2008年10月28日．星期二 (Part B)
我地一上到船就有個船員同個海盜叫左我地埋去擺“舖士”影相（我以為係頭等歡迎儀式添），其實係俾人打劫，張相成1000 Yen架，不過又影得幾靚喎。啲人一窩蜂湧晒上甲板，冇幾耐全部走番晒落黎（唔知點解）。我喺甲板影左好多相，當時好大風都好凍下。
賊船駛到終點站元箱根港碼頭停泊，我地就喺碼頭出面車站搭登山巴士返箱根湯本站。太太問個站長要搭乜野車，站長唔識用英文溝通但好熱心幫忙，終於上左架去湯本站嘅巴士。原來班車係停兩個站架，另一個站係小田急站，都唔知個站先後，太太開始擔心唔識落車。行車全程要45分鐘架，不過都唔駛驚，因為太太全程都覺覺豬到總站先醒，跟住同我講，肥仔到湯本站要落車喇（真係笑爆咀）。
我地落車之後就行過車站對面搭shuttle bus去“南風莊溫泉酒店”，啲小巴每30分鐘開一班（收100 Yen）。車會到酒店正門停，已經有職員出黎門口迎接我地。Check in時職員祥細講解住房位置、浸温泉地方、晚餐同早餐時間，然後就帶我地上房。嗰間酒店有兩座架，由大堂上到房間都幾複雜（搭電梯都要換兩次）。間房係和洋式有個廳，我地放好啲行李就等夠鐘去食飯。
訂房之前講左唔食牛肉（信仰問題），唔食魚生（健康問題）。餐飯好豐富份量就少左啲啲，食飽飯之後就返房休息、執行李、換番件和服夜啲去浸温泉。
今日男賓温泉浴場喺B1層（聽日喺1樓，唔可以搞錯架每日互換），入到澡堂幾乎包場，只有幾個客同兩個服務員（阿叔同阿姐）。阿叔喺度較水温、阿姐喺更衣室吸塵。啲人喺阿姐面前剝光豬行黎行去，阿姐就好忙咁做自己野（大家都好似透明）。
個澡堂好大，行出室外仲有兩個露天風呂（一個木造一個石造），啲水好熱不過浸落去好舒服。過程約40分鐘，上水沖乾淨個身着衫出大堂買宵夜（杯麵），揾左好耐都冇，原來小賣部淨係賣土產。我買左支“明太子味鹽”俾老豆送粥，跟住上房覺覺豬…成個夜晚都訓得好好…如果有宵夜食仲更加好…好肚餓呀…
感謝 「毛爸毛媽毛毛豬 」 提供以上資料
個人日誌: http://mobamomamomo.blogspot.com
