Day 20 失而復得(格陵蘭Nuuk)

由新銀仔於 2013-11-20 00:00:00 發表 | 累積瀏覽 448

分類：

(Day 20) 2012-10-10 晴

住宿：Seamen Hotel

行程：Nuuk

今早起身有個奇怪諗法，見今日又咁多時間，不如係極地Greenland 跑步也不錯噃〜於是食早餐時就睇地圖，跑D我尋日無去過既地方先〜

食飽早餐返房間又hea一陣先去跑步，換上一身完全唔pro既T-shirt短褲去跑；一出戶外⋯⋯
好鬼寒呀！跑步時好大風，雙手冰冷及凍到耳仔好痛呀！寒風下個人跑到好似行路咁慢，亦都可能我平時都極少跑步呱！沿馬路旁既行人路跑，當大車駛過時揚起既灰塵好勁，所以跑一段去到另一面既港口就回頭Lu... 返到酒店hea左一陣，近呢一兩日先沈迷打機，呢隻game download落部I pad 成年依家先玩，係隻射鬼既推錢機⋯⋯ 唔得！我黎旅行架，唔可以沈淪架！於是磨左個零鐘先死死氣沖涼!

@1330

話明Seamens House,酒店內當然有擺設啦~

其實今日想試新野，不過出門口時都1415，唔想再搵所以又係Chili，當食完野準備起行時發現係冰島買既冷帽唔見左既？於是係餐廳內周圍搵但無發現⋯ 可能早前洗完頭個頭未乾拎住行而遺失，於是行左返轉頭一段路又無••• 唉! 計計吓後日係冰島轉機，班flight係0900，D舖頭都未開門，即係買唔返；呢份買比自己既手信我好鍾意架！攪到成日都無晒心機••• 行街時見到兩次第一日車我去機場個當地男人，佢仲叫我一齊食晚飯，我真係無乜心情••• 諗返起都唔記得好好報答他tim！

後來心裡再盤算，頂冷帽係冰島未退稅喎！依家得張單無件貨比佢睇，萬一唔退比我迷雙重損失？於是去警署諗住make 個Lost report ，到時有個証明比冰島退稅，又可返港claim保險，一舉兩得！

去到警署，警察好友善咁聽我要求，不過最後佢講，丹麥與格陵蘭既警察，無唔會做Lost report的，除非是Theft 或者( stolen) 先會同你開case••• 之前一直有同人講開呢D問題，好多人去完大眾口中所謂歐美先進國家，係當地唔見野，只係想簡單做個Lost report跟本唔會受理；之前機場工作接觸到一名遊客，佢就係係差不多全歐洲最好既瑞士唔見了銀包，當地警察一樣唔受理，要賴死下才肯做，不過就只開一個item（HK ID card)! 其他如credit card, cash通通唔加上去，即係等於無報過案！要返來香港第一時間做報失。不禁諗返，香港人真係要乜有乜，肯開聲肯鬧就如你所願，香港人係咪真係身在福中不知福呢？

行街時買多包Musk ox乾同買左D手信擺設比自己，又係成日係街望到既天橋cafe飲左杯鮮搾橙汁，$12-DKK 算合理〜

於是垂頭喪氣咁回程，途經Chili餐廳玩吓當地人沈迷既老虎機解吓悶，點知比我贏左$50-DKK 喎！真幸運！