(Day 10) 2014-5-29
住宿：Thony 1 Guesthouse
行程：琅勃拉邦
晨早5點，婆婆像媽媽叫醒我起床，其實我已被傾盆大雨所嘈醒，婆婆為我準備好飯，用傳統既竹製飯壺裝住，並為我帶上像頸巾一樣既巾打斜咩住，就冒雨出發去布施！
布施時每人都要低過僧人以示尊敬，所以我學婆婆咁去到有瓦摭頭既簷蓬，搵野蓋住濕地坐係度； 以我所見布施既人大部份是長者，睇來新一輩已不是虔誠，可能不久將來又一個傳統消失了… 而今天不知是否落雨關係，也見不到遊客，今天的僧侶可能無飽飯食了…
清晨時份一隊隊既僧侶，一個跟一個於街道上接受布拖，布施時用手攞一細舊米飯放入齋鉢，直到最年老既僧人都經過後就布施完畢！
布施完再瞓，瞓到0900食個唔飽既湯麵，食完租電單車$120/per day，去南部既Kuang Si 瀑布；呢度租電單車唔需要車牌，而騎電單車算是我第二次吧！ 對上一次一年前回鄉探患病既姑媽，試揸過約30米咁大把！ 取車時雞手鴨腳，之後好快純熟了，其實跟踩單車差不多，只不過行機器啫～
![]()
|
|
整個城鎮都係世界文化遺產，睇開我遊記都知，我無乜理會世界文化遺產，都不用多講! 近來祖國有兩申請成功，話成功會令到好好保育喎! 唔通唔成功就唔去保護？ 真荒謬!
|
![]()
|
|
賣生果姑娘，已幫襯
|
先去入油，$25-HKD已可打爆油缸，好抵！ 之後路經參觀兩間寺廟，食埋午飯就出發去三十多公里外既Kuang Si瀑布了！
![]()
|
|
鎮內每逢有通往寺廟既通道，都好似龍珠裡既蛇道咁! 我係咪去搵界王呀!
|
![]()
|
|
又係識講普通話
|
一路無事，只是路面偶爾有凹陷情況，問題不大； 約一個小時車程就順利到達瀑布，泊車$2-HKD，入場費$25-HKD，正進場時聽到打雷聲在山頂發出，並下起微雨來… 勢估唔到呢場雨將帶來不幸…
一進園內先經過熊保育區，黑熊真係第一次見咋！ 這個保育園，列出熊不人道既待遇，這些電視也睇過，困係好細個鐵籠裡，被鐵通插穿膽囊取膽汁，雖然無講邊個國家，但係唔使講到明啦！ 離開時經過一個捐款箱，放下少少心意，為國民積點陰德吧…
沿小徑一值上山，水流經一個個既水池拾級而下，有點像九寨溝，不過我相信世上類似這類的自然景觀都好多既，就好似克羅地亞也有一個～
最低既水池可以游水，所以濟滿了人，而我則繼續前行，沿途不停看見港人口邊常覺得優越民族既西人，係不準游泳既池游水！
於是上到一個近瀑布既位置就唔打算登頂了！沿路落山，拍了幾張滿意照片，並係璧綠既水池中浸一浸，雨開始越來越大時，就離開瀑布公園了。
![]()
|
|
呢張好攪笑，模擬對白：天降洪水，快D走呀!
|
冒雨回程，開頭仲開得幾快Tim! 到後來多灣並落斜反而慢了下來； 睇住路旁既石柱，距離琅勃拉邦開始進入倒數十公里八公里階段，而雨帶亦被我穿越，雨停了，只淨下路面濕滑；
其實這時已經放慢車速了，一個不留神見路面有個缺口想收慢車速之際，冼軚倒下了… 記得當時係滿佈碎石既路上左邊身落地滑行左一段，個人都暈暈地呆在地上，望著身體各處既傷口，血，開始流出來了，地下小水氹漸漸變為血水... 而斜咩既相機袋亦在我身邊只是打開了... 不一會感覺有人從後夾住我格勒底扶我起身，原來是頭先曾被我爬頭既當地人；後來再有接滿遊客既專車停下來協助，車上有兩名熱心外國女子用水幫我清洗傷口，傷口上也佈滿了沙石，沖洗時痛得死去活來！
感謝剛才兩個當地人、兩名替我洗傷口既女遊客，也感謝旅遊專車送我到醫院。
去到醫院醫護人員第一時間替我治療，脫衣服時發現整個左邊身，由膊頭到左腳，及右手掌全是傷口，範圍都幾廣！ 第一樣就係洗傷口啦！ 再次痛到叫苦連天，真係非筆墨所形容呀！
洗傷口都起碼洗左成個小時呀！ 由於言語不太溝通到，我依稀聽得明好似問我有無錢，如肯pay就幫我打針及開藥，我當然pay啦！
最後拮左兩針，一針pat pat，一針手臂，而藥也是兩種，相信是止痛藥及消炎藥； 最後賣單都只係$179000-KIP即$179-HKD，真係好抵呀！
係第三世界既國家來講，也不是大城市，這樣服務好過好多地方了！ 記起不時聽到國內新聞，醫院要先付錢，無錢值頭唔理你，話之你死！ 呢度算係咁，先做左D基本幫你洗傷口，才問你需唔需要付錢注射藥物。
我相信好多港人去到落後國家，未必夠膽食或注射當地處方既藥物，但以我所見這個國家人人心地善良，大部份都不貪錢，所以我好放心將身體交給醫生！
國內講都嘥氣，淨係以為引以為傲既香港，以前我係機場工作既時候，見過不止一次有遊客係禁區內遇上不適，見頭暈（其實無暈，大多不太嚴重），駐機場既私家醫生及其醫護人員就會浩浩蕩蕩而來，替不適者診治，二話不說就替不適者拮下幾針，其實都講過幾句既，當時家屬慌亂，梗係信醫生啦！ 診治過程好快，但費用高昂，我見幾次都千幾二千港幣… 不論醫生診治得正確與否，但整個過程快，而不適者看似病情輕微（醫生係專業，可能覺得嚴重）身為香港人都覺得肉酸，好似當正不適既外國遊客係一大塊肥豬肉咁！
當我治療完後，原來既衣服，褲也佈滿泥濘，都費事著上身，就咁著住條孖煙通出去由醫院職員替我截車，起碼等左十分鐘職員先幫我找到架篤篤，這時肉隨針板上，篤篤開價$50000-KIP ($50-HKD) 我都無心機還價了…
十分鐘車程送到住宿既路口，著住條孖煙通一拐一拐咁行返住宿，當返到住宿，個個都上前慰問，婆婆仲好關心，替我帶上幸運手繩，並諗經保佑…
回到房間看看自己半邊身既包紥，覺得無斷骨，無傷及頭部毀容已是不幸中之大幸啦！唔通今早既布施帶來保佑？
半邊身損晒，最難莫過於沖涼洗頭，唔沖又成身污糟，最後都千辛萬苦沖完瞓覺…
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
