![]()
紀漢醇 - 第八節 - 龍鳳大禮堂
痴漢三郎講聲sorry後便掛線，怱怱離開餐廳，趕去急症室。
剩下無助的紀漢醇，雅典娜隨時會到達餐廳，今次點收科？
紀漢醇急call 同事阿昌增援，可惜他睇緊七點半電影，熄了電話，
再call幾個死黨朋友，結果咁啱個個都唔得閒！
苦無對策之下，唯有樣衰衰咁打電話去餐廳，
同帶位小姐cancel訂枱，並向帶位小姐千叮萬囑：「如果有任何客人嚟攞枱，都要死口唔認韓先生曾經訂過枱！」
帶位小姐當然唔會賣他帳：「先生，我哋無必要同你講大話噃！」
紀漢醇出絕招：「嗱！小姐，我傻架，妳唔咁做，我一定會報仇！我認得出妳個樣架，妳而家紥馬尾，戴紅框眼鏡嘛！我今晚揾人喺妳塊面劃兩刀！」
帶位小姐驚愕自己的容貌已被點相，香港又咁多變態傻佬，
便勉強答應了紀漢醇的要求。
紀漢醇立即離開商場，減少給Lydia碰到的機會。
算起來，這次已經是紀漢醇第四次放飛機，
破了個人放飛機的最高紀錄！
無奈人算不如天算，紀漢醇慨嘆這個「金蟬脫殼」的計劃最後功虧一簣，
未能替整件事，劃上一個完整的句號。
因為紀漢醇藉詞去看針灸，所以不能太早返家，
獨個兒在旺角留連到十時才回家。
十時許他回到家中，見到Alma和阿Man到家中作客，
淑芳、Alma和阿Man，正拿著酒店婚宴套餐冊子，討論得眉飛色舞，
紀漢醇問Alma和阿Man，是否就快請飲？
Alma說半年後會和當教師的男友阿Man結婚，紀漢醇立即恭賀Alma和阿Man。
紀漢醇問呢對準新人，會唔會擺酒？定係揀旅行結婚？
阿Man答：「擺！我哋擺酒。我仲想喺舊式酒樓啲龍鳳大禮堂擺幾十圍，咁先夠Cult嘛！」
Alma立即搶說：「黐線！龍鳳大禮堂咁娘！我要喺酒店擺，如果唔係…我唔嫁架！」
阿Man：「好啦！好啦！老婆妳話哂事呀！」
阿Man詢問紀漢醇在哪裡拍婚紗照，效果理想又價廉物美？
紀漢醇在沙化坐下來，向呢對準新人分享婚禮的親身經驗和意見。
紀漢醇扮到好不經意咁問淑芳一句：「咦！點解Lydia唔上嚟湊吓熱鬧？俾吓意見都好呀？」
淑芳回答Lydia今晚有約，所以不能前來。
紀漢醇心知肚明Lydia去了又一城，赴一個無人應約的約會。
紀漢醇明知故問，務求令淑芳覺得他對Lydia的行踪毫不知情。
紀漢醇突然想起以往Lydia來家中作客的情景，
見她平時講嘢斯斯文文，談吐正正經經，
估不到和她網上談性的時候，
她就可以變成另一個豁到盡的豪放女！
紀漢醇想吓想吓Lydia的過往印象，便不知不覺間入了神。
紀漢醇呆若木雞地坐在沙化上，「喂！你做乜呆哂咁？」
Alma拿着酒席的菜單，在紀漢醇面前揮舞著：「喂！諗緊乜嘢呀？」
紀漢醇回復清醒，擠出一個牽強的笑容，繼續和Alma和阿Man傾計。
剛才紀漢醇發呆的時候，淑芳已經入了廚房，煮糖水給大家作宵夜。
客廳中只剩下紀漢醇、Alma和阿Man三人，
還有一堆酒席單章和婚紗服務介紹冊子。
阿Man手拿着一本《日本自助旅遊指南》，
他們決定婚禮後，到東京自由行渡蜜月。
阿Man將書本掀兩掀，計畫渡蜜月之行程，
問紀漢醇：「如果我有三個鐘頭空檔，我應該去『下北澤』好呀？定係去『代官山』好呀？」
阿Man把手中的《日本自助旅遊指南》遞給紀漢醇看，
因為紀漢醇是日本動晝迷，一有錢一有假期，他就去日本購買最新電玩產品，
所以他可說是一名「業餘日本通」！
紀漢醇建議去「下北澤」，因為那裡有一些具特色的小賣商店，可能會搵到好嘢！
紀漢醇把書一翻，書中夾有一張淑芳和一名少女站在日本明冶神宮前的合照，
紀漢醇很少跟淑芳溝通，不是淑芳的每個朋友，他也認識；
Alma見到紀漢醇的迷惑表情，都估到他不知道相中少女是誰？
Alma識趣地主動介紹：「呢個女仔叫Kathy，淑芳嘅舊朋友，喺東京留學，讀緊design；今年一月淑芳到日本公幹嗰陣，咪順便探吓Kathy囉！」
紀漢醇隨意敷衍回答：「哦！係呀。」
Alma都知道紀漢醇無心肝，他甚至可能已經忘記淑芳曾經喺今年一月去過日本。
Alma再補充一句，指着紀漢醇手上那本書：「呢本旅遊指南咪淑芳上次帶去東京用囉！今次可以借俾我哋渡蜜月用啦！」
紀漢醇對於淑芳的認識，不夠Alma的一半，作為丈夫，感到有點慚愧！
紀漢醇打算把書歸還阿Man時，發現書本夾着一張書籤，
該書籤是一張戲票尾，只露出一角，
紀漢醇好奇地抽張票尾出來看看。
Oh my God！
票尾清清楚楚印着：
今年六月十二日星期四晚上7:30百老匯電影中心二院《咖啡杯邊的唇印》座位編號R11！
本書是屬於淑芳嘅，咁即係話雅典娜的真正身份，竟然…竟然就是一直待在身邊的淑芳？！
紀漢醇眼前一黑！個心離一離，
全身血液凝結，
如跌入一個無底深坑，
無聲地呼叫……
次回《二人失樂園》6月25日星期三2345
============================================
感謝 卡臣 提供以上資料
卡臣的網誌: http://carson-chung.blogspot.hk/
============================================
