇有識死。
十三陵好心寒－－外面冇乜好影，但入門真係好陰森，最記得經過一道門，入面黑媽媽，乜都睇唔到，心諗：畀人唔小心推咗入去，肯定嚇死！
南京路搵地下街－－當年還不是步行街，有好多舊式店舖，都不是開放式的，即係所有貨品全部喺櫃入面，想摸下？難囉！街上仲有間新華書店添，店舖雖舊，但點都好過而家淨係得連鎖店同大型商場吖。仲有！我哋睇見旅遊書有講地下街（好似以前係防空洞之類），我哋四圍猛搵，又不斷問人，都冇人答到，唔通驚我哋刺探國家「機密」？
頤和園無聊遊－－我對呢個地方真係印象難忘，頭幾日已經去咗成日，到咗最後一日，因為無嘢好做，Join個Local Tour，又去多次，第一次就猛影相，第二次就無無聊聊唔知做乜好。
旅程第一站就係前門，不過第一次旅行兼第一日就落雨，好唔開心。
天安門廣場咁多年都冇乜變啫。
人民英雄紀念碑。
嘩！紅旗飄揚，幾壯觀！
長城呀！不過呢張相重點唔係我或者長城，而係隔離搲緊背脊既女士。
點解我哋會喺長城影啲咁既相架？
除咗「好漢證書」，我仲買咗頂「山東大漢」帽，不過好似唔係好啱我戴。
十三陵水庫，好似冇乜好睇，剩係影張到此一遊。
呢度就係十三陵，重點唔係外貌，而係成十層樓下面既地底。
頤和園既石舫，又落雨，激氣。
天色昏暗欲沉，搞到影出嚟既相都好差。
呢度我諗係後海一帶，我哋仲買埋晒啲刀刀劍劍，拎住周圍走，好無聊。
唔記得邊度有花燈會，於是又無無聊聊去睇下。
太和殿呀！我個甫士幾勁！
天壇而家大修緊，唔知整好未呢？
呢度就係雍和宮，之後再去北京都冇再嚟呢度囉。
圓明園剩番幾舊爛石，一片頽垣敗瓦。
由景山公園望出去，大家睇下，北京仲係冇乜高樓大廈架。
可能係男仔既關係，行呢個軍事博物館行得好開心。
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
