第17屆世界盃
年份：2002年5月31日至6月30日
地點：日本、韓國
名次
1.巴西
2.德國
3.土耳其
4.韓國
‧主辦國
日本幾黑仔，本來諗住可以破天荒成為亞洲首個主辦國，點知突然殺出韓國，搞到日本要將一半主辦權讓出嚟！不過韓國投入度的確比日本高（據說日本人捧英格蘭的比捧自己國家更多），氣氛更好，看得出呢個國家真係好團結。
首度在亞洲舉行，對我們來說有三種變化，第一，去現場睇世界盃再不是遙不可及的事，請幾日假花一萬幾千就可成行；第二，比賽時間是下午，沒有時差，不用捱夜，不過要返工的話一到下午就一定心癢癢；第三，拜日韓是主辦國不用參加外圍之賜，加上抽簽出奇好運地避開伊朗、沙地等強隊，中國扶碌地得以「衝出亞洲」！
‧賽制
今屆延續上屆，32隊分成8組，首兩名出線，然後便淘汰制。由於分兩個主辦國，也分成日本和韓國兩個賽區。
‧主題曲
這屆大會主題曲是《Vangelis》，好有動感。至於日韓明星唱的《Let's Get Together Now》，節奏流暢，聽落覺得好舒服。
好奇怪！從來無話鍾意踢波既黎明，連逐第三屆唱出世界盃歌曲，今屆的《衝鋒陷陣》更加係亞洲區主題曲，但而家應該無乜人記得。
反而無記主題曲，李克勤主唱既《Victory》就正好多，改編Bond的歌曲，開頭真係估唔到可以改成粵語歌！歌唱仲好正！不過我懷疑除咗李生外，仲有邊個可以唱得到而唔甩。
‧吉祥物
這屆的吉祥物有三隻，叫Ato、Kaz同Nik，一開三，擺明係想賣多啲紀念品，不過超樣衰，實在不明白點解一個動漫超強的國家加一個近年創意十足的國家，竟會設計出如斯樣衰的吉祥物。
‧世界盃形勢
今屆可以話係我睇咁多屆以嚟，最多冷門的一屆，不少昔日的魚腩，成績都勝過傳統勁旅。荷蘭未能打入決賽周，阿根廷、葡萄牙同法國初賽就拜拜，意大利十六強出局，我最喜愛的英格蘭，八強就要對巴西，於是青黃不接但勝在一世夠運的德國，過下一關，過下又一關，幾驚畀佢贏埋，最後巴西奪冠，都算係實至名歸。
自我睇世界盃以來，亞洲從未突破八強，今屆韓國終於令大家跌晒眼鏡，殺入四強，昔日魚腩土耳其擺第三，美國、塞內加爾同日本都有唔錯成績，世界盃終於都變得「世界」了。
‧傳播媒介
今年又是一大突破，有線取得獨家轉播權，無記同亞記只播四場。可惜有線的製作真的令人失望，製作人總以為滿場吹BB聲、人群吵雜聲就代表熱鬧，主持講嘢高八度兼係唔係都話「你哋話係唔係」就代表搞氣氛，其實這種造作的氣氛只會讓人厭惡，葛文輝、肥谷同張達明嘗試擔起阿倫、志偉同阿叻的搞笑責任，結果卻是強差人意。此外，有線的評述亦令人失望，馬啟仁、李德能，沒有一個喜歡！
最離譜的還是巴西對中國一場的評述，馬啟仁竟昧著良心，把這場的大敗賽事評述得仿似中國隊佔盡上風，甚至連「我哋贏唔倒球賽，我哋贏左光榮、贏咗快樂！」「我哋中國隊無野可以輸，所以一開始我地經已嬴晒啦！」等離譜對白也說得出口。何鑑江一樣咁離譜，中國大幅落後，中國隊在後場交波，何竟然話：「玩佢！」輸咁多，玩到人就好叻？簡直就是「義和團」上身。
至於無記同亞記，由於只播四場，基本上已經係例行公事，大家都沿襲番近幾年的做法，當然無記有克勤同阿叔，始終吸引力大啲！
今屆互聯網突飛猛進，想知道賽果容易得多，科技進步真係好！
‧個人經歷
今屆因工作關係，可以到韓國觀賞世界盃，雖然要捱了一晚夜，但仍然好興奮，這次看了三場比賽：巴西對土耳其、法國對烏拉圭、西班牙對巴拉圭，其實除了首戰外，另外兩場吸引力都麻麻，不過能夠現場觀戰，已算圓了多年心願！
在這些比賽中，最難忘是巴西球迷，人人發揮創意，扮到古靈精怪，至於土耳其球迷則夠晒團結，清一色紅衣，人人手持國旗，極具愛國心，不過最令人佩服的還是韓國球迷，人人齊喊「大韓民國」的情景，我實在難忘！
至於香港球迷也不輸蝕，他們基本上甚麼波都睇，食飯又睇，坐車又叫司機開電視，甚至要求取消行程返酒店睇電視，我都甘拜下風！
回港之後，賽事尚未完結，那時公司超好，會議室有部電視收到有線，大家定時定候乜都唔做，走入會議室齊齊睇波！有時我哋又會到公司附近的茶餐廳，一邊睇電視一邊食晏，個人認為比捱夜睇波開心得多。
巴西球迷最愛扮得古靈精怪，我們當然爭住合照。
法國球迷好多都著返藍色波衫。
當然要同韓國美女合照啦！ ‧難忘一刻
--今屆早在開賽之前已經新聞多多，中國突破性打入決賽周，傳媒就當晒班球員係超級球星，真係令人作嘔！最離譜米路都掛住搵銀，有齣電視劇仲無厘頭客串，中國踢得咁差，除咗實力之外，無自知之名都係原因之一。
--賽前另一焦點，碧咸無啦啦受傷，傳媒即劇當成世界末日，仲有一份報紙用碧咸隻傷腳做頭條，誇到吖！結果碧咸及時傷癒，不過表現只係一般！
--我們在韓國看的首戰，巴西表現麻麻，但卻見識李華度的「演技」，他被對手用波省中，即刻好辛苦咁瞓低，點知對手一畀球證趕出場，佢即刻好精神咁彈起，唔踢波應該可以轉行拍戲。
--我在韓國因工作關係，捱了一晚夜，辛苦過後，去浸浸溫泉，半夢半醒間看到日本取得在世界盃的第一分，後來離開酒店到街上搵食，發現廣場滿布「紅衫軍」，原來大電視正播放韓國之戰，人人齊心為球隊打氣，氣氛一流！回到酒店，每個台都播這場勝仗，睇到驚！
--在韓國其中一晚，我們與團友到酒店的大堂酒吧看德國對愛爾蘭，比賽不算精彩，但一直領先的德國，卻在臨完場一刻被羅比堅尼射入，即時High到爆！
--初賽重頭戲英格蘭對阿根廷的世仇之戰，我們在韓國一間食肆觀賞，點知食肆得一部電視，大家睇得好辛苦，於是把幾火，嘢都唔食，走去隔籬的酒吧齊齊睇，最後英格蘭憑碧咸十二碼成功復仇，我們全場歡呼，真係大快人心。
--第二圈日土之戰，我和同事出外用膳，回到會議室，發現全場靜寂無聲，原來土耳其剛剛入了一球，最後日本出局，傷了公司內不少日本粉絲的心。
--意韓之戰，意國領先一球，我都懶得理賽果，心諗意大利領先仲點會甩拖吖！後來回家開電視，下！韓國贏波，真係估佢唔到。
--今屆最經典之戰，應該是巴英大戰，又係全個部門湧入會議室睇波，英格蘭領先既時候，仲全場High爆添！賽事其實不算精彩，不過有三個入波，其中細哨球波仲幾靚添，雖然賽果唔多滿意，都算睇得開心。
--決賽其實都唔多精彩，巴西明顯高啲！ ‧難忘人物
--當然係3R啦！巴西人其實幾識包裝，一句3R，非常好記，個人認為李華度差少少，大哨雖然退步咗，但爛船都有三斤釘，佢今屆入咗8球，係自從78年以嚟，第一次突破一屆入6球既球員，勁！至於細哨，真係好有足球智慧，佢笠死施文嗰球就係經典！
--這屆美國表現不俗，還有一位當路雲冒出頭來，當時見這位球員無乜頭髮，還以為不年輕，但原來只得廿歲，只見他敢搶敢射敢去，有膽式！我喜歡！
--其實今屆都無乜特別值得讚既球員，至多係德國門將簡尼，個樣成個大猩猩咁，對手見到佢都驚啦！難怪咁難入佢波！
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
