2011-03-18 & 19(Day 41,42)
住宿 ：航班上
行程 ：荷蘭AMS --> HKG
係1300時到達阿姆斯特丹(AMS),關員Block左登機閘口截查假証,對象係南美人,中國人竟少有被放行喎! 不過排隊時有見到影衰晒既強國人打尖,人地個個係登機橋排隊得有秩序,你就要係旁邊D空隙打尖行前,唔通要D人排到塞到無空隙,先制止到你打尖???
同隔離果個宣洩不滿其間,後面打尖既同路人聽我鬧可能感到羞恥,乖乖排係我後面... 係羅...咁先至係個有文明既中國人嘛~
由於晚上先登機,係AMS等候其間都不愁寂寞,有小型圖書館,又有畫展行,好容易打發時間~ 不過機場提供既Free Wifi就有時間限制...
選乘KLM荷航,2030到達登機閘口等候登機,仲以為去錯閘口Tim...因為發現等候登機既華人,9成9都係內地人,仲要有好多國內BB...大獲啦...有咁多BB即永無寧日啦...
係機上服務我既係一名香港兇姐,佢既心情極之飄忽,就一上機已經要受佢氣啦! 事緣有一名心臟病人事,因事先無同航空公司說明,而機上亦無有關裝備,所以呢名病患者要off load; 攪左好耐又未起飛,個人迷放鬆吓囉... 當時啱啱買完野既膠袋,掛左係前面椅背放雜誌既位,個兇姐行過,突然高聲態度惡劣用廣東話講:[個袋唔可以咁擺架喎!]
嘩! 我鬼知你地攪掂晒準備起飛咩! 態度唔可以好D架咩!
雖然內地同胞D所作所謂有時都幾過份... 就呢程機而然,我一上機就入廁所,已經有塊屎片係地下...“淵賓爛嗅”! 唔通佢地唔知廁所內有垃圾桶??? 我無證據唔敢講係乜野人做,但係機上既BB十個有九個都係國內既...自己猜測吧...
及後前排既國內夫婦,就手持一塊剛剛換完既屎片,一截就截停個兇姐叫個兇姐掉尿片... 睇住個兇姐發火用廣東話大聲講,叫他自己拎入廁所掉入”垃圾桶”! 唉...
搭到中途又輪到我啦... 話晒長途機半夜有一大段時間係無餐食,而飛機雜誌上講明亞洲航線係有杯麵提供的,於是當時女友去開廁所咪係廚房同兇姐講囉,點知返黎講反比我知個兇姐黑面回應:[你睇唔到我依家做緊野好忙咩,唔得閒招呼你!] 真係乜野態度呀!!! 我就真係”興興地” 如佢真係再對我咁一定Complaint架!!! 難道我地華人就唔係佢既客咩? 我相信同一番說話如出自西人把口,個兇姐回應一定不同! 就算國內人點過份都好,都係你既客,你要照顧唔同類型既客人! 個個都係真金百銀買既機票,點解要睇你面色呀!!!
![]()
半小時後,個兇姐竟然記得喎!!! 仲心情大好,好有禮貌咁送上杯麵,真係想投訴都怒氣盡消啦! 不過見個兇姐就算服務對象係內地人,都盡量用廣東話噃~
其實全程機,真的國內既BB家庭零捨嘈,前面及再前幾行既BB經常喊,
喊到個媽咪都不停鬧,仲嘈過BB D喊聲... 而外國人既BB,就真係比較乖,唔知係咪又真係咁啱...
最經典一幕係即將降落香港時出現,話說即將降落,空姐要逐個檢查每個乘客,確保做足安全措施; 唔知呢班機上D內地客係咪真係少搭飛機,好多都要空姐提醒扣上安全帶,或將行李擺好,耽誤左唔少時間...當巡到我前面既內地BB家庭時,只見佢地將幾袋行李,BB用品散到一地都係,BB亦都用手抱住無放係BB床上... 個兇姐即時話佢地唔可以咁做; 內地家庭仲處之泰然慢慢來,見過兇姐都發晒忟憎,快快手將地上既行李放上行李架... 都未放得晒,機長已廣播話即將Landing! 見到兇姐手忙腳亂,仲未Check晒呢個倉D乘客,此時兇姐突然高聲彈出一句,“痴~~~ 線架” 個痴字仲係高8度Tim!!! 個兇者睇黎情緒都就崩潰囉...
無繼續檢查就即時返回座位等候降落... 唉... 點解又會咁架... 呢D行為又入晒外國人眼中啦... 就係咁，就用左[痴〜〜線架]呢三個字來結束南美之旅！
