2012-03-11(Day 3)住宿 ：Hotel $130-LT = $390-HKD行程 ：立陶宛紐維爾斯--> Trakai --> Kedainiai
波羅的海寒冷指數:-2![]()
![]()
今朝瞓到自然醒,瞓左成十個鐘呀~ 今日去既係全立陶宛最出名既景點, Trakai既水中城堡~
1045到巴士站,可能剛走左班車,只能買到1210去Trakai既巴士 $6-LT($18-HKD)買飛時付送埋有回程時間既紙仔,唔錯既服務噃~
巴士總站![]()
![]()
見仲有個零鐘,行埋過隔離既火車站睇吓D資訊先,晏晝1730原來有班車去Klaipeda喎！睇吓一陣去完Tarkai返黎幾點先~
出到室外,以為又落雨,點知細心一看,再望埋大褸既衫袖,跌落黎”達達聲”既原來係雪黎架~
![]()
半個小時既車程,好快就到左Trakai啦~ 一落車就比一個結左冰既湖吸引住啦! 瘋狂拍攝一番先~ 呢度仲有幾間B&B係湖畔架~ 都幾吸引噃~
小鎮地圖![]()
![]()
湖畔B&B![]()
沿住大路行,半小時既路程,比我一路行一路影相變成一個鐘！終於到立陶宛最出名既景點啦！我估最出名,因為係網上打立陶宛,就總會見到水中城堡既圖片！
不過我冬天來到,湖中城堡變左”冰”湖中城堡呀！別有一番滋味呢~ 沿路行仲見到有人係湖中心鑽窿釣魚Tim! 我都行落結左冰既湖影返張相先~
![]()
![]()
點解雀仔唔怕凍既?
城堡內部
湖中城堡只而遠觀,我係收費處影了張內部既相就走Lu~ 臨走前係湖畔既餐廳食個set lunch先~ $21-LT($60-HKD)有Free wifi,明知遊客區實貴既,但一定要係呢個美景下享受一個午餐！
好好飲熱辣辣既番茄湯+豬肉角仔~ 仲有一杯可樂~不過我覺似得小食多D囉•••
食完就回程Lu, 急步行都要半個鐘呀！因為趕住搭1545返紐爾維斯既巴士
1620返到維爾維斯,返Hostal攞返個背囊就去火車站,買左1730去Kedainiai既火車票$23.4-LT($70-HKD)
點解有第二大城市Kanuas唔選擇而選擇kedainiai呢? 因為我就係鍾意果度無乜人去過,而且又係我聽日要去十字架山既中間點! 再者我鍾意去小鎮多過城市,所以就諗住今晚係果度過一晚！
買完火車票見仲有時間,緊係食野啦~ 醫飽肚先上路嘛~ 係火車站內既餐廳,點左個pasta $12-LT($36-HKD) 同飲可樂~
火車車窗外面污糟糟咁,攪到個窗蒙查查,沿途只係隱約咁見到一片森林•••
個半鐘頭既火車,係1900到左Kedainiai,一落車唔係好對路,火車站外圍烏燈黑火既,連街燈都無•••唔同歐洲其他大城市既火車站,睇黎呢度都無住宿...
係火車站見到D人全部都有私家車接,遠處既巴士站有架1號巴士上緊客,緊係即時上車啦！$2.6-LT, 經親切又熱心既乘客指示下,搭左5 分鐘就係市中心落車Lu~
市中心一樣烏燈黑火,我諗呢個係一個好細既小鎮黎！(心諗賴野勒… ) 於是係條黑麻麻,人影都唔多隻既街度搵住宿,有D驚比人溶左呀！
路經有三間望落高級既酒店,分別三星同四星,我就唔信無平價hostel...於是再兜多個圈都無喎！於是經路人指引下,原來全鎮就只有這三間酒店,再無第四間•••
於是求其入左間三星既 Namas Hotel,問價後一晚要$130-LT = $390-HKD,咁既格局都合理既,上到房極之滿意呀~
酒店有free Wifi,上網搵呢度Kedainiai既資料,就算係Lonely planet forum都無人去過呀••• 再開I pad既立陶宛既Apps,有介紹呢度架! 原來係全立陶宛最古老既城鎮之一呀！ 個App仲話我住既酒店座落既呢條街叫Didzjoji g.,更係old street tim！
而我住呢間酒店,都係App唯一有介紹架!!! 話係正old town 既中心,係17世紀已有啦~ 咁樣差不多4舊水一晚都幾值噃~
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
