(Day 11) 2014-5-30
住宿：Thony 1 Guesthouse
行程：琅勃拉邦
由於尋日買定今日既巴士票去”風沙灣”，我咁樣傷法邊度都唔使去啦! 比左張票比婆婆個仔，佢話幫我改期喎，我話唔使啦，自己盤算休養耐D，唔再四圍去啦!
其實堂大佬都叫我提早返香港，但我覺得現在周身傷仲要舟車勞動咪仲辛苦! 好在仲有大把時間，慢慢休養~
一早去最近既餐廳食早飯，睇黎有排係呢間餐廳食了，因為近，我又唔太方便，半身包著繃帶，而附近都無乜餐廳($22-HKD)
食完後去租車既舖頭，原來間舖頭只係Agent黎，話要帶我去租車公司相討賠償，我話周身傷唔想去，要幾多迷賠囉! 唔知佢聽唔明定一定要我去，就用電單車載我到不遠處既租車公司； 見返尋日架電單車，好在唔係好傷，甩左兩個燈蓋，同左邊車身有點花，經尋日個年青職員點算後，賠左$400多港幣；
及後有個漂亮女孩出來，細看下那女孩長髮披肩，皮膚雪白，穿一條白色連身裙，感覺清新淡雅，長相有點像香港既黃翠茹！這種女孩來到寮國未曾見過的，當地女孩通常皮膚頗黑，所以佢有種萬中無一既感覺！當然不是驚為天人果種啦！但佢竟然係一家租車公司既老師闆更難以置信！
佢先講解電單車話損毀不太嚴重，賠償不太貴，及後關心我傷勢，並留我同職員們一同食午飯Tim~ 太好了，免費梗係食飽佢啦！
午餐係寮國style，與老闆及職員們一齊食，當地人主要食糯米，用手拿一舊飯再加點餸就放入口，餸就係牛雜
食完午餐後，我見膊頭既傷口出水，已濕透厚厚既沙布，連衣袖也弄濕，老闆娘就二話不說，用私家車車我醫院。
去到醫院等了一陣就到我，診療室裡基本上全是外國人！ 嘩！ 發生乜事呀!？
今次呢個醫生面口麻麻，搣甩緊貼著傷口既沙布時當然痛到忍唔住大叫啦！老闆全程充當翻譯； 當清洗傷口後，見老闆比了幾美金個醫生，（咦！我尋日都無比喎）醫生話進展唔錯，反而係右手掌心差D，並叫我三日後覆診喎～ $139-HKD
排隊時遇到個德國人，話佢太太玩騎大象，落地時跌斷左手喎... 仲大家都有同感，覺得係第三世界國家，唔係大城市都有間咁既醫院同服務，價錢又便宜唔屈遊客，真係好唔錯了～
洗完傷口老闆車返我回公司，係公司教左個年青職員Siay一陣普通話數字後就回guesthouse ，唔教咁多，自己都半桶水⋯
年青既阿Siay原來係呢間租車既老臣子，他只有18歲，佢話12歲時當老闆Say開舖時已經幫手啦! 現在已婚仲生埋小朋友Tim! 佢其實睇落都仲係個稚氣未稅，不過落後國家通常都係早結婚。
臨走時老闆相約我食飯... 都好！佢幫我咁多，又車我去醫院，等我請返佢！
晚上年輕職員Siay駕駛佢boss架辣跑電單車來接我到公司，關舖後老闆駕駛佢架辣跑電單車，車我去食飯； 雖然係辣跑，但沿途佢開得好慢，我係後面，微風將佢既秀髮輕灑在面上，心跳不禁加速...
晚飯去食當地傳統火鍋，就像香港既打楩爐加韓燒二合一！但就係三十幾度高溫下對住個火爐⋯
傾談間發現佢並不是普通女子，原來佢竟然同我同年35歲，已有個女16歲大啦！ 但已離婚了十多年… 但佢外表頂多只有廿多歲，夠竟有乜駐顏術？ 興趣全是男人玩意，電單車，射擊，槍既型號十分熟悉! 佢係公司亦有50架電單車之多，亦曾辦學校，不過已荒廢，而佢係首都萬象也有舖頭賣衫，真係估唔到！ 一個嬌滴滴既女仔點可以做咁多野架！
原來佢話爸爸係警察，一家人住係首都，打本比佢做生意既，我相信呢d可能係民脂民膏… 佢話想寧靜，就自己一個在琅勃拉邦喎。佢個名叫Say，乜當地不論男女個名都差不多架!
諗起剛才與佢既種種畫面，免得她誤會，我都主動話佢知我已有港女⋯ 佢聽後都好開心，仲話我將來結婚影相比佢睇tim~
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
