DAY2~『北海道』札幌→旭川→稚內
四點幾醒咗，原來啱啱日出，列車正經過青森縣嘅野辺地，當時已經覺得有啲怪，點解宜家仲喺呢度，不過無理，繼續瞓。九點再起身，列車走過函館附近嘅大沼，終於嚟到北海道啦！不過，發覺唔對路，睇吓個時刻表，應該7點幾就經過呢度，點解宜家至到呢？搵咗車掌問吓，原來列車誤點成兩粒鐘，要 1 點半至到札幌，原本十五十六唔知去唔去嘅場外市場唯有唔去，喺札幌食拉麵算。冇預備早餐，喺車上買咗個唔好食嘅帶子便當做早餐。
![]() |
▲整裝待發，準備落車
|
札幌
去到札幌成點幾鐘，寄好咗行李第一時間搵間拉麵舖醫肚，目標係東急附近嘅一粒庵。
![]() |
▲終於到達札幌站啦！
|
一粒庵
去到一粒庵，叫咗個睇相都唔知咩嚟既「元気のでるみそラーメン」，貴過普通拉麵成 250円 ，原來多咗啲叉燒炒蛋喺上面，第一次食用日式叉燒嚟炒嘅蛋，感覺唔錯，味噌拉麵都係札幌至好。之後就係觀光時間，先去時計台同大通公園，不過行行吓去咗東急、丸井今井、大丸同 Stellar Place，三十幾度，都係涼冷氣舒服啲。雖然飽飽地，都要去一去雪印パーラー，食唔落大大杯嘅芭菲，就叫咗個日皇都話好嘅雲呢拿雪糕，佢比一般嘅雲呢拿雪糕香同滑，不過我都係唔係好鍾意雲呢拿。去到車站，見到月台上嘅 Cassiopeia 正準備開出，第一時間走去影番幾張靚相，心諗北斗星就普普通通，呢個係我下一個目標。
![]() |
▲元気のでるみそラーメン，即是叉燒炒蛋拉麵
|
![]() |
▲上一次到訪時計台時是冬天，今次則是夏天，感覺截然不同
|
![]() |
▲於大通公園走走坐坐，十分寫意
|
旭川
上咗架去旭川嘅 Super Kamui， 本來一程車可以由札幌去到稚內，但係既然經過旭川，又點可以唔食番碗旭川醬油拉麵呢？
![]() |
▲旭川的平和通り購物公園
|
元祖旭川らーめん一藏
見到まっぷる度介紹有一碗面頭成層蔥嘅拉麵，唔使諗，扑槌！嗰間舖叫元祖旭川らーめん一藏，啲醬油湯底十分清甜，令我再一次覺得我都係鍾意醬油多過味噌湯底。仲有就係30幾度食親拉麵都一定爆汗，最美味嘅拉麵，應該係旭川冬天嘅醬油拉麵。食完仲有時間行吓，發覺媽咪至愛嘅ピリカ拉麵已經執咗，下次佢唯有轉呔。發學有啲嘢黐牙，去便利店買咗枝用嚟清潔牙縫嘅嘢，去到車站個廁所攞出嚟刷嘅時候，啱啱有個外國人又喺度刷牙，兩個人於是起勢鬥刷。終於上咗嗰架去稚內嘅 Super Soya，要成三粒幾鐘，梗係霸個靚位舒展一吓筋骨同埋臭腳啦。
![]() |
▲有醬油、鹽和味噌味三種湯底選擇的一藏らーめん，既然是旭川拉麵，當然是選擇醬油啦！
|
稚內
去到稚內已經成 11 點，哇！周圍烏燈黑火，鬼影都冇隻，好彩果間 Dormy Inn 特別高，一出站就見到。Check 咗 in 後突然好肚餓，酒店又得杯麵，唯有出外搵食，但周圍嗰啲舖頭都閂晒門，剩番一兩間有微弱燈光滲出，好似仲未打烊，不過都係唔敢入去。行去車站方向，原來車站都閂埋，突然見到個人攞住便利店嘅袋行過，於是即刻循其來路尋去，終於搵到間一點鐘至閂門既 Seicomart，買咗個人間美味既照燒雞漢堡，有重返人世嘅感覺。臨瞓前，點都要試吓酒店頂樓個天北の湯，涼風陣陣，居高臨下，一邊浸一邊睇住稚內嘅景色，正！
============================================
感謝 關門這一家 提供以上資料
關門這一家的網誌: http://kwansh01.blogspot.hk/
============================================
