2008年10月27日．星期一
我一早已經醒左，六點半就出去影相。朝早嘅東京好凍，我估得十幾度。我行左去地鐵站探路，因為聽日去箱根（行程時間好密）。我行左一個鐘就返酒店接太太出發第二日行程。
太太一出門就話要去嗰間Beckers Cafe食早餐，不過揾左好耐都揾唔到好唔忿氣（喺度自言自語…冇理由揾唔到嘅）。咁我地就喺附近嘅麥當勞食左個特色甜早餐，幾好食不過啲野好貴。
我地先去新宿，首先要去“小田急旅遊服務中心”買去箱根嘅火車票（來回套票兩個人要13,480 Yen），個服務員仲教左我地點樣去車站搭車（用英文對答）。
跟住搭JR去“明治神宮”，行出車站就見到個入口。“嘩”…好大嘅鳥居（牌坊）、好大排燈籠。行到入主殿係一羣木建築物，好有特色。我由入口開始影相，又撞啱花展，仲有人舉行緊傳统日本婚禮，好莊嚴隆重呀。
我地喺小賣部買左啲筆做手信，逗留左個半鐘就走。臨出明治神宮仲幫班小朋友做個調查訪問，啲小朋友好有禮貌排隊同我地講多謝。
我地沿明治神宮一直行，首先買朱古力牛角包食（間舖頭好出名架）。跟住行左好多橫街窄巷，入面啲舖頭好細間但係佈置得好靚好有風格，特別係有架快餐車係賣漢堡包嘅好有美國風味（杜如風有介紹過）。
中午我地喺“光麵”食拉麵，個套餐有甜品送架（係唔知咩野布甸）。啲野都幾貴但好好食，尤其係個布甸，太太讚不絕口。
食飽野又行街，太太去Agnes b買手袋，個服務員好好人，主動幫我地做退稅，仲送左兩盒神秘禮品俾我（如意x），送左個環保袋俾太太。
之後行去Kiddy Land買禮物俾銅銅同盈盈。我地本來都好開心嘅，唔知點解因小事就同太太嗌交（作風同價直觀嘅問題），太太就黑面我，我就激到咳。
跟住一路行落去竹下通，表參道同涉谷，太太喺Uniqlo買左兩件T恤俾我。下午茶喺間叫Excelsior Cafe嘅地方食，我地叫左千層班戟蛋糕同熱情果茶，價錢好貴。
休息左一陣就去東京鐵塔，要轉兩次車先到。出左車站就見到好靚着左燈嘅東京鐵塔，真係唔好彩步行中途落大雨，最後因為太大雨放棄左繼續前行（好失望呀），只係離遠影番幾張相交差。我俾雨淋濕（好凍呀）啲衫、褲、器材，我喺車站洗手間換左啲濕嘅衫，好彩無凍親，太太着左件防水外套所以就冇事。
經過商量，最後決定返池袋食飯。我地去左Parco 7樓嘅“和幸”食豬扒飯，叫左兩份套餐，有炸豬扒、蠔、蝦、茶碗蒸，仲有椰菜絲、蜆肉湯同白飯（湯、菜、白飯無限任食），超好食超抵。食飯期間同太太講和。食飽野就喺Parco繼續行，太太買左兩對耳環。經過藥房入去買左“休足時間”…梗係仲有宵夜啦。
