北京﹑西安﹑成都﹑雲南23天遊

直到今天，我依然好開心有過呢次難忘旅程；今次旅行係我提意，我見好多地方都未去過但又想去，咁就不如一次過去晒佢啦，但時間唔多所以要揀最鐘意既地方去，玩得幾多得幾多；而我有幾個地方想去，想去哈爾濱睇雪，北京上長城睇故宮， 西安上華山睇兵馬俑，仲有去雲南麗江同梅里雪山；經過一輪非精密計算，哈爾濱唔夠時間所以去唔到lu，留返有機會再去啦，而中途為左方便去雲南亦加入成都作為中轉站，最後行程出現啦，北京-西安-成都-雲南！

作為第一次backpacking，背囊同其他好多野都未有要花時間準備，原來只係揀背囊都好多野要研究，好彩揀到個鐘意既背囊，呢個背囊將會陪伴我去好多地方；另外最重要就係買機票火車票，買左去程到北京既火車票同回程返香港既機票，咁大致上都準備好可以安心等出發；而行程方面好粗略咁計劃左，睇左每個地方有邊道想玩想去，但最後都係有好多地方冇去到， 哈哈^^唔緊要，我就係喜歡自由自在四圍去，去到邊睇到邊想點都得；搞掂好大小準備就可以準備出發啦！北京我黎啦！火車之旅開始啦！

北京﹑西安﹑成都﹑雲南23天行程：
Day 1： 香港 - 北京
Day 2： 北京 - 大董烤鴨店﹑王府井大街
Day 3： 北京 - 天安門廣場﹑人民大會堂﹑故宮﹑景山公園﹑南鑼鼓巷
Day 4： 北京 - 頤和園﹑北京大學﹑清華大學﹑王府井大街
Day 5： 北京 - 八達嶺長城﹑天壇﹑水立方
Day 6： 北京 - 軍事博物館 - 西安
Day 7： 西安 - 華清池﹑兵馬俑
Day 8： 西安 - 華山﹑回民街
Day 9： 西安 - 大雁塔廣場﹑小雁塔﹑書院街
Day 10： 西安 - 成都
Day 11： 成都 - 錦里﹑大熊貓繁育研究基地﹑春熙路
Day 12： 成都 - 人民公園﹑寬窄巷子
Day 13： 成都 - 峨眉山
Day 14： 成都 - 麗江 - 大研古城
Day 15： 麗江 - 大研古城
Day 16： 麗江 - 大研古城
Day 17： 麗江 - 拉市海﹑束河古城
Day 18： 麗江 - 大研古城
Day 19： 麗江 - 大研古城
Day 20： 麗江 - 虎跳峽 - 香格里拉
Day 21： 香格里拉 - 石卡雪山 - 麗江 - 昆明
Day 22： 昆明 - 翠湖公園﹑圓通寺 - 深圳
Day 23： 深圳 - 香港
      北京住宿 -- 紅燈籠客棧
      西安住宿 -- 七賢國際青年旅舍
      成都住宿 -- 懶骨頭青年旅舍
      麗江住宿 -- 木頭人客棧

2-1-2011

第一天

今日下午要到紅磡站上車，上午就整理好行李準備出發；可能係第一次咩背囊又係第一次去較長時間，帶左好多好多無謂野，裝滿全個68L背囊（而家去旅行唔會拎咁多野啦，好多時用個細背囊就算）；咩住呢個背囊係九龍塘站等朋友既時候真係覺得好熱，當年冬天唔似今年咁清涼，不過唔緊要，好快就會凍到變雪條；等埋朋友去紅磡站麥當勞食午餐，就正式踏上期待左一個月既旅程


由紅磡乘搭京九鐵路到北京，大約24小時可以到達，時間係長少少但勝在價錢平，九折後只係五百幾，比飛機平好多好多；今次旅程仲有好多機會坐火車，如果冇數錯全程總共乘搭六次火車兩次飛機，數落又好似幾多bor，哈哈^^




今次乘坐硬臥車箱，上兩次去上海已經試過；出發前兩日係香港討論區認識左一位同樣坐呢班車既網友，而且咁岩大家都係同一車卡仲要同一包箱，而佢就係上鋪我同朋友就中下鋪，講講下先知原來我地都係book左同一間客棧，又會咁有緣既


過左廣州就有晚餐供應；唔知點解明知火車上既飯唔好食，但又會心思思想食，所以就用20蚊買左個飯盒，最後呢個飯盒不負所望，果然係好難食！


就係太多無謂野，書﹑電腦﹑糖...放滿背囊


火車經過湖南時睇到車外有積雪，有啲期待北京都可以見到雪，但乘務員話今年北京仲未落雪，天氣既野冇辦法啦；去到北京睇新聞先知原來湖南有雪災！




夜晚我地係車上認識左另外兩位香港人，就係咁五個人係車上玩到好夜都唔願訓，就算關左燈都繼績玩，玩得開心到連乘務員都睇住我地玩（佢唔敢加入），最後怕嘈到其他乘客仲出到去兩卡車箱中間既接駁位關住門繼續玩，都唔記得幾多點先訓lu



第二天

一早起身望住日出，感覺到一點點寒氣，火車已經去到好遠啦？


一日之計在於晨，早餐唔食飯盒走去餐車食啲好野先，餐車朝早人唔多


20蚊既早餐就只係咁既樣...先唔理佢好唔好食，連食唔食得飽都係問題


食完返去睇下風景，睇到出面環境我估都接近北方啦




今日唔知點解多左一位德國人加入我地一齊玩，好彩我個個係下鋪可以坐住點玩都得；玩玩下不知不覺就去到鄭州站，終於去到河南省，但距離北京仲有好遠距離




企係道看門口，辛苦晒


過左鄭州站之後一陣就會經過黃河，我企定定睇下黃河咩樣先


邊個黎架？




就到啦


傳說中既黃河出現；黃河係就係好闊，但望落水量唔多




經過黃河之後都係北方平原風景，我都唔特別去影相啦，繼續睇下風景，同朋友玩下，食下杯麵，期待到達北京一刻


下午大約三點，火車準時到達北京西站，我終於去到北京啦！北京真係比香港凍好多，著多件外套都算夠暖


出火車站之前先買定去西安既火車票，然後就行去搭地鐵；另外兩位火車上識既朋友見我地都住紅燈籠客棧佢地又想去，我地五個人就一齊出發！


當時雖然已經用緊iPhone，但係個時智能電話仲未算普及，我都唔敢拎iPhone上去用咁招搖，所以就冇得用google map，要用返最傳統既方法地圖+指南針，好順利就去到地鐵一號線「軍事博物館站」




好似好多人？不過唔算迫啦，北京地鐵每程坐幾遠都係2蚊，超多人搭


係唔係有點似曾相識？因為北京地鐵四號線係MTR負責營運，車站佈置都同香港好似好似，但職員既服務就...我覺得好有中國特色，其實我地又唔應該將香港個套服務標準套係人地身上，因為服務水平都有點距離




坐到去「新街口站」落車，先去客棧放低行李；搞掂好入住手續後時候都唔早啦，可以準備食晚餐


地鐵「雍和宮站」；睇落又好似幾有特色


呢個時間冇咩人搭車


已經忘記左係邊個站落車，今晚我地晚餐既地方就係「大董烤鴨店」


講起北京美食，我相信最出名一定係北京烤鴨，有幾間特別出名既烤鴨店好似全聚德﹑大董﹑便宜芳等等都好吸引；我去北京之前都諗住一定要食烤鴨，不過諗起得我同朋友兩個人食一隻烤鴨好似有啲誇張，而家我地有五個人就岩晒啦；有人提議食大董，咁就大董啦唔洗我諗仲好，最後就來到呢間大董啦


大董烤鴨店環境好靚，睇落好似好高級，係門口都唔係好敢入去
裡面好大但座位唔多，正常要book定先有位，我地冇book到好彩都有位，不過就要等個幾鐘......


等位期間有汽水﹑紅酒免費提供，服務都算唔錯


嘩...好多證書




放左好多野食係門口吸引人，但我唔食海鮮完全引我唔到


烤鴨既地方就係餐廳中間大堂，可以睇住啲鴨比人烤




好多可憐的小鴨


由左邊呢位廚師動作睇得出佢應該係咁諗：「我得左啦！我終於燒到隻好鴨啦！爸爸媽媽我成功啦！」


係道無無聊聊影下相就等左個幾鐘，終於到我地埋位


第一時間叫隻鴨先；等一陣就可以出去揀鴨，揀邊隻好呢？揀鴨既重任就落係我身上；不過講真，隻隻鴨都差唔多樣好難揀，而我就是但指隻睇落好似比較深色既出來，深色應該火喉好啲掛？


我揀既鴨仔出左來啦，希望好食啦


下一步就係將鴨仔送到枱邊，等師傅表演片皮鴨




手起刀落，師傅把刀快到睇唔到，鴨仔都好可憐咁比人片開啦




師傅好用心去片，我都要收拾心情等食呢隻靚靚片皮鴨


難得去到北京食烤鴨就要跟足食鴨既規矩，大家都乖乖地每人比多十幾蚊要一碟配料，雖然唔知點用，都係要左先算


大大隻鴨最後就只係得兩碟肉，睇黎而家唔只隻鴨可憐，我地食唔飽都好可憐架...碟鴨賣相又真係好靚既，師傅真係好勁


隨鴨會有塊皮比你包住食


另外都有個包比你包住食；但我覺得搞咁多野做咩呢，就咁夾起一片鴨已經好好食啦，真不愧為北京烤鴨


除左烤鴨仲有叫其他野食，呢個鴨舌就真係極品，難食到要吐返出來，好腥！最後要玩到猜輸包剪揼食就知有幾難食啦......


仲有個飯，好唔好食就唔記得，只係記得好細碟


片完鴨時師傅會話拎隻鴨去煲湯，食完野碗湯就出來啦（心諗一定唔係我隻鴨煲出來啦）；味道都幾好，但都唔知係唔係鴨味


最後仲有生果食


大董既烤鴨係幾好食，其他餸菜就唔知啦...！唔講好唔好食，大董既餸菜係好細份但又整得好精緻，好似呢兩個綿花球，佢好唔好食就唔知，只係知佢好靚好吸引，唔食得都睇得


食飽就走lu，原來我地來食野既地方都好靚而且感覺好高級，似係啲高消費地方唔岩我地去，所以就向王府井方向前進




個渠蓋出煙既！發生咩事！


我估下面係供暖設施所以熱到出煙（真係估下咋）；北京晚上有點凍，大約零下十度左右，算係可以接受


直行唔洗好耐就到王府井


可能太夜啦，王府井大街既店鋪都關左門，唯有第日請早；好彩係街邊仲有野買，食左串冰糖葫蘆先走


呢道啲煙仲勁，而且好暖tim，小朋友玩得好開心；唔只小朋友，我地都玩得好開心


由「王府井站」坐地鐵返去lu


要係「西單站」轉車；北京地鐵轉線唔似香港咁方便，次次都要行好遠，有啲站仲勁過美乎，又要上又要落行餐飽


返到去紅燈籠客棧，真係有紅燈籠架


選擇紅燈籠客棧係因為覺得呢道好有特色，就好似古代大屋咁，佈置好精緻；係香港已經覺得有少少奇怪既係紅燈籠客棧網站只有英文冇中文，來到發現呢道真係主要做外國人生意，客棧除左我地五個之外其他住客全部都係外國人，就好似去左外國一樣






客棧佈置極有中國色彩，唔怪得可以吸引到咁多外國人；我地既房間係大廳兩旁，一行出來就係大廳，大家食野吹水都好方便










呢間就係我住既房間


平平地住四人房；我+朋友+網友+一位南非女士就住係呢間房，而另外火車上認識個兩位朋友因為冇book房就只有雙人房可以住


住呢道唔錯，環境靚地方方便出面又多野食，但最大挑戰係去沖涼；由房間行去沖涼房要先經過一小段戶外地方，凍到震！而浴室係用電熱水爐，可能太耐冇用啦唔記得電熱水爐用完熱水就冇要再煲，結果第一晚沖沖下涼變凍水又係凍到震！自第一晚後每次沖涼都要好小心留意熱水爐上既數字，仲要千其唔好人地出來就即刻入去！坐足一日車，今晚一定好好訓^^