DAY5~『青森縣』大間 (大間崎)→恐山→下北→八戶→『宮城縣』仙台
大間崎
成晚落住大雷雨，但喺起身後居然見到陽光，真係世事無絕對。將行李記存咗喺酒店，决定行去大間崎，希望唔會行行吓落雨就好啦。一路行經過嘅都係民居，迎住陣陣海風，寫意非常，行咗 40 分鐘左右就到咗。終於嚟到本洲最北端，同北海道只係十幾公里之隔，好天果陣可以見到函館山。之前去過本洲最南端既潮岬，估唔到無心插柳之下會嚟到呢個最北端，唔知幾時會去埋東同西呢？
![]() |
▲以マグロ一本釣聞名的大間位於本洲最北端
|
![]() |
▲風和日麗的大間港景色雖不算優美，卻多了一份寧靜
|
海峽莊
見到果間海峽莊開咗門，即刻去食番碗マグロ丼先。幅相明明有赤身、中トロ同大トロ，點解我果碗好似唔見咗大トロ嘅？啲赤身同中トロ亦唔及尋晚果啲，不過話雖如此，其實已經比其他地方啲マグロ丼有水準，2500 円都抵啦。食完，見到個天越嚟越藍，梗係又去影一輪啦。買咗少少手信就行番去酒店作為飯後運動。
![]() |
▲唔見咗大トロ嘅吞拿魚飯都十分美味
|
恐山
坐巴士坐咗成兩粒鐘就到下北站，話晒都係下北半島嘅門戶，點知細到連 Coin Locker 都冇，好彩隔離觀光案內所可以記存，仲免費添，賺咗！買咗個麵包，就向呢個行程唯一一個景點，日本三大靈場之一嘅恐山出發。嗰架巴士都幾好，有歌聽不特止，仲喺名勝恐山冷水停幾分鐘，於是即刻落車，用個水樽斟番啲泉水。原來佢嘅特色就係-冇味。一踏入恐山，立刻感受到一股氣，就係臭氣！四周都係一陣陣硫磺味，不過呢度有一份詳和嘅氣氛，尤其喺宇曾利山湖嘅極樂浜，同港式墓園有極大分別，起碼你唔會腍住去觀吓光。
![]() |
▲恐山有著一份詳和的靈氣
|
![]() |
▲慢步於極樂浜，令人頓時消除了世間的俗氣
|
下北
返到下北，走去頭先已經見到嘅すき家，終於食到今日遲來嘅午餐。告別下北半島，展開火車長征，坐普通車由下北去野辺地，由野辺地坐特急列車去八戶，再轉東北新幹線去仙台，一程比一程快。年底東北新幹線會去到青森，唔知會唔會係最後一次嚟八戶呢？不過好難估嘅，點估到呢三年會第五次去仙台呢！可以為咗牛脷去仙台，一樣可以為咗八食センター嘅燒海鮮去八戶啦！
![]() |
▲下北半島的門自就是小小的下北站
|
![]() |
▲估唔到件衫同東北新幹線十分襯色
|
仙台‧伊達牛たん本舖
去到仙台，放低咗行李就即刻去伊達牛たん本舖食牛脷，差唔多9點都仲要等位，最正嗰個極厚芯仲賣晒添，唯有食番 1.5 份嘅普通燒牛脷定食補數。真係唔明牛脷喺香港同日本其他地方都有啦，總係冇仙台嗰啲咁爽咁香嘅？
![]() |
▲仙台牛脷令人一試再試
|
《2010 北海道の旅》
2010 北海道の旅(一)~北斗星寢台列車
2010 北海道の旅(二)~東京到稚內的火車長征
2010 北海道の旅(三)~利尻島蝦夷馬糞海膽
2010 北海道の旅(四)~大間吞拿魚
2010 北海道の旅(五)~下北半島
2010 北海道の旅(最終回)~踏上歸途
============================================
感謝 關門這一家 提供以上資料
關門這一家的網誌: http://kwansh01.blogspot.hk/
============================================
