《蘋果日報》講完80年代和90年代之後，返轉頭講70年代，既然上兩次也有跟進，這次也繼續講吧，希望大家別嫌長氣就是了。
70年代，我還在讀小學，很多事情印象有點模糊，幸好我的記憶頗佳，記得的東西還不少，甚至有些我姐姐硬是記不起的，我一樣如數家珍，就跟大家分享我記憶深處的某些片段吧。
跟上兩次一樣，前面是《蘋果日報》的介紹，後面才是我的評語。
1.李小龍
唔係猛龍唔過江，李三腳踢出香港，捽住鼻哥教識全世界：「中國人唔係東亞病夫！」你問老外： Do you know Hong Kong？答： Yes, Bruce Lee！或 Yes, Chinese Kung Fu！
Lam評語：我從來不是李的粉絲，李死時我好像也沒甚感覺，最記得睇電視講李的喪禮，看到李的面容，有點驚！後來父親朋友的兒子是李的超級擁躉，一講起他就眉飛色舞，還在我們面前耍雙截棍。
李的電影，首映好像沒看過，後來補看了幾齣，以今日標準來說都不算好，《猛龍過江》較佳，《精武門》中李做得太過火，《龍爭虎鬥》最差，拍得好Cheap，不過後面在鏡子迷宮中大戰石堅，也算經典。
2.鄧麗君
小城故事中，一把甜蜜蜜的天籟之音，瘋魔全球華人的千言萬語，恰似你的溫柔暖火從未熄過。「 10億個掌聲」名不虛傳。
Lam評語：那個年紀的我，當然不會是懂得欣賞她的歌聲，較有印象是當年來港發展，唱了幾首廣東歌，老實說她的廣東話跟我的普通話一樣爛！不過她的歌聲又真的很動聽。
3.鄭少秋
由陳舵主、葉孤城、張無忌到楚香帥，秋官能游走金庸和古龍之間，皆因扮嘢秋有名你叫。
Lam評語：很喜歡他主演的武俠劇，特別是《陸小鳳》中肯演奸角葉孤城，《倚天》也很有台型，當年我也買過他的錄音帶，最愛《陸》劇幾首主題曲和插曲。反而他的時裝劇很少看，《大亨》沒看過，《輪流轉》嘛，想睇都無得睇啦。
4.黃霑、顧嘉煇
煇黃合璧，勁過霹靂。一首又一首的電視劇主題曲在腦中觥籌交錯，為升斗市民帶來無限回憶。
Lam評語：其實當年的歌詞，我較喜歡盧國沾，不過黃霑不少作品我也很喜歡，例如《問我》就是一絕，至於顧的歌曲嗎，喜歡他那些較中式的，例如《天龍八部》、《射鵰》的主題曲、《流氓黃帝》的插曲等，其實他的歌那時日日播日日聽，想唔鍾意都難啦。
5.溫拿樂隊
Wynners五虎潮唱歐美流行樂，唱完番文《 L-O-V-E Love》、《 Sha La La》，回歸母語《玩下啦》，得咗！
Lam評語：當年都有睇《溫拿狂想曲》，不過並非他們的粉絲啦。最鍾意是陳友在《大家樂》中唱的《好學為福》，即時《尖子攻略》中翻唱那首。
6.Bee Gees
澳洲 Gibb氏三兄弟《 Stayin' Alive》全球響朵，低音準假音勁。靚聲王伍衞國叫巨基敬軒請坐低。
Lam評語：最記得那時金唱片例牌得獎者，最有印象自然是那位鬍鬚佬Barry Gibb，高音超靚。那時也沒追聽他們的歌，長大了才發現，原來不少啍得上口的，都是來自他們。
7.狄娜
奇女子曾說自己高貴幾十年，逢親有事「一定登晒我以前啲艷星……」《大軍閥》全裸，太經典。
Lam評語：首先，《大軍閥》沒睇過，第二，從來不覺得她靚，第三，小時候睇電視，她以才女姿態出現，但又不覺有幾才，只覺她講嘢語氣好怪。近年翻睇《七擒七縱七色狼》，爛片一齣。
8.徐小鳳
波點皇后一個年代兩個轉變，由國語歌轉型唱廣東歌，玲瓏塔嘆叉燒包，風雨同路有神鳳。
Lam評語：最記得的除了波點衫外，就是她上金唱片領獎，一定講其母親煮辣椒給她吃，所以才有如此有磁性的歌聲。她早年的歌曲，較喜歡的是《風雨同路》、《風的季節》等，曲式有點舊。
9.林亞珍
冬菇頭、厚眼鏡、格仔恤牛仔褲孭大袋的烏龍記者，係蕭芳芳嘅「林亞林亞珍，珍珠嗰個珍！」
Lam評語：那時都有睇，不過覺得有硬滑稽，人物形象勝過劇集電影。
10.仙杜拉
脫離筷子姊妹花後單飛唱《啼笑姻緣》主題曲，「為怕哥你變咗心」鬼馬歌后自此紅翻天。
Lam評語：唱功毋庸置疑，但除了《啼笑姻緣》外，還有甚麼Hit歌？我只記得《風雲》的主題曲。
11.《小李飛刀》
刀下遺留三經典： 1.朱江飾演李尋歡； 2.羅文唱「難得一身好本領，情關始終闖不過」； 3.「小李」至今通用。
Lam評語：當年真係好鍾意，因為覺得李尋歡好Cool好型，最後決戰上官金虹那幕也很經典。
12.《溫故知新》
小兒科古 Sir用緊尿片時，殷巧兒姐姐已請小學生玩問答遊戲，勝出者有現被炒賣的絕版錢罌。
Lam評語：我當然沒資格參加啦，不過聽講我表妹參加過。
13.《幻海奇情》
鬼古集集新鮮。周潤發在《鬼新娘》中撞正鼠疫滅殺全村，驚見無面新娘一幕，細路大喊驚。
Lam評語：《蘋果》寫錯了，周潤發那齣叫《死之境界》，大家通常稱之為《鼠疫》，不過最記得的確是那新娘，還有嚴秋華跟他說：「畀返隻手我。」第一齣有印象的應是《回魂夜》（不是周星馳那齣），之後又驚又想睇，通常會搵定個咕臣，一驚就用嚟遮住，睇完夜晚真係唔敢去廁所架。不過我要強調，《四人歸西》並非來自《幻海奇情》的，咪搞錯！
14.《民間傳奇》
神仙鬼怪、恩怨情仇題材乜都有，導演杜琪峯、林嶺東，台柱夏雨、秋官、拉姑，全體一早升呢。
Lam評語：當年都經常睇，較有印象當然是梁祝、唐伯虎點秋香、王老虎搶親、游龍戲鳳等，甚至連主題曲插曲都記得，不少民間故事，原來靠看這劇才認識的。
15.《天蠶變》
雲飛揚徐少強破繭而出變顧冠忠，麗的 No.1經典劇。主題曲仍是內地流行手機鈴聲，堅！
Lam評語：當年好勁架，仲喺尖沙咀（好似係星光行）搞咗個劇中兵器展覽，我哋都有去睇，場面勁墟冚，而家諗番梗係覺得好無聊啦！至於套劇，拍埋同時無記的楚留香，武打根本不是同Level，程小東真係好勁，至於徐少強，我又唔覺好型喎，不過點都好過顧冠忠（即後嚟變咗嗰個），最喜歡還是主題曲，好有Power！ 記得樂評人黃志華（不是黃子華）說有人上鳳鳳山看日出，有人唱起「獨自在山坡」，跟住全山人一起跟著唱，我雖沒經歷，也覺壯觀。
16.幪面超人 VS咸蛋超人
洪氏大龍、飛虎、天馬，鐵臂銅拳風雷電，加十字死光、咸蛋做眼惡搞超人家族，永垂不朽。
Lam評語：兩者都鍾意睇，不過鍾意咸蛋超人多啲，最有印象當然係阿鄉啦，鍾意佢唔使道具，跑跑下就變咗身！吉田那時太細個，印象不算深，只記得一集佢攞錯茶匙嚟變身！至於幪面超人，一、二號應該都有睇，不過唔係太強烈，V3就鍾意多啲，不過其實我更喜歡電腦奇俠，彈住結他，又話乜嘢正義回路，好鬼型，後尾加埋電腦黑魔仲正！可惜有兩個細路扮超人跌落街，自此就無得睇，當年真係好鬼唔開心。
17.麗的花旦
馬敏兒、余安安、苗可秀、魏秋樺、文雪兒、容惠雯……現在亞視得筱靜、吳亭欣，想點？
Lam評語：其實講成就，佢哋都只係一般，排得太前啩！
18.《朱門怨》
二少奶盧宛茵和三少奶吳沅儀爭風呷醋鬥餐死，橋段永遠通行，《金枝慾孽》不過是進化版。
Lam評語：呢類劇，我當年點會鍾意睇！
19.《獅子山下》
描述徙置區民生的港台劇，良鳴飾演的寫信佬說明了：我哋大家用艱辛努力寫下那不朽香江名句。
Lam評語：早期是公屋內的處境劇，沒有看太多，後期變成一集一個故事，佳作不少，最記得當然是《野孩子》，那小孩汪偉不斷講「大龜變細龜，細龜變大龜」真係好深刻，還有《元洲仔之歌》老公逼老婆同佢搞嘢嗰一幕也很有印象，換了今天應該會畀人投訴。後來《獅子山下》的變奏《香港香港》也常看，最記得伍國衛的《蒼生》，當然還有未成名劉華扮姑爺仔劉美君扮未婚媽媽的《江湖再見》。
20.佳藝電視
三年貨仔的佳視最大成就莫過於首拍金庸名著。李通明、羅樂林、韋基舜、馬海倫等俱為台柱。
Lam評語：記憶中《射鵰》（佳視版）應沒看過，《神鵰》（佳視版）也只看過結局，當年也不知這些原著有幾勁。佳視最有印象是兩件事，一：下午會播一些電視課程，好奇怪，二：當年好鍾意《 301部隊》，後來《430穿梭機》連名都有啲抄佢，那時卡通特攝好勁，有《大鐵人》、《五勇士》、《冰河戰士》同《金剛飛天鑽》，仲會改埋中文歌詞，乜嘢「大鐵人制服敵手，立大功，係咁成日打，唔驚手痛」，「好威猛，飛天鑽實在極有用」，通俗得嚟又幾傳神。
21.麥氏兄弟
麥當雄和麥當傑炮製警匪江湖劇《十大奇案》、《大家姐》及《大丈夫》，拍攝過程無法無天。
Lam評語：《大丈夫》的確拍得好好，好有實感，主題曲亦好好聽，《大家姐》都好有印象，黃莎莉好有台型，後嚟變做《大家姐與大狂魔》，不過嗰位大狂魔個樣有啲搞笑！至於《十大奇案》就最有印象，因為拍得幾有實感，最記得一集講兇手殺了一名女子，挖了她的眼耳鼻，一幕講女子鬼魂找他，出埋個樣，仲恐怖過《幻海奇情》，又有一集講《六國大封相》，兇手（好像是林錦棠）把一個細路掉落街，諗起都覺變態！
22.《 72家房客》
邵氏招牌作之一，秋官、肥姐嘻笑怒罵諷刺時弊，金句：「有水過水，冇水散水。」
Lam評語：我好似有入場睇，那金句當然記得，但其他都沒怎印象。
23.《社女》
沙姐林建明先被賣落火坑再被剃光頭，終看破紅塵皈依我佛。出位演繹反面教材，曾惹爭議。
Lam評語：我那個年紀點會睇呀？
24.《世界真細小》
「人人常歡笑，不要眼淚掉，時時懷希望，不必心裏跳。」黃霑妙筆生花令小世界歡樂 40年。
Lam評語：細個都幾鍾意迪士尼，電視那些卡通短片好好睇，仲會買那些卡通書，某年迪士尼來港演出，我都不知幾恨睇，結果睇唔到，家父帶我去看了另一個不知名的馬戲補數，其實我唔係想睇馬戲，係想係迪士尼呀！至於黃霑的歌詞，《世界真細小》固然好，我更鍾意「歡笑樂園開心地，開心直落到腳址尾」。
25.TVB四旦
汪明荃、李司棋、黃淑儀、趙雅芝，位位氣質逼人獨當一面；狐妮姣佘胡囧囧有排追。
Lam評語：《蘋果》有無搞錯，無記四大花旦排名無可能後過麗的花旦！不過講真我四位都麻麻，那時較喜歡的有黃杏秀、繆騫人，後期的是陳玉蓮，再然後就輪到邵美琪。
26.何守信
由主持摔角、《 EYT》到新聞主播，加港兩邊飛的何 B仔榮升金牌司儀，始終都係《畢打自己人》。
Lam評語：那時所有大型節目都見到他，曾一度懷疑，他離開可以找誰？其實他只可算穩陣，驚喜不多！
27.《小露寶》
圓咕碌、紅卜卜的家務機械人自我介紹：大踏步神情確威武，小子大名露寶，人人皆知道。
Lam評語：當然有睇，但不算很著迷，對小賓女也沒有起啖！
28.許冠文許冠傑
「邊個夠我威？」知你威，許氏兄弟。「點解我要服？」《雙星報喜》令往後雙星氾濫，服。
Lam評語：《蘋果》的記者可能太年輕了，許氏兄弟的排名不可能如此低！要知道，70年代的許冠傑就像80年代的譚校長90年代的四大天王，許冠文簡直就是70年代的冋星馳！那時許冠傑的唱片當然肯定白金，還幾乎年年是銷量冠軍，一有音樂特輯，大家都唔會去街，齊齊坐喺電視前等睇，一次因為拜年所以睇唔到，幾唔開心呀！至於許冠文的電影，幾年齣齣破票房紀錄，那時他的電影一出，要早幾日預售，佐敦嘉禾戲院打晒蛇餅（細路，唔好問我點解唔上網預訂呀！），去睇戲好似節慶咁大件事！
29.香港小姐
73年首屆，冠軍人馬先後有孫泳恩、張瑪莉、朱玲玲、鄭文雅， 09港姐請靠邊站。
Lam評語：跟睇許氏兄弟電影一樣，那時港姐是頭等大事（其實都唔知關我乜义事），最記得當然是林良蕙發花癲！（但夠直率，我欣賞）還有洛史超活頒獎給狄寶娜摩亞（好像是），卻把后冠放在地上。其實中段的比賽我沒怎興趣看，最喜歡反而是後面的歌舞表演，排舞的例牌是梅詩麗，有一次是怎麼銀河婚禮，一次是張國榮劉淑華做的，講一對跳舞的師徒，印象最深。仲有，其中一位港姐係我同鄉，她得獎後家父家母同佢回鄉，好哄動架！
30.《鐵甲萬能俠》 VS《三一萬能俠》
Kidults至愛。鐵甲萬能俠靈魂「朋友號，出發啦！」三一萬能俠的女友是真正愛美神。
Lam評語：最記得當然是那一句：「出嚟啦！萬能俠！」「落去啦！朋友號」。至於愛美神、維納絲都好有印象，仲有大水牛，總之《鐵甲萬能俠》真係好經典好型，至於《三一萬能俠》，雖然我覺得變身太過天馬行空（V型電磁俠、超力電磁俠「真實」得多），但都覺得三機結合三種變身好型，最記得同學識得摺個三一萬能俠，但硬係唔肯教我，激氣！
31.《猛龍特警隊》
誰說龍咁威特種警衞一定是鄭中基， N年前已經龍咁威的是日本仔，叫丹波哲郎、倉田保昭，仲嚟過香港拍外景。
Lam評語：那片頭（定片尾？）真係好型，主題曲帶少少神秘感，好啱齣劇，不過齣劇無乜點睇（細個嘛！），只記得有少少懸疑同推理。
32.《前程錦繡》
中村雅俊揚帆出海帶出勵志旅程。「斜陽裏氣魄更壯，斜陽落下心中不必驚慌」，羅文一炮而紅。
Lam評語：細個好鍾意睇，覺得中村雅俊好有型，主題曲當然好聽，不過其實我更喜歡片尾曲，而且通常拍到MV咁，每次睇齣劇，就為咗呢首歌！第二男主角其實靚仔過仔過中村，記得有一集佢鍾意咗個女仔，點知係舞女，當時覺得嗰位女仔好靚。仲有，麗的有一齣叫《錦繡前程》，男主角成Q日嗌「努力！奮鬥！」咪搞亂！
33.《柔道龍虎榜》
竹脇無我的姿三四郎每周面對奸角膾桓的挑釁，這場柔道氣勢磅礡，杜 Sir都要重拍致敬。
Lam評語：又係記得主題曲多過齣劇，我只係記得姿三四郎好似成日畀師父叫佢落水池反思，同埋兩位女主角一個著和服一個著西服（好似係孖生添），今日華語片一講民初，女主角一定著西服，我覺得都係受呢齣劇影響。《柔道龍虎榜》仲有好多電影版，包括黑澤明的版本同三浦友和的版本，我都睇過，印象不深。
34.《乘風破浪》
沿襲運動勵志日劇風潮的本地青春劇，程可為、高妙思、莊文清劇中際遇迥異，觀眾集集追。
Lam評語：其實故仔都幾老套，係主題曲好聽啫！
35.《星球大戰》
拍足三部曲，依然叫好叫座，細個拎住光管當劍舞，大個狂買黑武士 R2D2，咪同我講你未試過！
Lam評語：我第一齣睇既係《帝國反擊戰》，感覺極震憾，後嚟先喺電視翻睇第一集，反而無咁大感覺！不過我記得當年好多電影卡通（包括高達）都受佢影響，連《叮噹》都有一集玩《星戰》。
36.《狂潮》 VS《家變》
觀眾趕住返歸睇《狂潮》雷茵點殺邵華山，食肆拍烏蠅；《家變》中阿姐的洛琳頭則風靡港女。
Lam評語：其實兩齣都無乜點睇， 《狂潮》睇得多啲，開頭講山泥傾瀉，睇到我有啲驚！後期又有遊戲，估邊個殺邊個，好似好多人參加添，雷茵殺邵華山一幕，電視播完又播，睇到厭！
37.《小時候》
童年的王書麒和路家敏，次次發生小風波都有叔叔潘志文搞掂，最後小朋友一定蹦蹦跳，哈哈笑。
Lam評語：兩位主角真係好得意，細個都有追睇，最記得有一集講成班同學仔合力捉賊！其實同期無記的《小太陽》都好好睇，無固定主角，但同樣感人。
38.《上海灘》
許文強中亂槍而死，還有內地粉絲仍嗌呂良偉做丁力，與葉麗儀的「浪奔、浪流」一樣永恒。
Lam評語：無記在70年代尾80年代初推出中篇劇，取代百幾集的長篇，這套是頭幾齣重點作，當年許文強衝入教堂、玩俄羅斯輪盤都好型！主題曲當然又係一絕！
39.《教父》系列
馬龍白蘭度的教父屢被選為偉大角色，接棒的阿爾柏仙奴更有型。另一經典是電影配樂。
Lam評語：當年咁細個點會睇吖！好似係電視重播先睇過。
40.《熱情的沙漠》
哈林版本純屬碎料，原唱是長鬈髮歐陽菲菲，當年在日本紅到開巷，入選紅白，與鄧麗君齊名。
Lam評語：當年歐陽菲菲一出，幾乎例牌唱呢首歌，聽到驚呀！
41.《陸小鳳》
劉松仁的靈犀一指足以夾住天下兵器。「情與義，值千金」，《食神》雞姐翻唱更回味。
Lam評語：無論主題曲同插曲都好好聽，打親都慢動作真係幾搞笑，不過《決戰前後》最後決戰，仲有《武當之戰》中眾高手合力對付武當掌門，都好經典，一到大結局，大家早早坐定等睇。
42.《艾曼妞》
以大量性愛藝術掛帥，大膽尺度衝擊全球，為情色片鑄下里程碑。狄波拉都做過《香港艾曼妞》。
Lam評語：細個點會睇呀？
43.ABBA
瑞典四人組合，名曲無數，但以《 Money, Money, Money》最絕，阿婆都識講：「蚊你」。
Lam評語：當年聽ABBA組合，又係因為金唱片頒獎禮，主持例牌食字將ABBA講成「阿爸」，有啲爛Gag！
44.《青春火花》
勵志日劇，女學生死鬥爛鬥打排球，蘇由美鬼影變幻球一出風起雲湧。東洋魔女熱潮由此而來。
Lam評語：首播時好細，我有印象都只不過係睇重播，主題曲VICTORY當然經典，片頭那些黑白剪影一樣令人難忘，鬼影變幻球同移形換影都好深刻！ 其實印象更深的是《排球女將》，最記得女主角成日玩倒樹葱，離心獨劈同鬼影旋風球當然記得，更記得女主角咁矮，點做大鎚手呀？
45.《跳飛機》
兒童節目掌門人 Sunny哥哥彈結他教小朋友唱兒歌， 1、 2、 3到你→大怪獸嚴秋華出場細路。
Lam評語：我細個都係鍾意睇卡通多啲，《跳飛機》同《香蕉船》呢類唔多啱我，最記得《跳飛機》主持辛尼哥哥仲紅到出雜誌，後嚟換主持，由辛尼哥哥換成王愛明同黃造時，好多細路好失落添！
46.《超人》
四眼仔衝入電話亭變身飛天救世者。基斯杜化里夫超能力薪火相傳，強戰回歸是接棒的班頓羅夫。
Lam評語：電影版無睇，一睇已經係第三集，由海明威個孫女主演，不過一啲都唔好睇，反而對電視版（《神行太保》）有啲印象，片頭好似係咁講：「佢飛得快過子彈，力量大過火車頭……」，仲記得個超人好肥，有肚腩。
47.第一代黃蓉
視《射鵰英雄傳》有元祖級黃蓉米雪和郭靖白彪。「絕招好武功」被阿 Sam唱成「六嬸三太公」。
Lam評語：佳視版《射鵰英雄傳》同《神鵰俠侶》主題曲都好搞嘢！不過兩齣都無乜感印象，只係知道報紙對於米雪做黃蓉讚不絕口，幾乎次次都以俏黃蓉稱呼佢。
48.《猛龍怪客》
二撇雞斬柴佬查理士布朗臣，片中妻女遇害，化身罪惡判官儆惡懲奸。冷面是嘜頭，手槍是朋友。
Lam評語：無睇過！嗰陣呢類警匪片較有印象的是《密探霹靂火》，其實都無睇過，不過個名型啲嘛！
49.《星仔走天涯》 VS《飄零燕》
老人與小孩擔綱的戲目向來催淚；去到天腳底都要搵老竇的星仔，迷途迷途小孤燕凱迪亦然。
Lam評語：印象中《飄零燕》成日講海迪同彼得通山跑，咁就一集，至於《星仔走天涯》開頭Sell立體，不過我哋專登換個立體眼鏡睇，老實講真係唔多覺囉！兩首主題曲都好經典！而家都仲識唱。
50.《花王俱樂部》
主持胡章釗問觀眾：「你要獎金定獎品？」要錢即攞，要獎品呢？「台上嘅嘢一隻手攞晒！」爽！
Lam評語：有睇，不過無乜感覺。
51.《鏗鏘集》
經歷風霜洗禮，議事論事依然鏗鏘有聲，以逾 1,000集榮登本地最長壽新聞紀錄片電視節目。
Lam評語：細個點會留意呢類時事節目吖！
52.《神探俏嬌娃》
靚女偵探一接波士電話即查案，一代性感偶像花拉科茜代表作。但誰想到她與 MJ同日結束傳奇。
Lam評語：最記得都係譚炳文既配音：「早晨呀！三位靚女！」
53.《無敵鐵金剛》 VS《神奇女俠》
未來戰士未出世時，有個左眼、右手、雙腳機械化的鐵金剛早已蒲頭；神奇女俠巾幗不讓鬚眉。
Lam評語：《蘋果》又寫錯啦！那齣叫《無敵金剛》呀！當年好多人睇架！至於《神奇女俠》就一般啦，位女主角係美國小姐，不過大大份，一啲都唔靚。
54.《鐵金剛》電影系列
007始祖辛康納利及羅渣摩亞美女名車多，繩索槍、飛行器、訊號彈等武器更多。
Lam評語：當年真係好鍾意，仲儲埋好多剪報，由第一集片名背到最新一集，每位占士邦特點倒背如流，不過真正睇第一齣邦片係《太空城》，都已經80年代囉。
55.新浪潮導演
許鞍華《投奔怒海》、徐克《蝶變》、嚴浩《咖哩啡》，余允抗《山狗》中莊靜而濕身透點嘩一聲！
Lam評語：細個無咁快識呢類戲，但一聽新浪潮個名真係覺得好型，呢幾套戲，最後只係翻睇過《山狗》，莊靜而嗰幕又無乜感覺喎！
56.《保鑣》
無綫首批配音國語劇。每集高潮位總有程咬金大叫「咪住！」即時扭轉局勢又得，唔轉亦得。
Lam評語：細個已經覺得套劇好無聊，講多過做，好少睇。
57.《少年十五二十時》
半唐番賈思樂、露雲娜孭飛的偶像劇，賈思樂草地踩單車一派青春無悔，杜琪峯演他同學才爆。
Lam評語：以前都幾鍾意睇，覺得主角生活好鬼中產。
58.《深喉》
匠心獨運的情色片，描寫女主角的敏感部位只限喉嚨， mmm……畫公仔唔使畫出腸喇啩？
Lam評語：細個點會睇呀？
59.《 Hello夜歸人》
聲色犬馬佳視節目，由陳維英和盧遠主持；其後麗的接手，還魂版《貓頭鷹時間》同樣吸引。
Lam評語：《 Hello夜歸人》無睇過，後來佳視執咗，麗的諗住翻炒，點知因為版權問題，好似出咗幾集就改名《貓頭鷹時間》，可見以前幾求其，不過我又幾鍾意睇喎，好過睇《歡樂今宵》吖！當年播出時間好似係11點左右，已經覺得好夜，而家，仲睇緊新聞呀！
60.李龍基 VS大 AL
基哥豪情高唱《巨星》竄紅；大 AL張武孝沙聲唱盡市井心聲「鬼叫你窮咩，頂硬上！」
Lam評語：兩位都唔係我鍾意既類型，有啲草根味。
61.Billy Joel
去年在港開騷奮力 rock，鐵漢柔情又有《 Honesty》、《 Piano Man》。他自嘲阿伯，實情殿堂。
Lam評語：呢位當年真係無乜印象。
62.陳秋霞
最年輕的金馬影后，籲離毒海的《罌粟花》唱到街知巷聞。 70年代偶像的正氣叫當下關 Jill汗顏。
Lam評語：當年真係覺得佢幾得架，笑容又好，又有氣質，歌藝唔算好勁，才華取勝，最喜歡的不是《罌粟花》同《點解手牽手》，而係《六月天》。
63.繆騫人
這位 76年最上鏡小姐有靈氣又會打扮，時裝人黎堅惠讚她是個一早懂穿 YSL和 Chloè女藝員。
Lam評語：當年已覺得佢好有氣質，好有型格，同一般小家碧玉式的女主角完全不同，老土啲講，係展現新時代女性的面貌。
64.《梁天來》
阿婆口頭禪，慘得過梁天來？陳振華演繹凄凉至極，遭縱火滅門、七屍八命。慘爆！
Lam評語：由細到大都好怕睇苦情戲（所以我對韓片麻麻），呢齣無乜點睇，不過主題曲中間幾句都仲記得。
65.阿燦
Lam評語：《網中人》睇下唔睇，無乜感覺，不過阿燦食包個幕就睇到！
66.四朵金花
Lam評語：首歌其實幾老土，不過真係幾易上口。
67.《神犬拉茜》
Lam評語：有睇過，不過可能我唔係太鍾意狗啦，無乜感覺，成日見隻狗跑嚟跑去，又唔覺幾好睇喎。
68.草蜢仔金貴祥
Lam評語：武打好渣，成日回憶少林高僧同男主角講嗰啲懶有哲理的對白，其實都幾惡頂。
69.《家燕與小田》
Lam評語：好少睇！
70.盲俠 VS小旋風紋次郎
Lam評語：兩套都有睇，但印象不深，反而對於《斬虎屠龍劍》同《柳生十兵衛》較有印象，《斬》劇男主角成日推住BB車，真係好特別！《柳》劇男主角係千葉真人，單咗一隻眼，又係型到爆。
71.海底隧道通車肥肥揭幕
Lam評語：當年海隧通車我又無乜大感覺喎，可能我好少過海啦！反而地鐵通車對我影響大啲，初初只係開通咗石硤尾到觀塘嗰段，家父仲帶我哋專登坐巴士去試搭添。
72.《小甜甜》
Lam評語：記得三樣嘢，一，安東尼墮馬瓜咗，二，小甜甜後嚟識咗個做話劇既男子，本來兩情相悅，但男仔為咗報答另一位救過佢既女子，只好同小甜甜分開，三，小甜甜可以一手將蘋果劈開，好勁！
73.The Carpenters
Lam評語：當年唔係好識，後嚟先發覺好多好歌嚟自佢，那時最有印象係女主音患厭食症，瘦到得棚骨，好恐怖，可能係我第一次聽過呢種病。
74.朱維德
Lam評語：細個對佢又無乜特別印象喎！
75.《每當變幻時》@薰妮
Lam評語：當然識唱，而家覺得好歌廳Feel，仲鍾意改成「每當變硬時」。
76.《天地雙龍》、《電腦奇俠》
Lam評語：兩套都係「賣飛佛」，《電腦奇俠》攞住結他好鬼型，個奸角乜鬼博士成日會吹苗，一吹電腦奇俠就頭痛，跟住怪獸會乘機攻擊佢，然後誤打誤撞（例如用泥埋住電腦奇俠），令電腦奇俠聽唔到苗聲，咁就無事，都幾搞嘢！至於《天地雙龍》可能係少數主角超人唔會變番做人既特攝，仲識變車變飛機，好過癮，主題曲我而家都仲背得出：「為達願望萬惡好比猛獸，野心永無盡妄想侵佔地球，毒辣、邪惡，機械人，殘忍兇險透……」
77.《往事只能回味》@尤雅
Lam評語：當然聽過，但咁細個邊會鍾意呢啲歌吖！
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
