上星期《蘋果日報》刊登了篇〈我們的80年代〉，即時令我的懷舊症發作！我從不否認自己是成長於80年代，亦不以此為恥！反而為那些沒經歷過80年代的年輕一代可惜，他們沒機會經歷一個如此有個性的年代，實在是遺憾！
以下是蘋果的排名，後面是我的評語。
1.米高積遜（ Michael Jackson）
名曲《 Billie Jean》、《 Beat It》到《 Thriller》喪屍舞再到招牌 moonwalk，帶起當年 MTV文化。
Lam評：最喜歡《Billie Jean》，到現在我還記得那個MTV。
2.麥當娜（ Madonna）
由《 Crazy for You》、《 Like a Virgin》到《 Like a Prayer》盡展性感、野性、反叛形象，不少男士的女神。
Lam評：開頭覺得佢扮瑪莉蓮夢露，反而後來走出自己的路，《Crazy For you》幾好，後來《Vogue》更好，我仲憨居居入場睇《In Bed with Madonna》，懶係真人Show，而家諗起得啖笑！
3.譚詠麟
85年大碟《愛情陷阱》年度銷量逾 40萬，《勁歌》最受歡迎男歌星四連霸， 88年宣佈不再攞獎。
Lam評：從不是他的粉絲，不過他那《霧之戀》大碟幾乎首首好聽，他主演的《陰陽錯》也是我的最愛（雖然我喜歡是因為倪淑君而已），《幻影》一曲至今仍是賣飛佛！
4.張國榮
83年憑《風繼續吹》走紅，與譚詠麟平分天下。 89年退出樂壇， 97年復出，惜於 03年自殺。
Lam評：由於愛挫強扶弱，所以我一向捧張，也多次看他的演唱會，最愛他的《側面》。
5.梅艷芳
新秀出身，梅艷芳由出道是非不絕，到唱功備受肯定的百變天后，整個 80年代，都屬於阿梅的。
Lam評：我自己買的第一盒帶就是梅的《壞女孩》，不過她跌得很快，其後幾隻碟感覺都一般。
6.周潤發
發哥形象萬變，爛撻撻木嘴輝、船頭尺手到拿來，梟雄如許文強、高進亦無難度。
Lam評：那個時期，幾乎有他的戲我都會入場睇，那年那爛身爛勢上台拿最佳男主角一幕仍然難忘（憑《英雄本色》），最愛還是《秋天的童話》，不過唔知點解，睇漏了《龍虎風雲》。
7.《 430穿梭機》
兒童節目， 82至 89年準 4時半啟航，主持有譚玉瑛、張國強及《黑白殭屍》周星馳龍炳基等。
Lam評：幾乎日日睇，但如今回想，那些扮在太空冒險的情節認真求奇！當中的卡通水準也一般，《宇宙大帝》、《戰士高迪安》等都麻麻，《黃金戰士》同《小雙俠》又不是我那杯茶，較有印象是《千年女王》和《小忌廉》，當然還有《叮噹》，還有不少歌曲很難忘，如今仍會上Youtube重搵《共享陽光》。
8.Beyond
以黃家駒為首的樂與怒班霸，推出首張EP《永遠等待》， 89年憑《真的愛妳》大熱，諷刺時弊直抒胸懷。
Lam評：沒話說，最喜歡的樂隊，當年都試過買飛去高山同新伊館睇他們的演唱會，遺憾沒看四子時代在紅館的演唱會，最愛是早期那幾隻碟及後來華納的兩隻。
9.五福星
洪金寶、岑建勳及馮淬帆等主演電影《奇謀妙計五福星》，狂收逾 2千萬，開創福星系列，每集必有靚女花瓶被博懵。
Lam評：《奇》片幾好笑，最記得吳耀漢以為自己隱形嗰段，《福星高照》沒看，但唔知點解都記得曾志偉叫香腸同講潮州話「床前明月光」，不過到後期《夏日福星》開始便不太好看了。
10.《省港旗兵》
麥當雄執導、以大圈仔來港「做世界」為題材，片末九龍城寨警匪槍戰戲成同類電影典範。
Lam評：只在電視看過一點點，沒甚印象，反而對真正的「省港旗兵」，如葉打劫金舖更有印象。
11.《打電話問功課》
港台節目， 85年推出，返學日有教師專責聽電話，聽足 6小時，有半小時電視直播。小時最愛打去睇吓熱線通唔通。
Lam評：哈哈哈！我使問人？！
12.五台山
港台、麗的、商台、無綫及佳視雲集廣播道，故稱五台山。風雲人物有靚絕五台山的藍潔瑛。
Lam評：讀書時代甚少到五台山，連喺邊都唔多知，第一次是讀預科時去考察，去到港台參觀，見到DJ正在訪問剛剛出道的倫永亮，倫還說很有信心，因為他這隻新碟水準新高云云，真係坦白得可愛！當然點都估唔到，後來我會在五台山工作。
13.五虎將
83年（左起）黃日華、劉德華、梁朝偉、湯鎮業及苗僑偉合演心口碎大石，被戲稱五虎。
Lam評：以前睇無線必定睇到佢哋，最喜歡還是梁，他拍《新紮師兄》同《鹿鼎記》都好生鬼，其他四位則一般啦！
14.開心少女組
齋賣青春。黃百鳴發掘（左起）陳加玲、袁潔瑩同羅美薇拍《開心鬼放暑假》，及出碟搵快錢。
Lam評：從不喜歡她們，扮日本妹，又唔夠人哋靚，反而早期的羅明珠好啲，其後成班拍過《開心鬼》的女角柴娃娃合作拍了一部片，講班女仔無啦啦去咗荒島，一個字：爛！
15.《皇家師姐》
德寶老闆潘迪生捧女友楊紫瓊做打女，片末 madam與羅芙洛勇闖毒龍潭力敵大惡人，冇威吔冇特技，確係勁。
Lam評：完全無興趣，一套都無睇，講起嚟，那個年代我較喜歡嘉禾及新藝城的作品，德寶很少看。
16.《三個小神仙》
電台節目《青春交響曲》環節，阿旦（鄭丹瑞）、珊珊（林珊珊）、嘉嘉（何嘉麗）高矮肥瘦又一 day。
Lam評：一向聽商台，很少聽港台，記憶中沒聽過他們做節目，反而看過他們做戲，講一班醫生護士（我仲記得間醫院叫聖慕能），兩個字：胡鬧！
17.Cyndi Lauper
能與娜姐分庭抗禮的美國樂壇天后，一首《 Girls Just Wanna Have Fun》唱到街知巷聞。
Lam評：《Girls just wanna have fun》和《Time after time》都甚喜歡，不過無以為繼！
18.陳百強
翩翩公子陳百強的《等》、《眼淚為你流》、《深愛着你》情深動人。可惜走得太早。
Lam評：最愛《深愛著你》和《盼望的緣份》，其聲線真的很靚，可惜唱歌唔多夠氣。
19.B.M.X.
E.T.坐 B.M.X.飛天，令人想起陶贊新當年的名曲《越野 B.M.X.》： B.M.X.仲有花式千種……
Lam評：我本來唔識踩單車，後來買咗架A貨B.M.X，踩呀踩呀，終於學識咗！
20.明菜鬥聖子
深沉有格的中森明菜與永遠 idol陽光味的松田聖子，當年在日本的激鬥，好似 90's的宇多田光鬥濱崎步。
Lam評：超唔鍾意聖子，所以寧取明菜，其實更喜歡菊池桃子和早見優，唔知而家去咗邊？
21.Duran Duran
英國新浪漫音樂代表樂隊，當年玉樹臨風的主音 Simon Le Bon迷倒不少少女。
Lam評：其MTV超落本，最難忘《Wild Boy》，拍到電影咁，不過啲歌嘛……
22.Wham!
兩俊男靠把靚聲一首《 Careless Whisper》，不少人以為成員是 George與 Michael。
Lam評：那時覺得George Michael超型仔，《Careless Whisper》（香港有三四位歌手改編過）同《Wake me up before you go go》當然好，不過《Last Christmas》更勁，而家聖誕仍有人播！
23.史泰龍
以洛奇第三集《虎威》同 Rambo《第一滴血》績集最爆，名句 No Pain,No Gain。
Lam評：洛奇第一集最好，第三集同第四集收得但愈嚟愈誇，又話蘇聯佬一拳幾多磅，但佢竟然捱得住，有無搞錯！《第》亦係第一集最好，講越戰退伍軍人既悲哀，第二集又變得誇咗，第三集我幾乎睇到瞓著……
24.Checkers
Checkers鮮明的格子衫褲打扮，人強馬壯如兄弟班的樂團，他們的經典金曲可能曾令你無心向學，又或用心學日文。
Lam評：只記得《淚之點唱》，亦從未學過佢哋著格仔衫！
25.Culture Club
明明扮成妖艷女子偏叫佐治童子（ Boy George），遊魂般高唱《 Do You Really Want to Hurt Me》。
Lam評：其實佐治童子扮女人好醜樣，只記得《Karma Chameleon》，仲記得唱「You come and go, you come and go……」
26.《好時代》
大力推介日本偶像與東瀛歐美音樂內涵兼備的本地雜誌，展示一個豁達的新時代、開放的好時代。
Lam評：哈！我都有買過架！話時話，那時雜誌買得最多是《漫周》同《A Club》，點解無講？
27.《殭屍先生》
點解閉氣可以喺殭屍面前隱形？全賴殭屍先生林正英教路。茅山術混合靈幻喜劇加功夫，抵睇。
Lam評：一集都無睇過！
28.林憶蓮
半熟少女亂摷雀巢頭大嗌「我空虛我寂寞我凍」，仲有「灰色！ hahaha， hahaha… ha…」。
Lam評：第一隻碟扮日本妹唱《愛情 I don't know》幾惡頂，點知跟住改歌路唱《放縱》，先發現佢咁掂正！一個字：型！
29.Radias
陳德彰加黃耀光，《吸煙的女人》、《傾心》、《別人的歌》， 3字頭的你，冇理由未聽過。
Lam評：黃耀光的曲太過電子化，喜歡他們的歌，大部分原因是林夕的歌詞，但最有印象的一首（《傾心》），卻不是林夕填的（是黃凱芹）。
30.《英雄本色》
英雄末路， Mark哥褸衣袂飄飄，子彈橫飛。情義背後，英雄都要型，死要死得靚。
Lam評：當年勁難買飛，我幾經艱苦以為買到，點知買錯咗《九個半星期》，都算錯有錯著……
31.《 I like chopin》
意大利歌手 Paul Mazzolini的化身，由譚校長翻唱成《我愛雀斑》令此曲更受歡迎。
Lam評：主唱的不是「傢俬舖」嗎？好像香港有多歌手都改編過！
32.《小男人週記》
鄭丹瑞聲演小男人阿寬，透過廣播劇《小男人週記》講盡男人最痛與最樂，拍電影勁賺逾千萬。
Lam評：不太欣賞阿旦，一集都無睇過。
33.《大地恩情》
劉志榮主演麗的劇集《大地恩情》收視大勝，九斤哥威過柴九，逼得無綫腰斬《輪流傳》。
Lam評：屋企鍾意睇麗的，我被逼收看，當年好唔開心，現在反而慶幸自己看過此經典！
34.羅文、甄妮
兩大巨肺於 83年以跨公司形式，合作推出《射鵰英雄傳》電視原聲大碟，二合一大頭封面堪稱經典。
Lam評：當年覺得好犀利，而家覺得好嘈，兩個鬥大聲，唔多鍾意！
35.《龍鳳呈祥賀台慶》
11月是 TVB台慶月，肥肥踩雞蛋、楊盼盼空中飛人，日頭猛做的觀眾每年都期待驚心動魄的表演。
Lam評：年年必定捕在電視前等收看，不過唔明點解要班藝員做一啲自己唔擅長的事！
36.小柏林
小柏林演港台節目《親親孩子天》，冬菇頭深入民心。 89年英國皇妃戴安娜訪港，柏林仔獻花。
Lam評：無睇！亦唔覺佢得意，個頭髮懶Cutie！
37.蔡楓華
《絕對空虛》經典，一字馬變 V字馬笑爆嘴，欷歔是當年「剎那光輝唔代表永恆」竟一語成讖。
Lam評：《絕對空虛》是經典，當年阿燦扮佢超好笑，講「剎那光輝」時我也有看，見盧敏儀之反應同佢之後沙林，更加好笑！
38.史匹堡
《奪寶奇兵》系列、《 E.T.外星人》及《太陽帝國》等電影，打造 80年代荷李活文化的翹楚。
Lam評：他導演的戲，幾乎必睇，最喜歡是《奪》片第二集！全無冷場！
39.《我係小忌廉》
日本少女動畫，戴蘊慧主唱港版主題曲。當時周街都有小忌廉支着燈魔法棒賣，好靚。
Lam評：哈！我都有睇，主題曲幾好聽！
40.周星馳
《蓋世豪俠》飲杯茶食個包，段飛無厘頭經典語錄。但真正發揚光大是《他來自江湖》的金水。
Lam評：最愛還是《他來自江湖》，一到萬個段就走開，一到佢又返電視前，不少情節對白都仲記得！
41.關正傑
關正傑，勵志歌中堅分子，還唱紅了不少劇集金曲，由麗的紅到無綫。木獨害羞形象更獨樹一幟。
Lam評：假如佢復出，我必睇！
42.《追女仔》系列
屎尿屁爛 gag及抽水媾女死橋雞精班。由《精裝追女仔》到《最佳損友》，醜男拱照靚仔加美女。
Lam評：只睇過《精》片第一集，感覺太粗俗，不太喜歡，不過一些無聊情節，我還是記得！
43.翁美玲
講翁美玲不得不數《射鵰》，俏黃蓉到今日仍俘虜不少 fans，五虎將時代御用花旦。
Lam評：那年我考會考，好像是中史前，買晚報一睇，她竟然死了，即時影響心情，好彩最後都攞A。
44.民主歌聲獻中華
梅艷芳唱《四海一心》呼籲支援民運的畫面歷歷在目和盧冠廷激昂的《為自由》。
Lam評：當年我有錄架！
45.阿諾舒華辛力加
荷李活肌肉佬電影熱最高峯，無論劇情冇腦的《獨闖龍潭》抑或有腦的《未來戰士》觀眾照單全收。
Lam評：最喜歡還是《未來戰士》，可能因為佢少對白啦！後來他擔正的，無乜邊套有好感！最唔鍾意《Total Recall》同《真實謊言》！
46.《壯志凌雲》
80年代最公式化的商業片表表者：靚仔+靚女+愛情+戰機場面=中女年輕回憶。
Lam評：真係覺得型到爆！連港產片《傲氣雄鷹》都抄足佢！
47.《富貴迫人》
沈殿霞董驃惡妻配諧夫。驃嬸期期買六合彩期望一朝發達，到中咗頭獎又次次出事。
Lam評：無乜點睇！
48.《季節》媽打
鄧碧雲飾演的「媽打」李淑德，將子女間的鬥爭處理得頭頭是道，成為香港人心目中的媽打典範。她於 91年去世。
Lam評：其實幾老土，不過點都好睇過《皆大歡喜》。
49.軟硬天師
軟硬天師開《軟硬癲台》，越玩越喪。馬路天使葛 of the road，古靈精怪報交通難分真偽。
Lam評：當時聽商台，最先聽張麗瑾的《飛越癲狂院》，聽到兩條友咁過癮既！後來《老人院》同下晝6點既節目（忘記名字），直頭一路聽一路笑！
50.《警察故事》
由四、五層樓高、掛滿電燈泡燈飾的柱子上跳下；又有以雨傘懸掛在巴士之外支撐身體等動作。
Lam評：最難忘開頭那段，簡直透不過氣來！中後段反而流於公式。
51.《香港 81∼》
由 81睇到 86，晚晚食飯睇茂叔、陳積、斌仔、順嫂在銀禧小食店食早餐講香港大城小事。
Lam評：真正陪我長大，每個人物都那麼突出！不過其實製作水準頗低，早期還是以當日新聞作故事（像《十八樓C座》），後來不知是否編劇頂唔順，反而變成一般故事劇了。
52.《勁舞》
珍妮花比爾演追尋跳舞夢想的少女，爆炸頭跌膊 look深入民心，搞到個個少女都買對 leg warmer。
Lam評：那段時期所有這類跳舞電影，我都沒看過！也不覺珍妮花比爾好靚，而家佢去咗邊？
53.《 IQ博士》
天神村有一個自以為是天才的 IQ博士，他製造了小雲，荒誕滑稽事從此展開。
Lam評：那時真的日日追！鍾意佢夠晒癲！
54.《靚妹仔》
未夠秤少女墮落風塵做魚蛋妹， 82年電影，上映三星期票房破千萬，魚蛋妹一詞興起。
Lam評：第二集是在戲院睇，第一集好像是在麗宮看重播，對我來說只是一般！
55.達明一派
劉以達與黃耀明的音樂受英式搖滾、電子音樂等風格影響。金曲《石頭記》、《你還愛我嗎》。
Lam評：一出道即喜歡！論音樂更勝Raidas，論歌詞，其實陳少琪都寫得好好，最愛《神經》一碟，野心極大！
56.碧麗宮 VS麗宮
碧麗宮堪稱當年最豪華戲院，專播大片，位於新蒲崗的麗宮座位 3,000全港最大，但大多放二輪電影。
Lam評：兩間都去過，在碧麗宮睇《亂世佳人》和《齊瓦哥醫生》（當然是重播），還有中場休息，去麗宮則是貪平，不過都看過不少好片，包括湯告魯斯初出道的《金錢本色》。
57.《足球小將》
戴志偉與宿敵小志強為無數少男編織球王美夢，小志強最興摺起衫袖，個個跟風。
Lam評：由第一集開始，幾乎集集追，雖然帶波帶咗成集都未過半場，但依然看得入迷！特別是對戰三杉淳那段！但一到中學篇開始，戴志偉變成不敗神話，便不再好看了！
58.Shoulder Pad
阿梅、憶蓮、陳慧嫻個個抄日本偶像，膊頭墊個 shoulder pad加條蘿蔔褲打橫行。
Lam評：Shoulder Pad一定無，但蘿蔔褲當然有買啦！
59.萬梓良
《流氓大亨》中萬梓良青筋暴現流住口水鼻涕對住昏迷中的鄭裕玲大叫「 So what！」，經典。
Lam評：他那過激的演技，有時幾惡頂！
60.安全地帶
男 fans愛仿效成員之一的玉置浩二 cool爆打扮唱腔，名曲《酒紅色的心》及《戀鈦預感》分別獲譚校長、黎明翻唱。
Lam評：太多好歌了！香港歌手真的要好好多謝他！
61.鍾楚紅
在《男與女》與關海山乾柴烈火，《火舞風雲》歡場女子到《秋天的童話》癡情茶煲，能放能收。
Lam評：從不是她的粉絲，但在《秋天的童話》中，又做得頗自然。
62.葉子楣
20吋腰配 36F上圍，亞視奀星葉子楣的《玉蒲團之偷情寶鑑》三點不露，竟賺到近 2千萬票房。
Lam評：樣又唔靚，一味Sell大，興趣不大，最有印象是在《跛豪》中，被鄭則仕掌摑胸部！
63.《最佳拍檔》
許冠傑與新藝城老闆之一麥嘉合演《最佳拍檔》系列，光頭神探配 King Kong，連續三年港產票房冠軍。
Lam評：幾集都有睇！有笑有動作，但沒有太大感覺！
64.雜誌送海報
以前雜誌紙中間有拉頁海報、幾頁彩色印刷明星相，封底揀本周三張最靚藝人玉照做書籤。仲有剪印花換明星相。
Lam評：好似都有Keep過喎！
65.賭劇成風
《千王之王》和《千王群英會》，王天林監製，王晶編劇，父子賭壇無敵，拍《賭神》賺 3,600萬。
Lam評：電視劇睇下唔睇，電影方面，《賭神》幾完整，但《賭俠》較好笑，《賭聖》就太粗俗了！
66.格鬥卡通
星矢眾主角靚仔靚女，鬥士好勇鬥狠；龍珠主角個個可愛如悟空、鹹濕龜仙人，打到飛起，主角仿似永遠打不死。
Lam評：其實幾套都拖得太長，特別是《龍珠》，打咗成集先至話係熱身，真係激死！
67.《盡訴心中情》
白姐姐開咪解答聽眾感情問題，唔係叫人分手就係離婚，難怪佢話要自掏腰包請義工跟進。
Lam評：無聽過！不過後來工作上卻曾跟白姐姐接觸，而她的為人也頗Nice。
68.王祖賢
曾演可愛女鬼聶小倩、第一淫婦潘金蓮，以至孟波索爆助手惠香，永遠長髮飄飄。
Lam評：過份地Sell長腿，有時幾惡頂，最好看只得《倩女幽魂》而已。
69.鍾保羅
89年 9月 1日，金牌司儀鍾保羅墮樓身亡。教人難忘還有他跟余綺霞，一對金童玉女，先後早逝，令人惋惜。
Lam評：出色的主持，不過沒有太大感覺！
70.《地球大合唱》
84年先有全英最紅歌手為非洲饑民義唱《 Do they know it's xmas？》，台灣有《明天會更好》，香港都整番首《地球大合唱》。
Lam評：同《We are the World》或者《明天會更好》差好多班！而家有無人記得吖！
71. 近藤真彥髮型
Lam評：無整過呢個頭喎！
72. 張曼玉
Lam評：從來唔覺佢靚，亦唔會因為佢而入場！
73. 霹靂舞
Lam評：想跳，但自問無呢方面天賦！
74. Air Supply
Lam評：當然有聽過啦，把聲超靚！
75. 林志美
Lam評：當年都幾鍾意架佢！佢啲歌都幾好聽！
76.《義不容情》摺幸運星
Lam評：一次都無摺過！
77. 搖搖、扭計骰大賽
Lam評：兩樣都玩過，但自問兩樣都玩得麻麻。
78. 麥當勞急口令廣告
Lam評：我而家仲背得出架！
79. 新藝城電影公司
Lam評：當年幾乎逢新藝城必看，最愛《我愛夜來香》及後來電影工作室的作品！
80. 著名填詞人林振強、林敏驄
Lam評：如今回看，他們水準當然比不上林夕和黃偉文（特別是林敏聰），不過有些作品還是很欣賞，例如林振強的《空櫈》。
============================================
感謝 豁出去漫遊 提供以上資料
豁出去漫遊的網誌: http://lamlam0930.blogspot.hk/
============================================
