香港人出名無乜耐性，好怱忙但係唔知忙乜？睇見身邊啲人都趕，自己慢咗咪蝕底？所以乜都要「即刻有」，唔可以等。今次數吓香港人有乜嘢係「唔等得」：
第十位：餐廳埋單
這裡不是指食客在餐廳門前排隊唔等得，相反食客可以耐心企街等成幾粒鐘都得。這裡指餐廳為了一晚之內盡量「返枱」做多幾轉生意，當食客order的東西到齊後，侍應就千方百計想你盡快走，騰空張枱給下枱客人。伙計問你食完未？仲執到張枱面空空如也。舉例：當你用現金埋單時，如果你吃了325元，侍應會估計你用500元埋單，侍應一埋嚟，早就預備好175元零錢找俾你。毋求將埋單時間縮短，讓你盡快離開餐廳。
第九位：電腦速度
用電腦最「驟忌」就係「慢」，最怕見到「等候的icon」。Download嘢、click一個command、最怕就係等。睇Youtube條片「窒吓窒吓」仲停埋添，真係睇到狂拍Keyboard洩憤。公司電腦慢，拖延工作效率事小，搞到要O.T.就事大吖嘛。
第八位：八卦娛樂資訊
朋友同學同事吹水，最緊要有話題，話題最緊要係最新最update。如果人哋講乜自己唔知道、或者搭唔到嘴，咁就會俾人話「娘」。所以香港人慣咗久唔久就攞部電話睇吓，update一吓自己，一機在手，能知天下事。
第七位：減肥纖體
減肥廣告標榜「最快見效」，健康的身體，不應該於短時間內暴肥或暴瘦，但女士為了趕赴一個party或自己婚禮，需要喺最短時間內見效。最好唔使太辛苦，瞓喺度就可以以最短時間修到身。如果要慢慢節食加運動先至可以減到肥？咁寧願俾錢搞掂，仲要「零反彈」添呀。
第六位：電子產品
某些男士以「潮流達人」自居，手中要有最新的電子玩具，i-pad、i-phone、notebook、電話等。雖然他們知道電子產品等一陣就會跌價，但他們實在刻不容緩，一定要第一時間擁有最新產品，炫耀出那份用錢買回來的虛榮感。
第五位：小巴的士司機
小巴司機以走幾多轉和收入成正比。梗係想以最短時間走最多幾轉。而一些「八折的士司機」為了接多單Order，便會極速完成手上那支旗，再仆去下一單接客。如果你在一條單線行車馬路，遇上小巴或的士在你車尾，你車尾就一定俾啄實。只僅僅相差一吋距離，到馬路變成雙線行車，小巴的士就立即高速爬你頭，只得食塵的份兒。
第四位：電視煮餸示範
電視婦女節目教觀眾煮餸，又切又炆又焗又燉又炒…用幾分鐘時間示範烹調過程的80%後，剩下20%是焗或者慢火燉。無理由叫觀眾一齊等成粒鐘，主持便會喺枱底攞出一件「完成品」，並笑着說：「因為時間關係，我哋已經準備咗一個完成品俾大家睇，嘩！好靚呀！」過程仲快過煮即食麵。
第三位：屋企等送貨
訂了傢私在屋企等人送貨，或者叫人上門整寬頻、電話水電煤等，對方公司只有一個時間範圍，用戶需於屋企內等候。例如約你9:00 至11:00，如果對方於9:05到達，咁就恭喜你！但如果10:55才到，那麼這一小時五十五分就令人如坐針氈，狂打電話去Customer Services Centre追問幾時有人到。又或者當你遲咗少少9:10到，但他們說9:01已經到達，屋內無人所以走咗。
第二位：電話熱線
公營事業、政府部門、服務供應商都有電話查詢熱線，但用戶打去只會換來一肚氣，一係叫你按「ｘ字」、「請你再次輸入」、「返回目錄」、「我哋收唔到你嘅訊息」，或等到斷線都無人接等等。所以好多人都放棄唔等。有些銀行或速遞公司針對此點，強調12秒內有真人接聽，在用戶眼中，立即成為怒海中的救生艇。
第一位：「打麻雀」
有華人的地方就有麻雀聲，打牌最怕什麼呢？就是最怕「輸錢」和「等」。「三缺一」那種等待已經煎熬。當揍夠腳喇，大家希望在有限的時間內打多幾圈，最怕遇上「站長」，摸完牌後左度右度，必遭上家下家對家狂鬧：「站站停，快啲打啦！」贏家贏緊錢，梗係想打快啲贏多啲，輸家因為要上訴，見你喺度慢吞吞，仲唔打快啲點可以翻本？
完
二少爺說︰乜唔係「愈是期待愈是美麗」咩？
============================================
感謝 卡臣 提供以上資料
卡臣的網誌: http://carson-chung.blogspot.hk/
============================================
