上回談了80年代，接著蘋果便再講90年代。那是我讀大學、出來工作的年代，那是我最活躍的時代，大部分難忘的經歷都來自這個階段，我懷念80年代，但同樣懷念90年代，一個香港步向衰落的年代。
以下為蘋果之介紹，後面是我的評語。
1.四大天王
張學友、劉德華、黎明、郭富城，黎明賑災獻唱「我又怕心難死」轉 key勁走音，還有城城金句： 30歲前唔失身。
Lam評：對於四大天王，我基本上都不算忠實粉絲，較喜歡的是張與郭，一個唱得一個跳得，張的《真情流露》又真係幾乎首首都好聽，至於最受歡迎的劉天王，老實說我不太欣賞。
2.玉女
要長頭髮。唱功毋須好但五官要精緻。掌門人有周慧敏和楊采妮，受歡迎程度還看 Yes卡和信和賣相指數。
Lam評：我從來未喜歡過周，最記得《如果你知我苦衷》MV，周騎著飛馬，有點搞笑！楊采妮反而較有好感，最記得當年看李克勤的《紅日》卡啦OK，就是楊當主角，有點驚為天人，當年她的英文名好像還是Michelle。
3.周星馳
憑精奇骨格闖影壇，角色名大多叫阿星。越紅越寸， 96年演寸爆食神史提芬周，唔扮嘢做自己。
Lam評：基本上周星馳所有電影一出，即刻去睇！甚至在午夜場便已爭著先睹為快。早期較喜歡《賭俠》，中期最愛是睇一百次都仍然笑得出的《國產零零漆》，後期則是《食神》。不過也看過不少爛片，比如《破壞之王》、《行運一條龍》都甚失望。
4.王家衛
91年憑超班作《阿飛正傳》攀高峯，上映當日王家衛驚到要老友劉鎮偉在 cafe陪坐天光。
Lam評：他第一部導演的作品《旺角卡門》沒在戲院看，首次看他的作品是《阿飛正傳》，還是甚心急地看午夜場，等極都等唔到梁朝偉出場，點梁一出即完場，簡直全場嘩然，不過我又幾鍾意喎！後來看《重慶森林》，還是充滿神采，但《東邪西毒》開始，覺得王開始作狀了，《2046》最令人失望。
5.《大時代》
方家三兄妹與四隻蟹被掟落街，玲姐瀕死尋戒指……最後慳妹隨着紅絲巾飄飄，離開紅河村了。
Lam評：記憶中劇集初段我沒有看，到了中段開始才發現這齣破格的劇集，由鐵索連舟到「咁多人死唔見你死」都令人拍案叫絕。當然「大奇迹日」都甚經典！
6.王菲
改名王靖雯乘《尾班車》來港，改搭尾班機赴美學藝。學成返港做番容易受傷的女人豆泥嫂。
Lam評：絕非吹水，當日王菲以王靖雯之名出道時，我已覺得她甚有潛質，但初時她半紅不黑，還擔人又一人才給埋沒，幸好一首《容易受傷的女人》救了她，但令香港樂壇傳奇延續多十年。
7.王傑
越「嬲幽」癡女越狂。初來港蓄短髮尚算乾淨，《誰明浪子心》奠定浪子形象，齋唱悲歌。
Lam評：最喜歡他的《幾分傷心幾分痴》，不過愈聽愈發覺他的歌曲首首一樣，聽一首就等如聽晒所有歌。
8.林志穎
17歲台灣小旋風林志穎，愛穿 Body Glove及勁厚 shoulder pad，髮型勁似城城。
Lam評：從來，從來沒有欣賞過他。
9.金牌監製鄧特希
開拍《壹號皇庭》教你品味生活，閒來落 bar， 98年《妙手仁心》再斬四両，開始走火入魔。
Lam評：我都上過鄧特希教的編劇課程，感覺上他是有料之人，當時他在堂上便講過正構思一齣律師劇，後來才知道是《壹號皇庭》，不過此劇沒有多看，反而《妙手仁心》還算看過。
10.師奶殺手
師奶癡戀電視小生。高檔有西裝形羅嘉良，平民化有型警陶大宇，書生形有吳啟華。任君選擇。
Lam評：記憶中當年都有追看陶的《刑偵》，反而對吳印象麻麻！有趣的是，兩位早年都演過三級片。
11.台灣歌手
香港偶像派被台灣幫殺得片甲不留。陳淑樺、伍思凱、張洪量、優客李林，教你聽歌學國語。
Lam評：當年最愛買音樂工廠的雜錦碟，亦曾買過周華健、庚澄慶的CD，其他雖沒買，但總會朗朗上口，當中最喜歡的就是庚澄慶和趙傳。
12.《還珠格格》
瓊瑤劇和亞視在港幾十年都紅不了，小燕子和紫薇格格卻打破悶局，來港宣傳 fans更逼爆玻璃。
Lam評：一集都無睇過！
13.鄭秀文、許志安
緋聞比愛情更經得起時間考驗。許鄭華星地下情由 92年《其實你心裏有沒有我》唱到現在。
Lam評：當年真係超鍾意《其實你心裏有沒有我》，但之後的《非一般愛火》就認真麻麻。二人也是卡拉OK熱播之選呢！一位女同事唱鄭還唱得幾似呢！
14.《午夜凶鈴》
一盒錄影帶，睇完就會離奇死亡，最經典係貞子會喺電視度爬出嚟，仲有人睇完部戲之後嚇死咗。
Lam評：當年個個都話好恐怖，睇落又唔算好驚啦！最恐怖係播番錄影帶片段個度，反而個電視爬出嚟又頂得住喎！
15.《天若有情》
華 Dee與千金 JoJo之戀震撼 MK，穿上婚紗騎電單車踏上最後一程……主題曲插曲同樣催淚。
Lam評：後嚟睇錄影帶睇番，歌曲比電影出色。
16.木村拓哉
木村憑《悠長假期》、《戀愛世紀》等日劇攻陷香港，水晶蘋果更成為冧女的最佳禮物。
Lam評：《悠長假期》的確頗感人，但《戀愛世紀》就始終投入不了，後來覺得木村在電視劇中太過自覺了，太過懶型仔，欠缺了自然的感覺。
17.卡拉 OK
怎能忘記飛圖台柱梁雁翎？《像霧像雨又像風》晚晚播，長髮飄飄娘味十足，仲有異國風情伴碟。
Lam評：最記得早期在山林道的卡啦OK，要自己出去揀碟，有些則要在台上面對其他顧客。那些MV，寶記的拍得不錯，飛圖就真係有點無厘頭！總是影住男女喺沙灘之類行來行去，求其到吖！
18.煲日劇
老翻 VCD興起，由柴門文《東京愛的故事》開始，日劇迷大嗌：《上帝！請給我多點時間》。
Lam評：直到現在，還未正式看過《東京愛的故事》，不過日劇水準的確比港劇高得多，而且種類較多。當年比較喜歡的是鈴木保奈美的《新聞女郎》。
19.《 X檔案》
觀眾全情投入跟莫探員與郭探員追尋不可思議外星生物奇異事件，還真以為戲外兩人是恩愛夫婦。
Lam評：史提芬很喜歡此劇，我則一般，記憶中沒有太認真地看。
20.《超級無敵獎門人》
超級無敵估歌仔、馬拉松、乒乓波……玩足 14年，獎老曾志偉冇高過，遊戲冇變過。
Lam評：早期仲覺得幾過癮，後來愈做愈公式，愈來愈不喜歡。
21.《真情》
善姨好姨容姨叉燒炳。張慧儀死而復生，雙雙忍痛讓愛兼送仔。我至鍾意都係 MayMay同低 B瓊。
Lam評：好少睇，超級煽情之作，不過應該好過《皆大歡喜》。
22.《包青天》
何家勁翻生之作。包大人金超群為尊重此角宣佈暫停行房，一禁就禁足 2百幾集。
Lam評：無乜睇喎！那時甚少留在家睇電視呀！
23.肥師奶
由棄婦變女強人，陳秀雯以精湛演技感動萬千師奶，多年後輪到劇中好姊妹鄧萃雯做師奶兵團。
Lam評：係呀！我連呢套都無睇過。
24.《長腿叔叔》
唐韋琪一曲走天涯。細個希望像茱迪一樣寄宿唔使俾父母管，大個梗希望真係有個長腿叔叔啦。
Lam評：卡拉OK經常有人點的一首歌，不過我一集都沒看過。
25.《侏羅紀公園》
史提芬史匹堡代表作之一，恐龍栩栩如生，擘大口嚇親不少觀眾。全球票房狂收順勢拍多部續集。
Lam評：當年勁難買飛，幾經艱苦先買到第三行，後面仲要係班靚妹，恐龍未出已經大嗌，我好似聽緊身歷聲咁，幾慘！
26.《古惑仔》
細細粒與陳浩南，浪漫悲情。「呢度我話事！」殺入銅鑼灣。現實中伊健因演得太神似失去不少工作。
Lam評：睇過好多集，但沒有一集是在戲院睇的！其實覺得拍得麻麻，一開始總係講到對手神通廣大，點知轉個頭陳浩南就反敗為勝。鄭伊健剩係識擺個懶型既樣，都係阿叔做得好。
27.和記廣告
黎明換過 N個阿 May，其中一個係童愛玲。金句如「有緣嘅話，我哋會再見」。
Lam評：童愛玲那個版本當然經典，但我最喜歡的是《你這剎那在何方》，講黎明隻身去了美國，天寒地凍收到母親電話，十分感人，可惜沒有女角，所以出了一會便轉了另一個，你話香港幾可悲！
28.《 Beach Boys》
反町隆史（左）和竹野內豐（右）鬥剝衫的日劇《 Beach Boys》堪稱經典，當年和木村三分天下。
Lam評：無完整睇晒，不過我都唔否認反町隆史同竹野內豐真係好型仔！
29.《表姐你好嘢》
神奇公安鄭碩男動輒出槍，春情勃發又要扮矜持，瞓水床以為鬼上身，唱歌唱爆杯，仲封埋影后。
Lam評：呢套我有睇，不過係喺紐約唐人街既戲院睇，幾好笑，表姐同國民黨老兵鬥酒一段最有趣。
30.Take That
港女必迷的英國男子五人組，隊中最唔突出的 Robbie William 96年單飛卻成了樂壇巨星。
Lam評：奇怪！我記得New Kids on the Block、Boy Zone同Backstreet Boys，但硬係對Take That無印象。
31.解剖外星人
當一班儍人對着一個假人解剖解足一星期成為高收視節目，無綫嘅《城市追擊》有慾海肥花控訴被姦都唔出奇。
Lam評：當年亞記因為呢套嘢收視大勝，送每名員工一塊金牌，我都有幸攞到，擺到而家。不過套嘢原來係世紀謊言，最衰係亞記拖長嚟做既離譜搵笨剪輯方法，簡直叫人睇到爆粗！
32.奇洛李維斯
來來去去得一號表情，但勝在靚仔角色又有型，造就電影《生死時速》和戲中所戴的 G-shock手錶。
Lam評：《生死時速》我都有入戲院睇，套戲拍得好緊張，但我始終不是奇洛粉絲，亦無因此買G-Shock，不過至今未睇過《不羈的天空》，始終係遺憾，不因奇洛，只因已離世的李華馮力士。
33.寶麗金三小花
（左起）湯寶如、劉小慧與黎瑞恩三大玉女。當年三小花今日最愛攻四方城。
Lam評：三小花之中，我唯一買過碟既係湯寶如，其他兩位沒甚感覺（唔通你覺得我會買《急色鬼愛出位》咩？）
34.葉玉卿
冰後藏着軟肉溫香，葉玉卿出位路第一招。第二步拍三級片兼出唱片，之後殺入電視從良。
Lam評：老實講，我真係睇過《我為卿狂》，其實製作水準好低！最記得不是葉，而是臨尾的曹查理與川上麗奈，同事仲記得後者不斷大嗌：David……
35.寫真熱
胴體熱浪襲九十年代。天使徐若瑄與舒淇，攞命有李莉莉，嚇人有徐錦江，最認真竟也是他。
Lam評：我一本都無買過喎，不過宮澤里惠幾張經典相片，總會看過的。
36.海潮
變態版《長腿叔叔》，海潮溫碧霞無論泰山裝或大領衫，統統變斜膊衫晒香肩附送心形嘴。
Lam評：從來不覺得溫碧霞靚，一集都無睇過。
37.火車鬧鬼廣告
小孩玩火車玩玩吓多咗個，嘴角又多笪血迹。有傳他們拍攝九鐵廣告後失蹤，每聽到火車的響按聲，都會想起他們。
Lam評：無聊的傳言！不過因為呢個傳言，到今日對那廣告仍有印象。
38.黎姿
《白恤衫》內藏愛美神飛彈，《你是明日意義》凸顯她的單薄唱功，難怪演戲較易令人接受。
Lam評：從來不是我那杯茶！
39.林夕 VS黃偉文
兩大填詞人寫盡 90年代男歡女愛。黃偉文當年憑《你沒有好結果》一鳴驚人，越填越勇。
Lam評：兩位的詞作都值得慢慢細味，說90年代比不上80年代，在填詞界恐怕是錯的。
40.合唱歌
《相思風雨中》、《現代愛情故事》、《相逢何必曾相識》──張智霖、許秋怡更傳出緋聞。
Lam評：呢幾首歌都經常喺卡拉OK唱！
41.《男兒當入樽》
別說晴子，單看流川、櫻木對籃球的熱誠，一股熱血正在燃燒，即刻要落街轉身射個三分波！
Lam評：唯一一套漫畫，我係等佢一出即刻仆出信和買，仲未出的話，就等到出為止，然後眾人排住隊買，好壯觀！買完即刻搵間快餐店坐低睇完仲要不斷翻睇，可惜，最後有點爛尾！期待櫻木可以同森重寬對戰！
42.《 Especially For You》
每日放工放學，都會聽到電台熱播 Jason Donovan與 Kylie Minogue這首合唱 love song。
Lam評：對兩位都無乜感覺！那時男歌手比較喜歡Rick Ashley，女的喜歡Tiffany。
43.《無人駕駛》
「喂，我打通咗呀？阿邊個，我……」嘟一聲，唔好意思，因為你爆粗。商台晚間節目，任你噏冇主持。
Lam評：無聽過！
44.飯島愛
有「 T-back女王」的稱號，成為首位成功打入藝能界殿堂的 AV女優，可惜紅顏薄命。
Lam評：其實我有無睇過佢既作品呢？好似無乜印象喎！
45.周華健
情越濃越會化不開，香港仔台灣成名，光榮回歸，唱作皆能，氣勢直逼四大天王。
Lam評：我都有買過佢兩隻CD架！不過後嚟覺得佢唱嚟唱去都係咁，就無再買。
46.傳記片
呂良偉增肥 40多磅拍《跛豪》勁收，掀起風雲人物熱，藍江傳雷洛傳新哥傳奇陸續出籠。
Lam評：《跛豪》真係拍得幾好，好多場面而家都仲記得，包括鄭則士掌刮葉子湄個胸。不過之後既雷洛、新哥，雖然有睇，但就真係麻麻！
47.《新不了情》
當廟街歌女遇上霉音樂人，靚靚和青雲狂放催淚彈，靚靚的死此刻我仍揦住揦住。
Lam評：感人，拍出了廟街的風情！自此喜歡爾的電影。
48.碧咸與辣妹
萬人迷球星離奇娶了當紅女子組合 Spice Girls成員 Victoria為妻，令萬千少女心碎。
Lam評：我喜歡看碧咸踢波，但從不喜歡Spice Girls，亦只記得她們一首歌。
49.《風雲》
馬榮成漫畫，曾改編成電影，鄭伊健飾演聶風，郭富城扮步驚雲。人人褲袋梗袋一本，潮流標誌。
Lam評：開頭馬榮成離開玉郎時，都有買嚟睇，仲有買埋精裝本添！不過後來愈睇覺得愈差，古仔不知所謂，個人認為以故事論，《刀‧劍‧笑》好得多。
50.湯漢斯 VS丹素華盛頓
兩個 90年代多產荷李活巨星兼票房保證，湯漢斯連續兩年封影帝。兩人曾合作電影《費城故事》。
Lam評：《費城故事》無睇過，不過兩位主演既電影，又真係睇唔少，《阿甘正傳》過癮又感人，丹素最喜歡既係《紅潮風暴》，我到而家都仲記得首潛艇叫阿拉巴馬號。
51.《人鬼情未了》
男女主角玩搓泥的場面固然經典，主題曲《 Unchained Melody》亦成為金曲。
Lam評：無入場睇，都係喺電視定錄影帶睇番，感覺唔大，不過短髮狄美摩亞真係幾索！
52.松松姐姐
就算是 80後，都是聽松松姐姐的兒歌長大的。《烏卒卒》、《小白船》等等，多麼懷念這些兒歌呀！
Lam評：無感覺！
53.《強姦》系列
三級片成風，《強姦》系列馬德鐘舐朱茵面珠令人毛管戙，王晶也打造《赤裸羔羊》邱淑貞。
Lam評：好似一集都無睇過，不過朱茵既《制服誘惑》無睇過都聽過，佢真係好得！
54.Marlboro Red Hot Hits
萬寶路贊助唱片公司炮製合唱歌，華星《火熱動感 lalala》鬥寶麗金《熱力節拍 wo bum ba》。
Lam評：當年華星既《火熱動感 lalala》真係好經典，未出已經期待，《熱力節拍 wo bum ba》無得比。
55.林憶蓮 VS葉蒨文
梅艷芳引退，兩女各領風騷，當年《愛上不回家的人》惡鬥《祝福》，憶蓮輸咗最受歡迎女歌手。
Lam評：其實葉蒨文有一兩首歌都幾好聽，不過同林憶蓮比，我梗係鍾意林多好多啦！可惜林硬係無機會攞勁歌最受歡迎女歌手。
56.美琪賴恩
憑《90男歡女愛》成為 90年代的愛情片天后，《一切從失戀開始》、《緣份的天空》一樣勁冧。
Lam評：佢唔算靚，但係傻大姐Feel又真係幾吸引！不過直到今日，我仍然未完整睇過《90男歡女愛》。
57.曉格蘭特
94年憑《四個婚禮一個葬禮》奠定影壇地位，翌年與黑人妓女當街發生車震事件，成為全球笑柄。
Lam評：《四個婚禮一個葬禮》到而家都未睇，不過之後幾齣輕喜劇都唔算！最難忘《摘星奇緣》中佢扮記者個幕，仲有《真的戀愛了》扮首相！ BJ扮鹹濕上司都好啱佢，《冧歌有情人》扮過氣歌手，單係開頭個MV已經笑不停。
58.《鐵達尼號》
Jack和 Rose在船頭張開手，和「 You Jump,I Jump」的對白被抄到爛。
Lam評：經典中的經典，我當日等咗成個月去買飛，仍然要坐得好前好前！
59.《本能》
就算當年號稱荷李活最昂貴的電影劇本，也震撼不過莎朗史東在鏡頭前蹺腿的真空演出。
Lam評：其實我又唔覺好好睇，甚至有啲悶，好彩中間有啲「激戰」咋，唔係可能瞓著咗咯！最記得莎姐喺差館食煙個幕。
60.茱莉亞羅拔絲
90年的《風月俏佳人》令大口茱麻雀變鳳凰，勁有觀眾緣，成為 90年代電影票房當紅炸子雞。
Lam評：我又唔覺佢靚喎，美國人口味同我哋唔同啩。
61.《虎膽龍威》
89年的《虎膽龍威》令布斯韋利士成為港人熟識的動作巨星，之後的二、三集一樣大收。
Lam評：當年我同學推介呢套戲，咁咪跟佢入場睇，點知真係咁緊湊，絕無冷場，睇完全場自發拍手。
62.占基利
《神探飛機頭》令占基利被封西洋版周星馳，連星爺的《百變星君》也向其《變相怪傑》取經。
Lam評：當年睇《變相怪傑》，覺得好好睇，占爺勁過癮，跟住咪租番《神探飛機頭》，先發現佢千遍一律，無乜變化！最失望係佢扮謎妖，又係咁既款，直到後嚟佢轉型拍《Truman Show》、《娛人先生》同《無痛失戀》，先至有啲改觀。
63.吳剛
每年《歡樂滿東華》，吳剛師傅食炭飲滾油心口碎大石，全身油令令，不過好多人懷疑係假。
Lam評：無聊炒作！
64.《 Yes!》雜誌
因為電台節目《三個寂寞的心》誘發而誕生，《城市驚喜》吸引萬千少女狂影沙龍博刊登。
Lam評：一期都無睇過！
65.《我和殭屍有個約會》
「臨，兵，鬥，者，皆，陣，列，在，前，諸邪！」驅魔龍族後人馬小靈忍着一泡眼淚捉殭屍。
Lam評：其實無完整睇晒！中間有啲橋應該係抄日本動漫，不過又抄得幾好！
66.《尋找他鄉的故事》
熟悉的音樂配上鍾景輝的旁白，觀眾便能感受到海外華人的艱辛。亞視節目終於發威。
Lam評：我都睇咗好多輯，其實有啲作狀（尤其係以色列、撒拉熱鍋嗰幾集），誠意搭夠。
67.《陰陽路》系列
《陰陽路》開闢發財路，導演由邱禮濤變南燕，首部勁賺 6百萬到越拍越爛，龍婆與你常在。
Lam評：蘋果寫龍婆，其實龍婆是來自《七月十四》系列，我也喜歡那系列多一點，對雷宇洋拍的電影感覺麻麻！
68.濱崎步 VS宇多田光
一個形象百變，一個靚聲日式 R&B，專揀同日出碟硬撼銷量，令 J-Pop音樂推向巔峯。
Lam評：兩位都無乜感覺，要揀我都係揀宇多田光，濱崎步整到作個公仔咁，有啲假！
69.《笑聲救地球》
乜太廖偉雄與小李胡大為用笑聲拍板追打黃一山，竟招來觀眾投訴虐待童工，真係笑聲救地球。
Lam評：我又唔覺好好笑喎，淨係識擺個笑聲拍板係咁拍，硬滑稽！
70.安室奈美惠
以 4吋高踭長靴加勁舞成為金漆招牌，黝黑皮膚金髮幼眉更令少女爭相模仿。
Lam評：嗰陣都好少聽日本歌，無乜大感覺。
71.李麗珍
Lam評：好索咩？我又唔覺喎！
72.狗仔隊
Lam評：改變香港傳媒歷史！
73.黃飛鴻系列
Lam評：頭兩集都好好睇，但之後就愈拍愈差，愈拍愈將黃飛鴻神化！
74.小室家族
Lam評：其實我都鍾意葉佩雯架！可惜星運平平！
75.美少女戰士
Lam評：你估我會睇咩？
76.Bjork
Lam評：王菲都抄佢！不過無乜點聽！
77.彭丹
Lam評：除咗上遊戲節目，仲有乜做？
78.張立基
Lam評：佢既《Electric Girl》同《你好嗎》都好正架！
79.《陀槍師姐》
Lam評：無乜點睇！關咏荷仲好少少，一換咗蔡少芬更加無興趣！
80.麥嘜
Lam評：無乜點睇！近年睇過真人版的《春田花花幼稚園》，都唔知套戲講乜鬼！
81.鐵達時廣告
Lam評：真係好經典，經典到傑斯都拍過。
82.無綫台慶頒獎禮
Lam評：閂埋門自己玩既頒獎禮，真無聊！
83.《蠟筆小新》
Lam評：幾過癮！
84.《新世紀福音戰士》
Lam評：無睇過，亦對鈴波麗既身材無乜興趣。
85.New Kids on the Block
Lam評：當年我去紐約，周街佢哋既產品，超勁！可惜好快就失咗蹤！
86.Grunge Rock
Lam評：乜嚟架？
87.K-swiss
Lam評：好似無擁有過喎！反而儲過Swatch！
88.《金田一少年事件簿》
Lam評：無睇漫畫，動畫同真人版就睇過，推理其實幾渣，不過勝在夠懸疑，最記得 Mr redum同詛咒武士。動畫版OP同EP都好好聽。
89.Visual Rock
Lam評：乜嚟架？
90.《寵物小精靈》
Lam評：過咗睇呢類動畫既年紀咯！
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
