第18屆世界盃
年份：2006年6月9日至7月9日
地點：德國
名次
1.意大利
2.法國
3.德國
4.葡萄牙
‧主辦國
世界盃回到德國，這屆賽事也辦得不錯，德國天氣好，有主辦大賽經驗，還花巨款興建好靚的新球場（慕尼黑的安聯球場便超靚），令賽事更加賞心悅目。
‧賽制
基本上跟上兩屆一樣，不過今屆開始，上屆冠軍都要打外圍賽，不知到哪時，會第一次見到上屆冠軍無緣打決賽周呢？
‧主題曲
德國世界盃官方主題曲名為《Celebrate The Day》，Herbert Gronemeyer 真係唱得好動聽，不過略嫌大路咗啲，而且無乜德國味道。今屆李克勤又嚟嘞，不過似乎沒有太大突破，《我著十號》明顯比上兩屆既世界盃歌曲遜色，不過點都好過無記力捧既四條友唱《Put your hands up》，成首歌都行，最莫名奇妙係唱緊 「put your hands up」時，加咗兩句「解決咗喇！解決咗喇！」，夾硬加埋巴士阿叔名言，不知所謂。
‧吉祥物
今屆吉祥物是Goleo VI and Pille，前者是獅子，後者是足球，Idea都幾好，不過隻獅子真係唔多得意，仲有啲鈍鈍地！
‧世界盃形勢
我諗無乜邊個會估到意大利攞冠軍，不過今屆好次無乜邊隊有好表現，德國無乜冠軍相，英格蘭一場好波都無踢過，巴西明顯跌Watt，阿根廷第一場踢到好有霸氣，點知踢踢下又係先盛後衰，葡萄牙攞冠軍似乎未夠Quali，當法國先Out巴西再Out葡萄牙，我都希望佢哋贏，等球王施丹攞住兩個冠軍退休，點知衰喺佢自己個頭度！
值得注意的是，歐洲球隊包辦了四強位置，喺自己地頭，果然踢得醒神！
‧傳播媒介
繼續由有線攞到播映權，大家繼續四圍搵免費波睇，而有線也一如以往，繼續在九展大搞甚麼世界盃Party，評述也還是那幾個，當然也不能奢求有甚麼突破！整個有線世界盃，最難忘是石詠莉是其中一位「世界妹」。
至於無記同亞視，似乎也一切如舊，無記最特別是用伍晃榮搭阿叔，都幾得意！不過伍晃榮其實並不適合做直播的，發揮不大，成日將「波係圓既」掛在嘴邊都幾煩，不過而家回看，這是阿叔與伍晃榮最後一次做世界盃，真係令人唏噓！
‧個人經歷
由於工作關係，開賽前要做一些跟世界盃有關的工作，最記得一次前往沙田體院，看到一班藝人踢波兼宣傳世界盃，聽到一把好「拆」的聲音，我心諗：邊個嚟架？看清楚，原來是尹佬，那把聲真的完全變了，數年以後，他果然離開大家……
今屆決賽周初段，要到美國一遊，心諗應該無機會睇波了，點知剛好相反，由於時差關係，賽事是在紐約早上及中午舉行，而且偶爾全國電視網會直播，即使沒有，當地的西班牙文電視台也有直播，因此我反而有較多機會睇直播。有幾次我還到住處附近的薄餅店一邊食嘢一邊睇直播，店主明顯是意大利人，還在店內掛起意國國旗，可惜決賽時已回港，否則見證他們興奮的表情，應該幾特別。
回到香港，反而很少看球賽了，沒記錯的話，兩場準決賽及決賽都冇睇（沒有英格蘭，冇心機睇囉！），好像是歷年來首次。
‧難忘一刻 --今屆愈來愈多商場轉播世界盃，我也貪得意去過APM一次，那是英格蘭首戰對巴拉圭，現場人山人海，好恐怖！我先在大堂側著頭看了一會，再到Food Court搵到個位，當然，個位就一定麻麻，我都係心不在焉食完就算。開賽不久，碧咸便入波（其實有點夫碌），但其後兩隊都無乜攻勢，我看了大半場便走了，老實說，要這樣企住睇波，我真係唔多Enjoy！
--英格蘭又射輸十二碼出局了，簡直就是歐洲國家盃翻版！同樣輸畀葡萄牙，被寄予厚望的朗尼仲要畀C朗跣到佢出場……開頭仲以為英格蘭至少入四強（近年嚟講，已經算有交待），點知都係八強止步，悲！
--決賽我無睇，不過之後睇番，又幾戲劇性，十二碼定冠軍誰屬，感覺總是不太妥當的，但又沒辦法！ ‧難忘人物
--一代球王施丹，當年用頭幫法國攞冠軍，今屆因為一頭而令法國失落冠軍，佢呢個光頭真係令人難忘！
--新一代球王C朗，今屆最精彩的「表現」，就是成功令朗尼被趕出場，睇見佢得逞之後嗰個奸笑樣，真係幾想打佢一身（補飛：不過其後佢喺英超既表現，又的確值得一讚）。
--一代球王朗拿度，今屆第四次征世界盃（94年那屆沒出場），表現明顯遲暮了，不過他仍然射入3球，歷屆合共射入15球，自我睇世界盃以來，轟炸機梅拿射入的14球便似乎是「不可能打破的紀錄」，想不到這紀錄還是被打破，巴西雖被淘汰，但朗拿度也應該老懷安慰吧。
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
