我第一次接觸「樓上舖」，應該是中學時代到旺角二樓的「田園書屋」。當時「樓上舖」不多，零售業以「地舖」為主。十年前，再聽到一間叫「樓上燕窩」出現。到了今天，樓上舖大行其市。
因為地舖租金高昂，零售商捱不起貴租，逼上梁山做「樓上舖」。租金較便宜才能維持收支平衡。除了「樓上書店」外，最明顯出現了：「樓上cafe」、「樓上時裝店」、「樓上美甲」、「樓上髮型屋」、「樓上足浴」和「樓上私房菜」等等。貴租趕他們上樓。客人不介意行多層樓梯，享用更便宜的服務和貨物。
什麼零售業仍能堅守在地舖呢？就是做「自由行」生意的鏈鎖大集團：化妝品、珠寶鐘錶金飾、蔘茸藥材、個人護理、奶粉藥房、名牌時裝、名牌手袋、電話電器、人民幣對換、波鞋等等。大條水喉射著才能得以留在地面。
以前行街的經驗，就算在商業旺區，多類型的店舖種類都找到。現在的商業貴區變得單一化，都是那些供自由行購物的千篇一律店舖。
業主瘋狂加租，勢將更多店舖被迫上樓。魚蛋燒賣台式奶茶變成樓上舖。到時7-11上埋樓，它還能叫「便利店」嗎？
「樓上舖」都有好處，我壞心腸講句：上環那些海味舖，滂沱大雨後，發生水浸，海味店內的蔘茸海味，浸到血本無歸。如果能夠搬上樓營業，必可減低天災損失。不過就苦了那些年紀大又關節有問題的老顧客。
點解我會寫以上幾百字呢？我對城市規劃又一竅不通，為何突然有感而發呢？
皆因我光顧的那間健身室，由地下搬上商業中心十幾樓，以前我行一層樓，已經可以到更衣室，更衣後立即可以做運動。現在等lift都要等好耐，繁忙時間更大把人跟你爭lift。尖沙咀和中環分店已搬了上樓，我擔心陸續有來呢。
你會問我：「人人都係咁等，唔通你啲時間特別寶貴呀？」
咦？又係喎，咁我無嘢講啦。
死死地氣繼續等lift，嘮騷呻完。
係咁先！
二少爺說：我唔想交稅囉~
