第19屆世界盃
年份：2010年6月11日至7月11日
地點：南非
名次
1.西班牙
2.荷蘭
3.德國
4.烏拉圭
‧主辦國
非洲首次主辦世界盃，但南非明顯唔多掂，管理好差，球場幾乎起唔切，很多設施未搞掂，治安好差，很多傳媒都被偷被劫。
南非也破了紀錄，成為史上首隊初賽被淘汰的主辦國，不過盡算射入今屆第一個入球，最後一戰又贏到法國，算是有交代了。
不過講到最煩，還是球迷經常吹乜鬼vuvuzela，真係嘈死人，我喺電視睇都覺得成日有啲烏蠅喺身邊，大大影響心情！
‧賽制
跟上兩屆一樣，不過今屆開始，黃牌要到八強之後先取消重計。
‧主題曲
今屆主題曲是《Wavin' Flag》，英文版由K'naan，幾有世界盃氣氛，令人時熱血沸騰，也有點非洲風味。中文版是張學友和張靚穎的《旗開得勝》，氣氛就差了一點了。值得一提，主題曲沒有粤語版了（不計有線嗰啲把鬼歌），香港果然被邊緣化。
‧吉祥物
今屆吉祥物是一隻叫Zakumi的豹，感覺幾得意，而且好配合非洲的風格。
‧世界盃形勢
今屆真係瞬息萬變，歐洲球隊一開始表現好差，法國只得一分，仲搞到內鬨（有報紙稱之為「法國大革命」）！跟住意大利又出局，上屆冠亞軍齊齊首圈出局，係咪歷史上首次？其他歐洲球隊如丹麥、希臘亦一早出局，英格蘭、葡萄牙都入唔到八強，好似齊齊撞邪咁！
亞洲球隊令人改觀，日本、韓國齊齊晉級，澳洲若非首仗輸得太多，都分分鐘出線，連大洋洲的新西蘭都三戰不敗（最後仲成為今季唯一不敗之師），值得鼓掌。
北美球隊表現都唔錯，墨西哥同美國入十六強，特別係美國，鬥志頑強，多次喺落後下追平。
非洲球隊卻令人失望，南非成為首戰首圈出局的主辦國，喀麥隆三戰全敗，尼日利亞同科特迪瓦亦首圈止步，好彩最後加納都打入八強，算係攞返少少彩。
最誇張還是南美洲球隊，五隊齊齊躋身十六強，四隊入八強。
但係一到四強，又變返歐洲球隊天下，四隊之中，烏拉圭靠抽到好簽，早知無機。剩低三隊，德國同荷蘭都沒有皇者應有氣派，好彩最後都畀西班牙贏到，雖然成為歷史上入波最少既冠軍（入得8球），但全隊控制節奏一流，整體實力平均，點都好過大打矛波，連告魯夫都彈既荷蘭吖！
‧傳播媒介
今屆繼續由有線攞到播映權，又係大搞Party，同埋搵一班貌似古惑佬的主持（其中一個仲好似生癩痢，十足肥版阿Q），加埋班超低能的女主持，十個惡頂（最難頂潘杰寧嗰把懶可愛的高Key聲），又搵幾條友唱埋啲好無聊既歌。不過有線有幾方面都抵讚，例如搵嚟黃興桂，可能有人好憎佢，但點都好過李德能之輩，又搵沈旭暉講各國足球與國際關係，即時型好多！
至於無記同亞視都要播有線畫面，四場直播仲喺高清台播，連新聞都無入波片段睇。亞視乜都唔做，無記就喺12點左右搞咗個把鬼節目，由主持齋講加埋低能動畫，又玩埋獎門人式遊戲，主持無咗李克勤、無咗令人懷念的阿叔，鍾志光都係咁無乜突破，張國強算OK，應該最適合主持的馬啟仁去咗南非，其他主持就不敢恭維（第一日搵阮兆祥扮盧覓雪，嚇死人！），黃婉曼完全唔掂，惟一作用喺畀其他男主持不斷口頭抽水，反而李綺雯口齒靈俐，值得一讚。
第一次有3D世界盃睇，本來我都諗住入場，點知後嚟話要三百蚊，即刻咪搞啦！
由於電視都無入波畫面，想睇番入波，一係睇有線一台新聞，一喺上網睇，但連youtube都唔畀播入波，所以至今有啲入波我仲未睇到。我成日諗，FIFA咁樣「向錢看」係咪太短視，今屆香港氣氛明顯比上幾屆差，再多幾屆，大家對足球熱誠可能大大減低，對FIFA未入係好事。
‧個人經歷
一開波，除咗第一場睇咗一陣直播之外，初賽大部分都無睇過，一直到英格蘭喺初賽最後鍵一戰，終於忍不住去咗APM睇波，而英格蘭亦總算入到十六。
跟住被借調到其他部分工作一段短時間，捱過幾晚夜，但就剛好可以喺公司睇到幾場直播，包括最經典的英德大戰、荷蘭對斯洛伐克、韓國對烏拉圭及日本對巴拉圭等。
不過借調一完，幾乎沒機會睇直播了，唯一一次又係去APM睇巴西對荷蘭，但睇到1:1就走，返去就發現巴西拜拜咯！
到咗準決賽同決賽，又係一場都無睇！決賽翌日，連上網都懶，橫掂邊隊贏同我都無乜關係。
‧難忘一刻
--無論英格蘭踢得幾差，永遠都成為焦點，第一場就整個「世紀甩手」畀大家歎，也令「普天同慶」成為眾矢之的。
--北韓相隔四十幾年再喺世界盃亮相，首次對巴西幾對辦，仲入到一球，點知第二場就兵敗如山倒，仲畀C朗射入一球夫碌入波，也是今屆唯一入波。
--巴西一開始都好似樣，後衛馬爾干仲對北韓時射入零角度既超靚入波。
--世界盃前，好多人都睇死日本，點知佢哋第一場就贏喀麥隆，最後一戰對丹麥，又射入三球好靚既入波！
--英格蘭最後一戰，老實講真係好緊張，我去到APM，哈！即刻睇到入波，但之後始終拉唔開，臨完場前，斯洛文尼亞仲有球機會，搞到泰尼幾乎想「顏面擋球」，以身報國，最後有驚無險，成功晉級。以為係首名出線啦，點知鏡頭一轉，美國補時入波，斯國由出線變出局，喊都無謂，英格蘭由第一變第二，由對加納變成對德國，如果美國呢球唔入，英格蘭先對加納再對烏拉圭，點都好踢啲！
--講到美國首兩戰落後下追平，第三戰更在完場前一刻入波！韌力十足，球味十足！
--到了第二圈，焦點又係英格蘭，「世紀誤判」簡直離晒譜，我喺公司睇重播，全部人大大聲叫出嚟，因為入咗白界真係好多！呢場波上半場好精彩，好有戲劇性，假如英格蘭能追平，下半場肯定好睇，可惜球證破壞了一場本應經典的賽事。
--日本也打得不錯，跟巴拉圭拉成均勢，最後互射十二碼，我正在聽收音機，但也不敢聽下去，再聽之時，聽到主持話乜嘢「雖敗猶榮」，就知日本拜拜！可惜！
--之前畀人讚到天上有地下無的阿根廷，結果畀德國大炒，真係大快人心。美斯一球不入，賽前被捧上天的球王即刻被打落凡間。
--巴西對荷蘭之戰，我們到APM睇直播，上半場巴西完完全全控制大局，荷蘭連半個機會也沒有，心諗巴西點會輸呀？點知下半場一個烏龍波就令比賽峰迴路轉，後嚟返屋企途中，聽到荷蘭又入一球，就知大事不妙。不過最慶係球評馬後炮，即刻話荷蘭幾好幾好，大佬，巴西輸自己咋，咪亂講啦！
--烏拉圭對加納都好經典，蘇亞雷斯臨完場前使出「上帝之手」，加納十二碼又真係唔入，蘇亞雷斯呢種為國捐軀既行為，即時成為英雄。
--巴拉圭對西班牙又係戲劇性，先有巴拉圭十二碼不入，3分數後輪到西班牙同一命運！真係有趣。
--決賽西班牙對荷蘭，一早預咗唔會好睇，但估唔到兩隊咁粗野，擺牌破晒紀錄，荷蘭球員既穿心腿，更令人嘩然，荷蘭，已經不昔日全能足球的荷蘭了，好彩輸波，否則是足球界的悲哀。
‧難忘人物
--神秘的北韓隊中，最著目的是鄭大世，又話乜鬼「北韓朗尼」，又懶愛國咁喺咁喊，有啲惡頂，結果佢一球不入，咁愛國，返去幫國家開礦吖笨！
--日本的本田圭佑好波，對丹麥第一個罰球超靚，對丹麥既後腳過人亦好正！戴志偉後繼有人了。
--科蘭也好犀利，今屆射入五球，仲要每一球都係超靚世界波，曼聯應該好揼！
--荷蘭踢法大變，無以前咁好睇，但洛賓仍然表現搶鏡，見佢左腳卻打右翼，靠一招就食糊，唔通我都要轉打左邊？
--雖然唔鍾意荷蘭而家踢法，但中場史奈達又真係效率好高，似德國球員多過荷蘭球員。
--以高路斯咁既質素，喺德甲全季只入三球，但世界盃六場就入咗四球，累積入咗十四球，追平轟炸機梅拿，好彩最後一場傷咗無出，如果唔係畀佢入多兩球，成為世界盃史上入波最多球員，真係要問句：「佢憑乜？」
--美斯、朗尼、卡卡、費托夾埋喺世界盃一球都入唔到，C朗靠對北韓先入一球，今屆世界盃可以話係球星墳墓，定係班球星喺聯賽已經踢到殘晒？
--當然，今屆最大既明星，始終係八爪魚保羅，可惜下屆一定無得再作預測，唔知到時有無「保羅二世」呢？
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
