2005-07-06 Day 6 住:蘇伊士運河HKD約$200
一早食過Milly整既早餐,我地一行4人(我,阿
泰,Milly,大力)就出發前往我今次既重點Dahab,並
且多謝阿泰抽空陪我玩!
其實我整個行程都係唸住一個人玩唔想打攪阿泰架!
黎開埃及唸住係阿泰度借宿一兩日...點都估唔到阿
泰竟然有時間陪我玩woo!
我點解咁想去Dahab呢? 其實我一直有做開旅遊既
剪報,係睇返呢d剪報,發現原來之前新假期介紹個呢
個未被香港人開發既地方 - "西奈半島" ,Dahab就
係西奈半島既東面, 本書講到好靚,好有渡假feel,
於是我就決定今次一定要去Dahab!!!
Dahab係一個係紅海另一面既新興旅遊景點,主打
既係未被污染既海水,紅海係十大潛水聖地之一;佢
離開羅好遠好遠,約千幾公里,無火車
到達,要橫過一個大荒漠才到! 主要歐美及以色列遊
客為主,香港仲未有旅行團去架!
不過同阿泰傾完後,佢竟然話樂蜀,阿斯旺等埃及著
名景點通通未去過,只係係開羅工作! 不過我都明白
佢係黎工作唔係玩既...但Dahab佢早一兩年已經去
過啦~真吹脹!
出發前,我地去左係香港執晒笠既"家樂福"大型超市
買左d游水用品,同埋一箱水,因為阿泰話一年前
Dahab無淡水woo,要用礦泉水黎沖涼...最後買左
幾百蚊,阿泰爭贏比錢,o個個阿泰好似d阿叔咁成日
爭找數...
食完晏後,我地驚太晚,不能到Dahab,所以決定去蘇
伊士運河住一晚,於是我地坐阿泰既私家車, 其間我
都有揸車,我特登係香港用$80挪個國際牌架,揸左
軑車感覺好得意!
係香港執晒笠既大型超市"家樂福"
出發前與我地架戰車合照
係公路見到既坦克車
======================================================
開左幾個鐘頭車,去到蘇伊士運河附近,住海邊既酒
店,一間房約HKD$200,放低行李後,我地立即進行
下水禮,感受下紅海既海水先!
雖然沙灘同水質都係一般,不過可以接受; 由於呢度
係蘇伊士運河既出入口,所以不時見到d大型油輪係
對開海面經過...埃及人係信奉伊斯蘭教,女人既服飾
大多同中東人一樣穿長袍,傳統既甚至包埋個頭
只係露隻眼出黎,不過得意既係,佢地遊水期間全部
都唔會除,連頭紗都帶埋遊水架~
到左晚上,我地係沙灘,瞓係沙灘椅上睇星星,我當然
坐開少少唔做電燈膽啦~ 成千上萬顆星星,仲不時有
流星出現tim,雖然唔係好大粒,畢竟係我咁大個第一
次見到流星,真係開心!!! 於是我便聚精會神咁等
待流星既出現...
就係呢個時候,"大力"話佢依家好掛住屋企既老婆,
兒子及女兒,我隨即唸阿爸阿媽年幾唔大又唔使我
掛,咁我可以掛住邊個呢... 看見阿泰同Milly多麼的
幸福...於是我看著美麗既星空,默默沈思...
我同"大力"住頂樓,阿泰同Milly住二樓
室內分為兩間房 , 我瞓呢度 , 大力瞓隔離房
露台望到對開海面不時有大油輪排隊進出蘇伊士運河
翻譯"大力"
酒店被一片黃沙化包圍著
我地就係呢度睇星星啦~
今日行程
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
