回憶之旅 -- 馬爾代夫
係2002年既10月,終於去到我好想去既地方之一,馬爾代夫!
起得早前滿以為去得成,點知成唔到團既情況下去左澳洲...真係幾經波折呀~
呢次亦都係跟團,5日3夜! 去既係好多香港人去既 "桃源島"! 呢個團當然以情侶為主啦~
馬爾代夫既天氣真係陰晴不定呀! 當係陽光普照時,突然可以傾盆大雨架!!! 全個行程就有兩天落雨,真係大煞風景lu... 所以係晴天時就爭取時間影多D靚相勒~ 亦都因咁既關係,令我係今次旅行又學會一樣野... 就係去邊旅行都要帶外套勒!
我記得出發前唔想帶外套,因為赤道好熱ma! 就比同我一齊去既人堅持話要帶... 最後証明左佢係啱既~
係陰天及落雨時,件外套發揮作用啦! 所以我依家去親邊度旅行都總帶件外套架!
暴風雨前夕
全程住左一晚沙灘小屋及兩晚水中屋,係d咁靚既地方,住就緊係要揀最好啦~ 水中屋真係好正,一開門就可以落水~ 而且無論廁所或露台都有條樓梯落水架!
係馬爾代夫以水清沙幼見稱,D沙白色,又好似奶粉咁幼滑,海水就清澈見底,又多珊瑚魚,真係可以對住個海就一日啦~
其間撞到個團友竟然話唔識游水woo...佢話黎睇吓書渡吓假,轉頭就見到佢地漫步沙灘拾貝殼,真寫意浪漫~
水清沙幼 ,椰林樹影 ,坐落於印度洋既世外桃園!
係列島遊時,去到一個比當地人玩既島,見到當地人好簡陋咁,用一個膠水樽同d魚絲就當魚牌釣魚我緊係問佢借黎玩吓啦! 點之掉落海無耐就有魚上釣啦!!!(當時我仲未識釣魚架) 係釣到條淺藍色既珊瑚魚 ,比佢地釣到既還要大!!! 當D酒店職員係島上為我地準備食物時,見到D當地人將佢地釣返黎D魚燒到成舊炭咁,心唸食唔食得架???
之後借工具比我釣魚果個人,手上挪住條成舊炭咁,我釣返黎既魚遞比我食,揭開面頭燶晒既魚鱗,一食之下真係超好味呀!!! 魚既鮮味同汁保存得好好,一D都唔乾,而且仲感覺到清澈既海水味道tim~ 又學識一樣野啦~ 所以之後去埃及都用同一個手法去燒魚食架!
馬爾代夫真係好靚呀! 最遺憾係無"咩樽"潛水...因為呢個島無試潛活動,要有牌先可以潛,有點遺憾...
同當時仲未有數碼相機,唔係影到好多靚相咋! 真係好想再去多次...但到唔知要等到幾時lu...因為一個人去無意思ma... 亦都因為係咁,之後既旅行唔會好似之前咁求其,係會選擇去D最浪漫最靚既地方,促成之後既希臘浪漫之旅!
============================================
感謝 新銀仔 提供以上資料
新銀仔的網誌: http://travelsilver.blogspot.hk/
============================================
