回憶之旅 -- 希臘(完)
![]()
呢一晚係加插有摩打聲中既房間渡過,尚算熟睡… 經過一晚既船程,係清晨既5點靠岸,今日係旅程既最後一日…
回到雅典,第一件事當然係去攞返第一日遺留係酒店既passport啦!!!
我地係船上既二等房~
天都未光,再從熟悉既道路,車程,回到Omonia; 穿過係國立博物館旁陰森既公園,返回第一日住既酒店,係reception攞返我地十分重要既passport! 真係如釋重負… 果種心情真係無人能夠明白…
由於出面天都未光,於是就索性係酒店大堂既梳化上休息一吓~
一瞓就係張咁舒適既梳化上瞓左個幾鐘,攞返passport離開酒店,真係一天都光晒! 一天都光晒係除左失而復得既passport外,室外既天色真係光晒呀!!!
係Omonia睇唔到有任何High左野既人,只見路人前往巴士站上班,一切都正常! 與我第一日係Omonia睇到既罪惡之城,簡直兩個世界呀!!!
由於下晝3點幾Boarding離開希臘,所以係雅典既最後一日仲有半日玩~ 我地係Omonia既一間餐廳食早餐,試左書中介紹,希臘獨有既濃烈咖啡,杯凍啡真係好鬼濃呀!!!
第一站係去第一屆舉辦奧林匹克運動會既場地,“雅典競技場”,我地係Omonia廣場搭巴士前往。
係希臘搭巴士同好多歐洲地方都係一樣,係係附近既報紙檔買車票的! 對於我當時呢個初踏足歐洲既人黎講覺得好特別!
坐左無耐既車程,到達雅典競技場,但係就關晒大閘又做緊維修... 由於我當時是2003年,翌年便是輪到呢個奧運發源地,再次舉辦奧運,所以雅典市內好多古蹟都係維修當中。
其實入唔到去參觀都頗為失望… 雖然內裡只有幾面看台,無咩特別,但意義重大嘛...
(04雅典奧運就用雅典競技場作射箭比賽)
維修中既雅典競技場
由於時間尚早,於是我地就慢慢步行前往宙斯神殿,行到途中有D低B野發生; 就係有個女遊客向我地講: I call police
我係度唸唔通佢想報警! 於是佢亦再三咁向我講同樣既說話… 此時我終於明白喇!!!唔係I call police,而係差不多音既”Akropolis”… 即係衛城呀!!! 於是就指佢往山上方向行勒~
我地都到達衛城山下既宙斯神殿參觀,宙斯神殿亦都正進行維修,於是就係度稍作休息,拍照留念~
宙斯神殿係衛城既山下 ,遠方山上就係衛城勒!
最後既行程,就係再去衛地山下既買手信集中地,布拉卡區買手信勒!!! 希臘其他著名既特產有皮革,橄欖,同海綿等… 我就買個無頭雕塑品,橄欖油,同橄欖肥皂比自己!
布拉卡既商店 ,門口"黃禁禁"既係希臘特產之一"海綿"
我記得去完旅行,當我買左D橄欖做手信,返公司比D同事食,有個低死既同事拮左一粒橄欖入口,隨即吐返出黎仲飲水”朗口”Tim!!! 哈哈~ 佢咁誇張,都係同我向玩笑啫,我地都幾friend既~ 我都知橄欖唔係人人都鍾意食! 也包括我自己~
Shopping完後,就去返黎希臘食第一餐既餐廳食野,因為我隔離果個話好鍾意食其中既一道菜,係D芝士卷既物體,我都好鍾意食! 呢間餐廳係呢個行程既開始,亦係終結!
麥兜亦都陪我地食埋係希臘既最後一餐
就係呢度菜勒! 好味既"芝士卷" !!!
食完野後,我地就搭巴士前往雅典機場; 原來去到機場,我地所有既歐羅只用剩兩個幾咋!!! 只能夠買左個麵包食...
順帶一題當時係泰航唔知幾多周年紀念,去希臘既時候已經送出一張機票,依家返回曼谷,係航機上泰航仲一共送出十張既機票tim!!! 可憐而又無抽獎命既我當然又落空啦~
最後我地就係希臘,帶左好多好多美好既回憶返香港lu~
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
