不必牽強說盟誓 – 下集

由卡臣於 2013-02-22 00:00:00 發表 | 累積瀏覽 410

分類：其他

不必牽強說盟誓 – 下集

Raymond發覺馬路旁正站著公司同事Vincent，正陰陰嘴望著自己和Jay。Raymond馬上縮手，詐睇Vincent唔到；閃進入群當中。不過Raymond心中有少少虛榮感，自己已經一把年紀，無權無財，估唔到仲可以拖著個後生靚女招搖過市，咪話唔爽！

當晚十一時，他們在客廳中看電視時，Jay突然緊緊攬著Raymond，嚇了Raymond一跳！四目雙投，Jay主動跟Raymond接吻。嘩！56歲的Raymond，無想過廿零歲鬼妹仔性格的Jay會咁開放，他一向對嫖妓好抗拒，所以都好耐無開過齋，今晚一於豁出去，喺呢個moment要爆啦！兩人在沙發上纏綿起來。

事後，他們在床上傾偈。Jay承認自己是「戀父狂」。經這兩天相處，她已經喜歡了Raymond。Jay說她：「從不打算將來，也不需要結果，只知道目前開心最重要。」正所謂：「以後未來是個謎，不必牽強說盟誓，難料哪夜再一齊，Let me hold you one more night。」

＊　＊　＊　＊　＊　＊

第三天是星期日，他們似乎已經忘記要去找親戚。正當他們在餐桌討論今天到那裡遊覽時，突然有人按門鐘。Raymond嚇了一跳，唔通真係「一係唔發市，發市當三年」，邊個又嚟拍門？

Raymond望一望Jay，心忖：唔通俾人捉黃腳雞？警察上門捉他犯了「與未成年少女發生性行為」？唉～她唔夠秤？早知睇咗Jay的passport先搞啦！

Raymond手震震去應門，嘩！來者令Raymond的眼都突出嚟。原來是23年無見過的前妻Joyce。她身邊有一名表情嚴肅的男士，相信是Joyce現任丈夫。Raymond立即開門，Joyce老公見到Jay，立即怒不可遏，上前粗暴地拉Jay走。Raymond立即上前加以阻止，Joyce老公跟Raymond碰撞拉扯，Jay的哭聲和兩個男人的爭執聲驚動了鄰居，報警求助。

這場爭鬥終於在警察來到調解。Joyce、丈夫和Jay被請離開，列作「家庭糾紛」處理，無人被拘捕。Raymond一人獨坐在客廳中，眼光呆滯。

＊　＊　＊　＊　＊　＊

事情是這樣的：23年前，Joyce改嫁給現任丈夫後，一年後誕下女兒Jay。Joyce恐怕刺激到「恨生仔」的Raymond，所以沒有把懷孕一事告訴前夫，生下女兒後忙於照顧，終斷了跟Raymond聯絡。Raymond從未見過22歲的Jay。

Jay的父親是中學英語科教師，給女兒找西人教授純正牛津英語，所以Jay能操一口好英文。父親對Jay管教十分嚴厲，望女成才、有一番成就。

怎料如電影《天若有情》的橋段，大學生Jay愛上浪漫年輕有型「髮型師」。俾父親知道後，捧打鴛鴦。禁止她們再相見。「髮型師」上門找Jay父親理論，大吵大鬧。「髮型師」情緒激動。之後「髮型師」獨自跑了去碼頭，跳海自殺。Jay哭到崩潰。痛失至愛。

Jay決定要向父親復仇，Jay早在十五歲那年，早已在母親的衣櫃底發現到一個鐵盒，母親專收藏她的舊信和舊相。Jay一早知道母親前夫Raymond的樣貌和地址。

Jay的報仇大計：她先在下班時間到Raymond住的大廈樓下等待，想確認Raymond是否仍住在那裡。終於讓Jay見到Raymond下班回家。Jay確定他住在上址之後，第二天便執拾行李，離家出走，晚上到Raymond家扮英國學生妹找親戚。Jay自幼跟英國老師學英文，操得一口純正英語口音。

Jay要求Raymond收留並跟他搭上，她心想：竟然得不到心中所愛（髮型師），就作賤自己，跟母親前夫有一腿，作為對親生父親的一種報復。

Jay做了那麼多之後，最後一步就是告訴母親Joyce自己身在何處，好讓父親睇到爆血管。終於這一幕在星期日早上發生了。Raymond以為被一個「戀父狂」愛上，自己仍有幾分吸引力，原來全部都是一個局，自己變成一件報復工具，還跟前妻的女兒有一夜情，心情之複雜，可想而知。

＊　＊　＊　＊　＊　＊

星期一早上，Raymond在茶餐廳吃完早餐後，如常回到公司上班。在pantry遇上口多同事Vincent，Vincent口花花當眾說：「Raymond，正喎！拖住條靚女行…」連個「行」字都未講完，「噗」一聲！Raymond忍無可忍，一搥打向Vincent臉面。大家都好錯愕！估唔到平日粒聲唔出的Raymond，竟然會出手打人！

Raymond經歷了這兩天的遭遇和抑壓，真是極需要找一個缺口去發洩一吓，大家原諒吓佢啦。

完

二少爺說：97回歸前，香港人心態：不理明天，今晚有得玩就玩咗先。