Day 17 2005-7-17 (Luxor)
住 :火車上 sleeping car
返到古納村抖左陣 ,隨即攞返架單車 ,向最後一個景點"哈根蘇神殿"進發
(Temple of Hatshepsut)
點解係幾個神殿之中選擇"哈根蘇神殿" ?
因為從書中睇到神殿既相片十分宏偉 ,所以就想去睇睇law~
沿住馬路踩單車 ,看到一架又一架坐滿遊客既旅遊巴係馬路上來往
不過佢地都係用奇異既目光望我...
但係奇怪既係 ,我只係係一早見過一個外國人同我一樣用踩單車既方式遊覽
據我所知外國人都好鍾意踩單車遊覽woo...點解無呢?
由馬路 short cut 踩入小路 ,總共踩左半小時終於到達哈根蘇神殿lu ~
係門口將架單車鎖係鐵欄 ,然後經過一條擺滿紀念品既大街
係有幾個攡擋見到有中東人包頭D頭巾賣 ,真係好想買呀...
其實黎埃及前都決定黎埃及後買頭巾黎摭太陽架~
不過一直都唔記得買 ,依家都已last 幾日 ,最後都係放棄無買lu...
入到神殿 ,竟然見到之前係曼谷一齊Delay 既一團台灣人woo !
我唸佢地個團都幾犀利 ,玩十幾二十日...
慢慢參觀完"哈根蘇神殿"後 ,就踩單車返碼頭lu ~
Temple of Hatshepsut
=====================================================================
但係係途中 ,竟然比我見到有三個十一二歲既o靚仔 ,一齊騎緊同一隻騾仔woo!!!
唔通騾仔真係咁噤挨!!!
其間當然有買我黎到埃及最鍾意飲既Lipton 檸茶啦~
原來我發覺係呢D咁炎熱既天氣下 ,有一罐咁冰凍既野飲
簡直係天降甘露一樣呀!!!
經過參唔多一小時既路程終於返到碼頭邊既酒店 ,還返架單車
然後再搭船返回東岸 ,已經係下午兩點幾lu~
====================================================================
午餐係麥當勞攪掂 ,然後返酒店沖個涼 ,跟住就做我最鍾意既節目 " 瞓覺 "
一瞓就瞓到五點幾
瞓醒係酒店露台影返張相先~ 好清楚咁望到樂蜀神殿呀 !
接著就係我係南部最後一個行程
參觀就近既 "木乃伊博物館"
入到 "木乃伊博物館" 燈光既效果做到氣氛陰沈
於是就攞本書出黎翻譯返館內牆上既木乃伊製造方法 ,
同對各木乃伊既介紹一個人旅行後 ,就會用呢種方法去旅行
去到任何景點都會攞本旅遊書出黎慢慢睇介紹~
參觀完木乃伊博物館後 ,望吓隻錶先六點幾
仲有兩個幾鐘先夠鐘9點既火車返開羅
於是又去麥當勞食完晚餐後 ,決定去尼羅河畔睇日落消磨埋D 時間
一個將軍既木乃伊
狒狒木乃伊
木乃伊既棺木
======================================================================
去到尼羅河邊 ,攞部電話出黎一邊塞住隻耳聽住MP3
一邊靜靜欣賞尼羅河既日落
唸住靜靜欣賞尼羅河既日落啦 ,點知無耐就有群不促之客黎騷擾我
就係有一班頑童係我前面玩 ,又要我同佢地影相
我好記得當時我係聽緊一首舊歌 "夜遊杜拜" 細味緊當中既歌詞時
而比佢地黎騷擾我...
班頑童攪左我十分八分鐘後終於走左lu...
唔知點解日都落晒 ,磨極都磨唔到9 點鐘
於是早D去火車站既月台等車 ,點知最唔想見到既野就出現係眼前...
一邊聽歌一邊睇日落
攪攪震既頑童
====================================================================
由於我早到左 ,所以見到早半小時 ,我想買而買唔到飛既First Class 火車埋站
見到火車內既人零零落落 ,半架火車都坐唔晒
咁點解最初果個死人售票員,呃我話日日都 full 晒呢? 真係激到我死呀!!!
因為 First Class 既火車都十分舒適寬敞 ,只係收幾廿蚊埃磅 ,
即係幾十蚊港幣咋!!!
但sleeping car 只係多左張床 ,就收我六十幾美金 ,覺得好唔低Law...
正當我十分激氣 ,想搵個人呻吓 ,就向坐我隔離一齊等車既一個埃及人
呻吓買唔到飛而又比我見到車內無咩人搭既事...
點知佢就答左我幾次 " I'm engineer "
問非所答 ,唔通engineer 就好巴閉咩!!!
等左無耐火車終於到lu~
流浪亦到左尾聲 ,明天一早就會返到開羅啦~
幸運既我又係一個人瞓晒一間房~
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
