我諗每個小朋友都有D習慣, 行為係媽媽睇唔過眼,
想幫小朋友戒o既
但壞習慣一旦養成真係好難戒除,
好似小齊細個時都有舖食奶咀癮
試左好幾個方法先戒到...
當中有一點我要補充, 其實後期(2歲左右)因為剪爛左奶咀,
小齊o係我屋企已經冇得食吱吱,
但原來佢o係婆婆屋企陽奉陰違,
有特別待遇, 耐唔耐可食返兩口...
咁我就覺得一定要佢自己從心唔想食吱吱先得
媽媽諗出o黎o既屎橋雖然有d 老點成份,
不過都係為左佢好, 我諗...小齊第時會明白o既...
o係佢仲沉醉o係食吱吱o既口感時,
我比佢睇呢張相 >>>>>>
(photo source 回魂夜劇照)
佢即刻好驚,
因為佢知呢個係周星馳,
我話"係呀, 冇辦法, 佢食得吱吱多, 變左哨牙"
果下我feel 到小齊真係驚 (無計, 貪靚~)
自此之後佢真係戒左吱吱, 見人地食佢仲會warn人地,
叫我比呢幅相人地睇 ~
除左吱吱, 返學前我想幫佢戒埋夜片,
但又係唔多成功,
我同佢講左夜晚急都可以叫醒媽媽同佢去, 但佢始終懶照痾落片
如是者媽媽又要出手,
我上網搵d 小朋友"尿布疹" 爛pat pat o既相比佢睇 (為免忍起不安我就唔貼圖喇),
(我今次唔算老點啩~)
我話d小朋友pat pat 比尿"醃"到出疹好慘,
佢見到就知道驚,
有時媽媽同佢講道理齋講真係冇乜用,
要比d 因果佢知道先入腦d,
結果當然係好快就戒埋夜片,
雖然之後試過兩次瀨尿, 不過果兩次媽媽都有責任, 算佢戒成功啦~
仲有一樣o野, 就係關於小齊平時食飯,
食得慢, 又食得少,
我當然唔想追住餵佢啦
於是又要諗辦法,
今次用o既方法係同佢講要睇中醫,
我話你可能係因為食太多零食生冷o野, 有疳積,
我睇左本書叫 "父母是孩子最好的醫生" (馬悅凌著)
裡面有講小朋友成日冇胃口食飯要點做,
就係要搵針拮四縫穴, 連拮八指, 擠出d黃水黑血小朋友就會開胃食飯!
小齊聽到之後面色一沉,
媽媽繪影繪聲即刻比埋本書佢睇 (o拿, 唔係我作咖)
嘩, 當晚即刻食晒成碗飯 (真係開埠以o黎冇幾多次)
之後仲好醒咁問我: "我而家唔駛拮啦?!"
我話係呀, 肯食飯即係冇問題唔駛睇中醫啦
暫時2個星期喇, 連婆婆都話佢食多左o野!
============================================
感謝 敗家媽媽 提供以上資料
敗家媽媽的網誌: http://buyjiamama.blogspot.hk/
============================================
齊 ~ 閱讀樂
