唱K備忘錄
某K場的301號房內，十個男女一邊唱歌、一邊吃K Buffet。好熱鬧好高興。
有時候，一大班人去唱K，總有一兩個人唔願唱K，只是坐著一旁看MTV或聽朋友唱。雖然他們沒有唱過歌，但埋單時他又願意夾一份錢。
301號房內，有人搶咪有人齋聽歌。Steven就是一個唔唱歌只湊熱鬧的朋友。他吃過buffet後，靜靜地坐在沙發上。現代都市人點會俾自己空閒無嘢做呢？Steven拿出電話上網去，玩微博、facebook、WhatsApp、google+。Steven一上網就耷低頭忘情咁玩，唔理其他九個朋友唱緊乜玩緊乜。
一小時後，Steven人有三急，起身去廁所。他一邊行也是一邊望實電話屏幕，慢慢行去洗手間。就算解手時，也是一手拿電話一手咩呀。
完事後，Steven邊上網邊行回房間，打開房門就坐低，繼續WhatsApp。
坐了一陣，Steven雖然忘情咁WhatsApp，但他發覺有人唱緊英文歌。咦？奇怪啦！Steven啲朋友從來唔唱英文歌喎！Steven將視線移開電話屏幕，慢慢若無其事咁，望一望房內其他朋友，「Shit！入錯房！」原來Steven傻吓傻吓，在暗黑走廊入錯307號房。
Steven表面強裝鎮靜，其實唔知點算好？Steven立即WhatsApp 301號房內的朋友Oscar求救。Oscar回覆：「咪玩啦！你一早返咗嚟啦。」嘩！咁猛？呢個係唔係鬼故嚟架？
301號房靠近門口的沙發上，坐了一個男人，又是穿黑色衫褲，垂下頭全神貫注玩電話。大家都以為他是Steven，一直無理佢，由佢玩電話。
如今經Steven這樣一提，Oscar留意到那黑衣人是一個陌生人。Oscar按兵不動，叫Steven扮接到電話，嫌嘈出房接聽，乘機走人，返回301號房再講。Steven照辦煮碗。起身扮講電話鬆人。
Steven離開307號房時，離遠見到有一個黑衣男人也同一時間步出301號房。Steven察覺對方也發現自己剛步出307號房。兩人表情尷尬。Steven和他在走廊擦身而過，Steven覺得有點像電影中的「交換人質」情節。
很明顯，今晚karaoke內，有兩個唔唱K、只玩電話、著黑色衫褲的男子，同時間去完廁所後，垂頭入錯對方房間，坐低繼續玩電話。奇又奇在大家都唔發覺，你有你玩電話、我有我唱K，相安無事。那麼，他們在這空間的出現及存在的意義是什麼呢？
完
二少爺說：呢首《香港輓歌》，將近年香港其中44首K歌鑲嵌而成。但旋律詞風又渾然天成，聽落仲以為同係一首歌添。
