第27屆奧運會
年份：2000年
地點：悉尼
金牌榜
1.美國 39金 25銀 33銅
2.俄羅斯 32金 28銀 28銅
3.中國 28金 16銀 25銅
4.澳洲 16金 25銀 17銅
難忘印象
‧這屆奧運的主辦城市，北京本來被視為大熱，結果大熱倒灶。93年選奧運城市時，我剛加入A記，兩台都準備了直播公布結果的節目，當宣布是悉尼時，我記得兩台主持即刻無晒癮，特別是無記，還準備了香檳，最後當冇開啦！其實悉尼申辦了多屆，也應該贏番次啦，反觀北京，只是首次申辦，邊會咁易吖，何況如今想來，北京在2000年辦奧運，未必有足夠準備。
‧這屆大會主題曲為〈The Flame〉，老實講我真係完全冇印象，至於無記的主題曲是〈盛世最強〉，記憶中很少奧運歌曲節奏強勁，算是突破，A記方面，印象中好像沒有呢！
‧別以為今屆吉祥物必定是袋鼠，就係估你唔到，今屆首次多於一隻吉祥物（擺明想賣多啲紀念品），分別是Syd、Ollie和Millie。是三種澳洲本土動物，分別代表土地、空氣和水。Ollie代表奧林匹克的博大精深，Syd表現澳洲和澳洲人民的精神與活力，Millie是一個資訊領袖，代表千禧年。嘩！一啲都唔可愛既！
‧我曾經離開A記一段時間，奧運前因緣際會，又回到A記幫手，可惜遲了點點，錯過奧運期間到悉尼採訪的工作，可惜！
‧這屆我也是負責早上及下午時段，由於悉尼時間跟香港只差3小時，所以這時段是比賽的黃金時段。雖然並非第一次做奧運，今次首次負責直播時段，原來超辛苦，我是負責提供資料的，基本上每朝吃過早餐之後，便開始幾沒停頓的工作，無論導演、助導、主持、剪接、PR、FM，有甚麼問題會嚟問你（有同事笑住話，成日都聽到唔同人嗌我個名），而且同一時間有多場比賽，播播下，隨時會轉播另一場，你便要即時為主持提供其他資料，有甚麼新消息，又要第一時間通知他們，連午餐也只是快手快腳搞掂，其間就靠零食頂住，一踩就是10個鐘，每次返到屋企都散晒！奧運後有同事話：「做過呢份工，任何工作都唔覺得辛苦。」
嗱！後面的電視就畀我哋睇住幾個台播乜，啲File就放滿晒唔同資料，方便我哋隨時摷料。
‧這屆A記主持有徐嘉諾、蔡錦豐、倪文玲、韋基舜、丁偉傑等，皆熟悉體育，而陳啟泰主持經驗亦豐富，大大減輕我們的負擔，前往澳洲的則有張丕德及韓君婷等。
無記方面，我只記得有韓毓霞！
與眾主持合照，左至右為蔡錦豐、倪文玲及徐嘉諾。
難忘一刻
‧大概掛住工作的關係，我幾乎完全忘記開幕禮的情況，只記得三件事，第一，開幕前一刻收到薩馬蘭奇的開幕致辭，看到「Down Under」一詞，唔知係乜，正煩惱間，丁偉傑提醒我，此詞解作澳洲，才譯得出全文。第二，開幕有澳洲歌手Kylie Minogue。第三，就是兩韓運動員一起進場的感人場面。反而拿最後一棒的費曼，冇乜特別，點火炬儀式，好像頒獎台是從水中升上來，也不覺特別。
‧今年兩台又有爭拗，好像是兩位韓姓藝人在悉尼出現糾紛，不過我忙到一頭煙，才懶得理呢！
‧最記得男子50米自由泳，兩名選手同時掂池，眾人即問，以前有冇試過？我即刻攞住個Walkie-Talkie大嗌：「84年女子100米自由泳試過一次！」其他人半信半疑，我又即刻摷天書畀大家睇，呢一刻，真係好有滿足感架！
‧這年夢幻隊表現已大不如前，對立陶宛仲幾乎輸波，令人捏一把汗，不過也有威水的時候，就是卡達凌空跳過法國對手頭上入樽，我哋全場笑到吖！
‧「萬年亞軍」譚良德替我們當旁述，其徒弟胡佳在三米板一直領先，到最後一跳，譚興奮地說：「師父攞唔到，終於由徒弟攞番。」一名導演唔通氣話：「你唔畀佢大字型撻落架。」靈異事件果然出現，胡佳最後一跳，竟然……個位導演真係好既唔靈……
難忘人物
‧這年最勁的女子運動員是鍾絲，一人獨得三面金牌，但最近她承認服用禁藥，金牌將被遞奪，英雄變狗熊。
‧自從92年奪得高台跳水金牌後，96年奪得高台及三米板金牌，今屆她再奪三米板金牌，擊敗她的，正是郭晶晶，退役不久，伏便變成梁太了。
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
