DAY1~香港→『東京都』秋葉原、上野→『北海道』札幌
一朝早去到機場，由於今次係用飛行里數換商務客位，check-in 後第一件事就當然係去個 Lounge 食早餐同上網啦。上到機，呢次終於可以試到新款嘅商務客位，雖然比舊嗰啲窄，但係可以成個人平瞓喺度，又真係正好多。兩杯黃湯落肚，未等到個甜品嚟就已經瞓著咗。落到機，以有史以嚟最快嘅速度過關，由閘口到移民局用咗兩分鐘，排第一，一分鐘就辦完手續，唔使等寄艙，即刻去檢查行李，全程5分鐘攪掂。先去換 JR Pass，小姐都話我咁好彩可以喺旺季買到北斗星嘅車票，真喺要多謝 Ellen。唔知係唔係好瞓得滯，喺成田機場兩度老貓燒鬚，先去錯咗京成電鐵嘅閘口，繼而用咗張指定席飛入閘，仲要勞煩姐姐仔教我 JR Pass 係要用無人通道嘅！
秋葉原
見架 Narita Express 去到東京都係5點鐘度，當然要去 Akiba 行個圈，滿足一吓宅男心願啦。不過其實都無乜嘢想買，Xbox 打咗柴，啲円又高，想買番布魯克個食玩，哇！成 3000 円，真後悔嗰陣喺香港見到 40 蚊都話貴，無買到。唯一安慰就係原本去開嗰間天や雖然執咗，後尾都喺電器街搵到另一間，今晚嗰個「駅弁」終於有著落。
上野
時間差唔多，去到上野，完成咗去一蘭嘅最後節目，就去月台等車，見北斗星仲未到，先去訂幾張之後嘅指定席車飛，有幸見識到摩打手訂票小姐嘅功力，快如閃電不突止，仲唔使我講嘢，識得自動跟我張行程表幫我訂飛，我都未O完嘴，嗰幾張飛已經出咗嚟。
寢台特急列車「北斗星」
北斗星終於到站啦，原來有大把人爭住影相，尤其喺車頭嗰度，無論係唔係搭車嘅都影一餐。影完相就拿拿聲上車，搵番我嗰個 Solo 個室，一入門口，就要上幾級樓梯，企都企唔直，原來佢同隔離間房相連，我嗰間係上層，佢嗰間係下層。間房裡面都冇乜設備，電掣都冇，好彩個電話喺飛機度叉咗電。之後去買咗張冲涼咭，9 點鐘可以去冲涼，先打個電話俾媽咪，阿斐仲話一啲都見唔到爸爸。醒起冇帶毛巾又冇梘液，唯有齋冲。火車經過郡山、福島、仙台，成 12 點都仲有人喺月台度影我地架火車，北斗星原來真係有佢嘅吸引力！
![]() |
▲火車剛到站，就有幾十人圍著拍照
|
![]() |
▲雖然在大陸及歐洲都坐過寢台列車，但在日本卻是第一次，十分期待
|
![]() |
▲寢台列車速度當然比不上新幹線，但多了一份去旅行的感覺
|
![]() |
▲Solo 個室雖然不大，但都算舒適，始終不需與陌生人同房，感覺較好
|
![]() |
▲車票於出發前一個月公開發售，但必須於日本當地購買，旺季更是一票難求
|
============================================
感謝 關門這一家 提供以上資料
關門這一家的網誌: http://kwansh01.blogspot.hk/
============================================
