第16屆世界盃
年份：1998年6月10日至7月12日
地點：法國
名次
1.法國
2.巴西
3.克羅地亞
4.荷蘭
‧主辦國
法國在創辦國際足協和世界盃出力最多，卻從沒奪取過世界盃，甚至連決賽也未入過，今屆世界盃來到法國，終於取得突破。整項賽事也舉辦得很成功，除了決賽古怪一役外，整體還算精彩，至少比美國那屆好，法國今次真係攞晒彩！
‧賽制
今屆又變了，24隊變成32隊，分成8組，首兩名出線，然後便採淘汰制，個人認為這種制度較佳，分組只有兩隊出線，大大增加刺激性。而且多了球隊參賽，幾乎大家熟悉的球隊都可參賽，沒有遺漏，也間接令賽事更吸引。
‧主題曲
這屆大會主題曲是Ricky Martin的《The Cup of Life》，可說是近幾屆最好聽的主題曲，到現在我還哼得出，充滿動感，真的令人有站起來郁郁的衝動。香港方面，黎明（又係佢）有份唱《最美時光》，但相信除了他的粉絲之外，應該無乜人記得，反觀霉咗一排既李克勤自作詞自唱的《球迷奇遇記》就幾有親切感，不但唱出球迷百態，一開頭「起來起來起來起來」，好好記，又表達出半夜起身睇波既感覺，到而家都好有印象。
‧吉祥物
這屆的吉祥物叫Footix，是法國代表雞，又有法國主色紅白藍，個樣都幾得意，係我比較喜歡的吉祥物。
‧世界盃形勢
今屆幾乎有齊所有勁旅，沒有遺漏！意大利巴治奧已開始走下坡，迪比亞路又未能接棒；英格蘭碧咸同奧雲初露鋒芒，可惜領隊係荷度；德國開始衰落，荷蘭、阿根廷、克羅地亞都無乜冠軍相。本來以為又係巴西天下，但領隊賽前放棄羅馬里奧，靠朗拿度加年事稍長的白必圖，結果果然出事。
自我睇世界盃以來，就記住史上只有六支冠軍，次次都不出呢六隊，今屆終於有突破，法國成為史上第七支冠軍球隊，而且法國也是史上少有欠缺預級射手的世界盃盟主（當時初出道的亨利還未算球星）。
‧傳播媒介
今屆無記複製上屆的成功模式，把世界盃節目搞得更大眾化、更富娛樂性，但亦更加庸俗，甚至連蔡楓華、《真情》的甘草也請上來，於是節目中也經常出現一些無聊、可笑、難頂的言論。不過幽默、有急才，又熟悉足球的李克勤，成功確立了其世界盃主持的地位。
這屆無記還首次出現「世界妹」，跟住又搞出大頭佛，一位世界妹話畀一位嘉賓性騷擾，九成宣傳啦！真係搞到烏煙瘴氣。
至於亞視，都仲有些少大志，在世界盃前夕推出《世界盃乜都有》特輯，派出多位藝員到訪多個國家，算係幾特別。到咗決賽周，又係尹佬、陳炳安等例牌陣容，唯一亮眼處是出了一個丁偉傑，這位評述跟一般齋打天才波不同，資料搜集做到十足，大大改變了香港評述員的風格。
今屆電視廣告也愈益重要，Nike要挑戰adidas的足球霸主地位，找來吳宇森為巴西隊拍了一個經典廣告，一眾主將猶如成龍上身，玩盡機場的場景，真的令人拍案叫絕！
‧個人經歷
因工作關係，開賽前去晒兩間免費電視台，遇見尹佬、阿瑜、阿叔、鍾仔還有李克勤，算是一個難忘的經歷。而且我與史提芬都屬於世界盃專題組，大家一齊合作互相支援，是難忘的工作體驗。
這屆看直播的次數其實並不多，最開心的還是跟成班豬朋狗友一邊打邊爐一邊睇波，之後都好少咁樣睇波咯！
‧難忘一刻 --今屆最精彩片段，當然是林尚義食煙事件，雖然我有睇場波，但不知何故Miss了這個鏡頭，只聽到李克勤話唔好阻住阿叔「食嘢」，然後全場就笑喇。
--最難忘的一戰自然是十六強英阿大戰，我全場睇晒，呢場波有晒所有戲劇性元素：世仇之戰，後備奧雲射入靚波，後嚟碧咸畀人趕出場，心諗弊嘞，點知後嚟又守得唔錯喎，加時仲頂入一球，正打算慶祝，點知又吹犯規，果然天亡英格蘭，見到射十二碼，都知輸咗七成，唉！
--一向很喜歡柏金，他在對阿根廷一戰，一個乖巧的入球更叫人拍案叫絕！
--決賽由巴西對法國，巴西由初賽贏到準決賽，連荷蘭都捱得過，諗住今次掂啦。法國雖然都係不斷贏，但似乎無乜霸氣，點知一開電視，評述猛講朗拿度無厘神氣，先知出事，入咗兩球，直頭熄電視無眼睇，瞓咗大半個鐘後，再開電視，咁啱睇埋第三球，見證史上一場最古怪的決賽。 ‧難忘人物
--有啲人天生會成為焦點，碧咸就係人辦，初賽射入靚靚罰球，跟住對阿根廷又成為罪人，受注目指數仲高過冠軍法國班球員，真係吹佢唔漲！當然，施蒙尼個陰濕樣都好經典。
--墨西哥出了一位白蘭高，技術不俗，但最吸引人的，卻是他的「夾波」神功！夠晒娛樂性！另一位著到花厘花碌的門牌金保斯都好經典！
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
