續(Day 11) 2011-02-16
住宿 :Hostal USD $57
行程 :Montevideo
原本諗住下午搭車去東岸城市Punta Del Este，不過由於尋晚住左晚nopay民宿，所以要更改行程，請”瑪架"食餐好既先搭夜車走!
就係因為更改行程，旅行上最可怕既事終於發生左係我身上啦!!!
請"瑪架"去到Lonely planet介紹，話D牛扒大件到你食唔晒既港口市場，亦都係今次南美之旅，味覺上最想去既地方! 但去到先知1800已經關門Lu… 於是係市場門外，有幾間看似高級既餐廳，揀左一間請”瑪架”据扒； 牛扒大件唔錯噃~
3人食左 $1300 Ur peso (約HKD$ 600)
@1900
港口市場外既餐廳
食完後”瑪架”送我地去碼頭搭車，但她先帶我地路經佢阿姨度交租，就係咁… 我遇上了可怕既事，搶劫!
沿住港口市場背後果條街行，其實都係同”瑪架”住既同一條街，很長吧! 但就完全唔同!
這裡每隔老遠先有一盞好暗既街燈，入黑後黑麻麻，街頭兩旁坐滿無所事事既人，有流氓、有小孩、有一家大細手抱嬰孩⋯目光都注視著我們背住行李既背包客，此刻我恃住有本地人帶住，毫無危機意識…
其實自餐廳既露天茶座時，已經有個小朋友來乞錢； 當進入呢條黑麻麻既街道，已有一兩個人流氓一直跟住”媽架”，同”媽架”搭訕，跟左我地個零街口一直雞啄唔斷； ”媽架”話特登同佢地對話，等佢知道係唔怕佢地喎! 不過剛講完呢句說話，被身邊兩位女士既尖叫聲一嚇，看到有個一直同”媽架”對答既青年突然發難!!! 一手扯爛女友既斜咩袋條帶，成個袋比佢搶左去! 我當時背住大背囊又拖住行李，距離佢地兩、三個身位，都黎唔切做反應! 眼白白睇住三個賊人走左上一座樓…
個袋有所有既現金, BNO, Credit card等等… 果一刻勁徬徨，個腦空白一片… “媽架”話警署就係隔離街，叫我地去一齊報案喎⋯ 但唔知點解我總係想留係現場望住層樓，於是淨係叫”媽架”去幫我地報警⋯
當瑪架行開後，我曾經諗”媽架"會唔會係同謀呢???
個賊人唔知係咪見我地係樓下賴死唔走，派左個靚仔落樓，掉返 D passport, Credit card同個爛袋比我地，唔通真係盜亦有道???
再呆等多兩分鐘，見有架警車經過，緊係立即截停並指住層樓示意被搶啦! 4個警察立即落車，一個守住樓梯，其他上樓捉人!
無耐”瑪架”好快call左幾個警察來(Sorry，曾經怪錯瑪架tim…) 之後”瑪架”叫我地唔好咁擔心，帶我地去案發現場，只係十零步既阿姨屋企等； 去到佢好有品味既阿姨屋企，等左廿零分鐘，有個警察敲門話追捕時拉左一個人，另外兩人經天台逃去，搵返小小失物，不過D錢就無噃…
於是坐警車去差館落口供，係差館有兩個北歐女仔，被搶劫正在報案…(起初仲以為佢地濃妝艷抹係妓女比人拉左，真白痴)
嘩!!! 呢區真係咁危險??? 被Lonely planet喻為全南美最安全既國家之一，竟然被搶!
日頭逛街時真係感到好安全好舒適噃! 不過掉轉諗，如果唔係”瑪架”都唔會行去果條漆黑一片既橫街，就算入左去見唔對路都即時掉頭走啦! 再者有”瑪架”當地人陪同，完全無左警戒心…咁樣係香港咁安全既地方都被搶啦!
係警署落口供時，全程由”瑪架”翻譯，烏拉圭差人我諗落後香港二、三十年呀! 差館極之簡陋，認人時只係熄滅我地身處房間既燈，出面既犯人就見唔到我地； 落份口供又等左好Q耐先有人同我地落，落完口供要返份副本來Claim保險，就好似”矮契弟”咁先有! 仲要等左成粒鐘先有!!! 火滾呀!!!
所以”瑪架”話就算D錢搵返，都比D差人據為己有! 我相信絕對有咁既可能!
偷影差館
今次算係不幸中大幸，淨係唔見現金! Passport,credit card都比返我地，可算盜亦有盜! 去旅行反而錢係小事，最珍貴回憶既傻瓜機係女友褲袋，而單鏡相機係我既斜咩相機袋~
可能賊人就係取易不取難，一來被搶者係女性，二來手袋既皮帶脆弱，一扯就可以扯斷… 呢次算係一次好好既經驗吧!
最後”瑪架”帶我地到市中心既一間Hostal，橫掂到被搶，唔瞓Dom! 豪D用USD $57住一晚獨立房先~ 聽日先再諗匯錢、ATM draw錢邊樣最化算先!
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
