(Day 4) 2013-06-13 雨/大霧
住宿 :西伯利亞列車上
行程 :Listvyanka --> Sljudyanka --> Ulan-ude
一早起床，望一望個天好厚雲已心知不妙，點知係刷緊牙時下起傾盆大雨... 趕時間都無計，要冒雨起行，我就失策，無帶Gore-tex... 好在係房內咁啱有幾件用過既即棄雨褸!
好在去到馬路就截到架順風車，但短短既幾步路足夠令好多遮唔到既部位濕晒！司機一車就車到去上船既碼頭附近； 原來碼頭就係村口位置，如果步行前往真係好遠架！ 落車時比左$100-RUB(約$3-USD)。 於是就企係路旁既一把大傘，遙望碼頭，等候0845開出既船。
@0800
上船時遇到一個來自台灣既旅行團，稍後會一齊乘環迴列車。
船程約20分鐘就到達對岸，火車1040發車，仲有半小時係火車站附近逛逛...
貝加爾湖環迴鐵路曾經係係西伯利亞鐵路的一部份，亦都係最經典既一段! 現在已變為遊覽列車。詢問台灣團既當地導遊，原來不知不覺已改坐新款既列車，舊款既蒸氣火車已泊埋一面供人拍照了... 搭唔到蒸汽火車真係極度失望⋯
由於車票我無一早預定，只係早兩日係伊爾庫茲克買，買飛時已知要分開坐，但好在都相隔好近，不過湖在左面坐位位置，我同港女就坐右手面... 列車全程龜速行駛，方便觀賞貝加爾湖，但今日天氣又多雲又大霧，就算坐係望向湖既方向都係只見到白濛濛一片！
![]() |
| 上圖湖景，下圖係我坐既山景 |
整個行程停低好多次比乘客落車遊覽，由於今日大霧，整個行程有如進入仙境一樣！ 睇黎天氣差都唔係一件壞事噃~ 我更係其中一處既路軌，以山窿作背景，彈奏一曲我苦練但未熟練既Imagine 啦~ 務求係世界不同既角落能夠演奏一曲~
![]() |
| 呢張相係我整個行程最滿意既照片 |
![]() |
| 左下係早前普京游水既地方 |
![]() |
| 早途站小村莊的小販，我都買了午餐 |
漫長既車程，係1830到達Sljudyanka, 全車好似只係得我地兩人落車，因為本車終站係返去Irkutak;
離開月台，原來早前同一班車交談過既當地導遊，都主動上前幫忙，有一個仲一早走左去火車站幫我地問定資訊tim~ 真係好感動~ 最後接受台灣，北京遊客及俄羅斯導遊祝福後，就同佢地分道揚鑣。
@1833
![]() |
| 翻查維基，呢個站係全用大理石而建架! |
![]() |
| 竟然有中文 |
見仲有差不多六小時先夠鐘，無理由呆等架! 火車站附近有座興建中既東正教教堂，參觀過後發現這一帶一片死寂⋯ 於是同港女冒險穿過無路人既住宅地帶，步行半個小時後，終於算揾到有點人氣既地方!
Sljudyanka係一個超市小鎮，路經二十多間超市，都搵唔到一間餐廳⋯ 唔知點解係呢個完全陌生既小鎮，拖住港女隻小手，覺得係一件好回味既事，呢種感覺係其他既旅遊地點絕對搵唔到既! 最後好不容易先揾到餐廳食晚飯，$670-RUB($150-HKD), 晚餐好好食，有一味好似我地既小炒，紅椒菠蘿炒雞球~
![]() |
| 超市超市超市⋯ |
![]() |
| 呢度都有火車頭 |
列車2353準時埋站，拍完一張照只係遲左10秒上車，個職員已收左條梯！ 由於這班是西伯利亞鐵路，係由莫斯科開往海參威的，所以我地上既係中途站，仲要半夜三更上車，車上既人大部份都熟睡，而我地就擾人清夢了... 我地瞓既係平民卡，無房的，仲要係上格床，又要搬行李上行李架，又要鋪床... 都唔好意思攪咁多野lu... 衫都無換即瞓！ 瞓幾個鐘後0400起床！
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
