2009年10月24日 (星期六)
傍晚出動...目的地「西門町」同「士林夜市」。先去「西門町」行街食野買野，太太一定要買葱抓餅食，要食原味要加蛋。跟住仲買左衫俾毛毛，之後我地行過路邊見到「巴夏喀手制皮革店」，買左條好靚嘅狗帶俾毛毛。個店員見倒我用緊條電話繩係佢間鋪嘅出品，就話同我做個清潔打蠟保養服務 (免費) 。另外太太就買左份禮物俾左太生日...
跟住我地去「士林夜市」...首先我去買茶壺，去到個檔口有個伯伯招呼我，我揀左一個茶壺，伯伯同我傾偈又介紹啲靚茶壺俾我又請我飲茶，埋單我買左三個茶壺同半斤高山茶葉，伯伯仲俾個超特筍價我 (每次去台灣都有幫親嗰檔) 。
我同太太狂買狂食，水果、果汁、麵線、排骨湯、花生糖、花枝羮...
毛爸 : 喺西門町呢間叫「阿毛」嘅舖頭係毛毛瞞住我地開嘅...
毛爸 : 啲衫仔、狗帶係毛毛嘅禮物，狗帶仲刻左毛毛個名咖...
毛爸 : 呢度三個咁靚嘅茶壺平均都係港紙67蚊一個咋...
毛爸 : 咁多檔食檔根本冇可能全部試晒...
毛爸 : 其中食左排骨湯同麵線...花枝羹...
毛爸 : 呢杯雪糕係朝早喺「SOGO」嗰陣買黎食嘅...係店長推薦嘅全奶雪糕，好食到震亦都貴到震，成HK$28一球咖...
有件搞笑野晏晝喺「SOGO」發生...話說我同太太掃完貨就喺美食廣場休息，我見到對面果汁檔有好多人排隊，太太提議買果汁飲。心諗咁多人等啲野一定好特別，我望見個燈箱寫住「檸檬樹、果汁」，我同太太講 : 我地試吓囉...排隊輪到我，我就指住嗰牌豎起一隻手指，個服務員猛咁拎頭，我用啲廣東國語同服務員講 : 我要檸檬樹...服務員好想笑咁同我講 : 招牌... 原來檸檬樹係店名，我見周圍啲人個個都笑到彎晒腰...真係好失禮...
感謝 「毛爸毛媽毛毛豬 」 提供以上資料
個人日誌: http://mobamomamomo.blogspot.com
