日期：1988年6月
地點：北京
北京奧運只差百日，又勾起我對北京的回憶。我與北京好有緣，先後去過四次旅行，係紐約之外去得最多的城市，亦是第一次跨越廣東省兼第一次坐飛機去的地方（證明我幾愛國！），印象特別深刻。
我第一次去北京，已是88年的事，對！亦即六四事件前一年，那個沒手機沒手提電腦，打個長途電話都好麻煩的年代，對不少十來歲的年輕人來說，大概等如「史前」時代吧？
那時的北京跟今天完全不同，但由於年代久遠，只能簡單地記下重點。
行程：好像是兩個星期，打算去北京、杭州及黃山（好奇怪的行程），結果當然行不通，最後全留在北京算了。
同伴：一行六個男仔！普通話講得下的好像得一兩個，我就講得最屎（而家都冇乜改善），記得同機還有不少自由行的女孩子，有一對幾日後重遇，無癮地說怕危險，日日包車，已經使晒啲錢，被逼提早回去，又有兩位女子，跟咗我哋幾日，或者覺得有幾個男仔照應會安全啲啦（證明我哋信得過啦）。
六個男仔加兩名偶遇的女子，開始這次行程！
出發：那時坐飛機好巴閉架，為咗慳錢，便決定搭船（夜船）去廣州，再轉飛機去北京。點知落筆打三更，班機竟然Delay！仲唔係一兩個鐘，係十個鐘，第一次搭飛機就搞成咁，結果去到北京，搞埋入境，已經半夜三更，見到有意見箱，有人話不如寫「Delay No More」啦。
為咗慳錢，只要搭船去廣州再坐飛機！
等咗成日，終於上到機啦，第一次搭飛機，好開心！
半夜三更嚟到首都機場，四周幾乎冇人。
酒店：由機場再坐車去到市區（夜媽媽也不知是那處），已是深夜吧，甫下車，一大班人湧向我們，也不知如何是好，幸好同機遇上一位單車選手（我記得是港隊的，當然不是黃金寶啦）來北京訓練，跟著他選了前門酒店，位於市中心，價錢梗係好貴啦，好鬼肉赤！
翌日即刻搬酒店，價錢平好多，好似叫麗華酒店，也忘記在哪裏，只記得要轉巴士，落咗車仲要行一段路，好鬼煩！
食：當然有食全聚德啦，當時全聚德有分外賓同本地（唔係間間有分，我哋幫襯前門嗰間），外賓價錢好乸脷，於是我哋就跟人由後門入，當係本地人，又平又好味，我哋食咗幾次。
我哋亦有幫襯其他烤鴨店，當年仲未有麥記，只得KFC，一次貪得意想試，點知我的普通話太差勁，被「識破」是香港人，要排外賓那條隊，價錢貴啲事少，仲要畀外匯券，我哋邊有？只好得個睇字。
有次去市郊如長城，我哋又會在糕餅店，買定一些糕餅，不過當年內地糕餅沒有今天精緻，加上焗在車內太久，變得大大舊發漲了的物體，硬過石頭，即刻冇晒胃口。
有時又會在街市（好像在前門一帶）買些西瓜回酒店吃，可惜有次被老點，回去劏開一看，整個是白色，翌日我們去算帳，那小販仲扮晒嘢。不過佢都算有良心，換了現在，應該會打紅藥水！
飲：飲得最多的就是汽水，一蚊支，抵啦！當年可樂叫口樂，還有一款叫少林口樂添。
有時街邊食包子加汽水就係一餐。
交通：好少坐的士，通常不是巴士就是地鐵，地鐵無論買票定畀飛（當年入閘係人手收飛）都冇人排隊；搭巴士一樣，我們回酒店又往往撞正放工時間，巴士一到，就要同成班人爭上車，返番70年代既香港！所以經常同當地人嘈交（我哋都幾夠薑！），有一次其中一位同伴仲唔記得落車，夜媽媽，幾驚佢唔識返酒店，我們在車站乾著急，好彩佢都醒目，喺下個站落車，仲得當地人幫忙，先至返到嚟，否則就真係「迷失北京」嘞。
當年的地鐵，好鬼經典呀！
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
