我要做Model

由卡臣於 2010-02-22 00:00:00 發表 | 累積瀏覽 469

分類：其他

我要做Model

阿強二十幾歲的時候，除了正職之外，都有做吓兼職工作，賺吓外快。阿強亦曾經撈過吓Model。更正：唔係Model，應該係Talent。

Model是天生一副衣架身材，一碌竹咁高、表情冷酷的年輕俊男美女，男的健碩女的瘦削；又以十幾歲的混血兒最為吃香。他們在天橋上真空上陣、婀娜多姿行catwalk，行fashion show，之後出書出鏡電視拍戲，這就是Model。

而Talent則是平面圖片中出現的各類人物角色。例如平面廣告或雜誌專題需要有一對夫妻出現，那麼扮演這對夫妻供攝影師拍攝的人物，就叫Talent。不需要camera face、年輕樣好身材好，只需外表恰如其分便成，例如扮肥肉佬的似肥肉佬便成。阿強便是後者Talent那一種模特兒。

阿強點入行？記得畢業無耐，阿強在健身室已練得一身肌肉。而阿強參加的前衛實驗劇團，劇團當中有一位男成員，叫「志雄」。他在model agency工作，負責聯絡工作，咁啱有一個Client拍平面廣告，需要一個健康男仔（當時阿強還年輕），志雄叫阿強去試鏡。阿強矇查查第一次去某工業大廈做casting。

阿強按地址摸上柴灣某工業大廈某studio內，嘩！studio內做廣告的人好型啊！個個穿剪裁貼身的黑衫，粗黑框眼鏡，個樣cool到爆。

其中一黑衣人叫阿強填表，一睇張form，弊家伙！身高？三圍？袖長？領闊？技能？演出經驗？能操言語？駕駛車輛種類？阿強通通唔清楚！唯有亂填或留空。
填好form後，一名穿Yoji黑西裝褸的男子，叫阿強跟著入嚟試鏡室。在攝錄機前，地上有一個紅色交叉。叫阿強站在交叉位置上。在白色膠板上寫上阿強的名字，阿強雙手捧著膠板對著鏡頭，正面、左面、右面、半身、全身、轉圈，跟入獄前辦的手續大同小異。

之後，Yoji男子叫阿強對著鏡頭自我介紹，阿強被突如其來的問題嚇親，沒有準備下對鏡頭，口窒窒：「我……叫阿強……男性……英藉括弧中國海外……血型AB、鐘意做運動……同父母一齊住……」阿強都唔知自己講緊乜。Yoji男子說：「OK！走得！有消息會通知你。」阿強便這樣迷迷糊糊地完成人生第一次試鏡，跟初夜一樣，在胡里胡塗中便迷糊發生咗。

唔知係咪傻人有傻福？定係無人肯去casting？一周之後，志雄通知阿強已被client錄用。是一個沐浴露的平面廣告。嘩！阿強開心到諗都唔使諗，立即大聲應承！心裡大叫：「我終於可以做Model啦！」

三天後，阿強按地址準時到達灣仔某影樓。除了阿強外，還有另外兩名Talents，一名少女及一名男嬰，扮演媽媽和初生兒子。對於年輕的阿強來說，無端端由「單身」變成「仔細老婆嫰」，面前有兩個現成活生生嘅object俾自己投射情感，可以供幻想是自己的太太和兒子。這感覺是廣告酬金以外的意外收獲。

拍攝沐浴露平面廣告，需要Talent扮演洗澡後那種感覺。「服裝統籌」遞上一條大毛巾，叫阿強脫去上衣。好彩阿強嚟之前，已知道Model需要在後台當眾換衫或裸露身體，已做好足夠的心理準備，阿強二話不說，便脫去上衣，披上毛巾走到攝影機前。攝影助手測光後，攝影師就位，正式開始拍攝。

阿強以前在電影及電視中看到的有關情節：攝影師會說：「OK！cool啲！Good！嚟多個！望左少少，very good！」阿強等待該情節在自己身上發生。結果…….攝影師只是叫阿強自然啲就得啦！影了兩筒菲林便完成。（當時未興digital）阿強心忖：「吓？乜得咁架咋！」

影完阿強個人照之後，第二部分是「一家三口」合照。嘩！阿強跟模擬太太和模擬兒子俟近一起拍照，好溫馨啊！一幅幅未來的憧憬呀！如果第時係咁就發達囉！
拍攝過程完成後，阿強完成第一次靠樣謀生的經驗。獨自離開影樓，一股寂寞感覺襲來，原來阿強十分在意那一閃即逝的一家三口溫馨情景。

事隔45天後，阿強順利收到廣告酬勞。那筆錢沒有特別買什麼來獎勵自己，只作返工搭車吃飯之日常開支。阿強想睇番該輯廣告出街後的完成品，可惜它不在雜誌刊登，只作派發給零售門市之用。跟阿強緣慳一面。

某夜12時，阿強路經灣仔莊士敦道，見到某一已落閘的藥房門口，貼上該沐浴露的廣告海報，阿強高興得立即上前細看，諗住重溫那天的溫馨。

怎料海報的左下角被人撕去，而在海報裡又找不到自己個樣，換言之，有路人惡意搣走阿強個樣！唉~唔通自己真係咁樣衰，影響市容？點解啲人咁無公德心？定後藥房老板自己撕走？抑或廣告take走阿強的部分？呢個係一個～謎。

雖然阿強第一次做Talent出師不利，但他想起很多樂壇天王巨星，初出道時都是在觀眾的噓聲中長大。加上它始終是一份part time job，又間中可以在拍照期間，詐癲納福。想通後，阿強堅持下去，繼續成為香港Talent界的一名八九線蝦兵蟹將。

完

有圖為証

阿強做唔成model，唯有回家狂炸機，聽Kraftwerk的《The Model》

The Model – Kraftwerk

She's a model and she's looking good
I'd like to take her home that's understood
She plays hard to get, she smiles from time to time
It only takes a camera to change her mind

She's going out tonight, loves drinking just champagne
And she has been checking nearly all the men
She's playing her game and you can hear them say
She is looking good, for beauty we will pay

She's posing for consumer products now and then
For every camera she gives the best she can
I saw her on the cover of a magazine
Now she's a big success, I want to meet her again

============================================

感謝卡臣提供以上資料

卡臣的網誌: http://carson-chung.blogspot.hk/

============================================

鐘意SeeWide的分享，給我們一個Like吧！