0

西安。大雁塔 與 小雁塔

平凡人 於 2014-09-27 21:30:00 發表  |  累積瀏覽 526

分類:長線旅遊 餐廳 特色景點 博物館 古蹟 ;地區:中國

  < 北京﹑西安﹑成都﹑雲南23天遊 >


第九天

經過兩日華山﹑兵馬俑行程後,西安最重要最期待既旅程已經完成lu,今日可以輕鬆一下,唔需要再趕住去玩,訓到夠再慢慢起身都未遲


早兩日實在太早起身啦,今日可以訓到十一點再慢慢爬起身,真係好幸福;自由行就係咁自由,鐘意幾時起身就幾時起身,有時候由朝玩到晚,有時候又成日唔出街,想點玩都得由自己話事;起身準備好就出發去火車站旁邊食早餐(應該唔係食早餐,食午餐先岩)


傳聞西安火車站係僅次於廣州站全中國排第二危險既火車站,睇落又唔見得特別危險?不過火車站廣場上好多人,感覺上非常品流複雜就真,所以此地都係不宜久留,每次去到火車站廣場都會盡快離開


今日午餐就係食我最鐘意既麥當勞!午市脆辣雞腿包餐只係賣15蚊咋,咁吸引當然唔可以放過啦


食飽就出發去睇大雁塔,不過就唔知搭咩車去,唯有嘗試下搵的士;不過西安出名難搵的士,好多的士都會揀地方去而拒載,但我地又好好彩搵左幾部的士後就成功上車;西安的士真係好平,就算搭好遠都係十零蚊,最衰就係太難上車...;話咁快就到左大雁塔廣場


大雁塔廣場入口(最吸引我既就係部警車,真係好cute)


就好似一部迷你Q版玩具車一樣,好得意丫


大雁塔廣場係一個大型噴泉,夜晚會有音樂噴泉表演,而且仲自稱係亞洲最大型噴泉表演,不過我就對音樂噴泉冇咩興趣所以唔等夜晚睇lu


西安氣溫大約係零下六至十度,泉水都結成冰


行近少少就可以見到大雁塔真身啦
大雁塔係一千三百幾年前既唐朝興建,目的係用來收藏唐三藏由天竺取返來既經書(西遊記XD),唐三藏更加做過大雁塔旁邊大慈恩寺主寺,呢道真係好有歷史價值


不過見到個塔後就冇特別興趣想參觀,所以就唔入去大雁塔同大慈恩寺啦


望到都覺得凍,所有水都凍到結冰,咁仲可唔可以噴泉架?






點解北京既水結左冰係透明色,但西安既水結左冰係雪白色既呢?


發現爬樹高手!咩安全措施都冇用就爬左上去!


好快就要同大雁塔講再見啦,下一個目的地就係大雁塔附近既陝西歷史博物館,行大約五分鐘就到;陝西係一個咁有歷史文化既地方,有好多歷史文物出土,所以陝西歷史博物館就收藏左好多珍貴文物,呢道都算係一個去到西安必遊地方之一


行到歷史博物館門口,O..大獲啦!去到先記得博物館星期一係唔開門!今次真係喊都冇用,竟然冇留意到呢件咁重要既事!唉...冇得入去都冇辦法啦,唉......


博物館冇得去就去小雁塔睇下...望下巴士站,睇來睇去都好似冇車岩路,咁就行路去啦,幾公里路預計個零鐘行到;行行下見到海港城同旺角,無聊之下入去行行


旺角又真係幾似旺角中心,一樣係賣衫褲鞋襪,行左一個圈就走lu


西安都見到現代教育bor,比香港現代教育更多野學,睇到又係紅白色設計好明顯係山寨香港呢間?


西安係一個大城市,街道上車來車往,又有好多高樓大廈,同以前長安城差得遠;西安城牆入面係唔會有呢啲高樓大廈,只有城牆之外先會出現




遇見陝西省美術博物館,但我對美術興趣不大,唔去參觀lu


美術博物館旁邊就係陝西省圖書館,我對圖書館興趣大啲,睇下可唔可以入到去先;由外面睇圖書館都幾靚丫,睇落好有特色


入圖書館最麻煩就係唔可以帶背囊入內,要先將背囊寄存係locker,可能怕有人會將書放入背囊偷走?圖書館有大量locker可以免費使用,locker由電腦控制都算安全,不過都係怕危險,放低個背囊後都靜雞雞拎左部相機入去,貴重物品都係跟身最安全


圖書館除左有圖書外,亦都有好多位置比人自修


出左圖書館繼續行,終於行到西安博物院;西安博物院係免費參觀,只要出示證件就可以換拎門票入去,不過我都冇入去博物院裡面既展館參觀,我來呢道既目的只係睇小雁塔咋


小雁塔係西安博物院範圍之內,一入到來就可以見到個塔


博物院入面環境都唔錯架






幾隻鴨仔竟然唔怕凍,係道玩冰






就到小雁塔啦


小雁塔同大雁塔一樣係唐朝時興建,因為高度唔及大雁塔所以就被稱呼為小雁塔;雖然係叫小雁塔,但高度都唔矮,有43.395米高


小雁塔個頂見到好似凹左入去?其實係因為明朝嘉靖時期西安發生大地震,原本十五層高既小雁塔有兩層倒塌就變成而家見到既十三層








好快就行完小雁塔;小雁塔距離城牆唔遠,先向城牆方向行


行多半個鐘,前面就見到西安古城牆;而家見到既西安城牆係明朝時期興建,係中國現存最完整﹑規模最大既古城牆,但同當年唐朝長安城城牆比差得遠啦,只係長安城七分之一


有城牆當然就有護城河啦


由南面城門(永寧門)入城




今日行左好遠路,想搵個舒服少少既地方坐企休息一下,咁岩見到有間subway就入左去;成世人第一次加唯一一次食subway竟然係西安,不過subway野食真係好貴,買呢兩個包就五十蚊,食完心都痛...雖然係貴但又有人食,有個小朋友拖住個婆婆入來,面不改容之下就買左個包,我真係唔捨得食......


繼續出發,城牆旁邊係書院門仿古文化街;書院門裡面有「關中書院」,明﹑清時代陝西最高學府,亦都係中國四大著名書院之一,不過好似唔對外開放所以冇得參觀


書院街賣好多書法用品,唔太岩我行,算係到此一遊


呢個時候本來想上城牆踩單車,但朋友有少少唔舒服想先返hostel,咁一於返去啦;不過係西安真係好難搵到部冇載客既的士,見到有車都唔夠人掙,又唔想坐琴晚個啲呃人三輛車,所以就只有一個辦法,行返去!今日都唔知行左幾多公里路


路過有六百多年歷史既鐘樓;鐘樓係西安其中一個最重要既地標,更加係中國古代遺留低咁多個鐘樓之中最大﹑保存最完整既一座


太古廣場?


好似好多旅行團都會係呢道睇劇?


大約半個鐘路程就返到hostel啦,西安三晚就係住係呢間七賢國際青年旅舍


返到hostel冇野做就四圍影下相;hostel係由古建築改建而成,入到來就好似去左古代大宅院一樣,仲以為自己去左古代,完全脫離現代社會...哈哈^^呢個咁特別既環境係其中一個我選擇住係呢道既原因


天氣咁凍,應該冇人願意出來坐啦?






呢個就係洗手間,係唔係唔似呢?呢道既廁所﹑沖涼房係外面,如果要去既話就要穿過戶外凍冰冰既地方,所以去沖涼係一個大挑戰,就咁著住短衫短褲行來行去,如果話唔凍就係呃人啦!


收埋好多兵馬俑公仔


而房間就係最外面兩排建築,每道房門都有厚毛氈蓋住保暖




呢間就係住左三晚既房間


住係六人房,房間乾淨床舖舒服我已經好開心啦




咁早返到來冇野好做,好彩有張桌球枱消磨時間




晚餐都懶出去食lu,留返係hostel餐廳慢慢食


味道唔錯架,但就比起出去食貴少少,不過呢道咁靚咁舒服冇所謂啦






餐廳呢道氣氛好舒服,想坐幾耐都得;坐坐下突然有人行過來問我係唔係韓國人!點睇我都唔似韓國人啦?!!




係道上網上到好夜,眼訓就返房訓覺lu




係床上執行李既時候,突然發現唔見左銀包!即刻係床上四圍搵,又出去出面搵,但始終都係搵唔到...唉......返到房諗住繼續搵,呢個時候下格床朋友問我係唔係搵緊銀包,原來銀包唔知幾時飛左入床下底,又會咁神奇!好多謝呢位朋友幫我搵返呢個咁重要既銀包,今晚可以安心訓一個靚覺啦



第十天

今日天氣實在太好啦,好好陽光;終於到左離開西安既日子,下午就要坐火車出發去成都,不過朋友今日依然有少少唔舒服,所以上午都係決定留係hostel休息一下,唔再出去玩啦;其實而家只係去到第十日咋,仲有超過一半旅程未完成,所以身體健康最重要;我都打左電話去保險公司問問去邊道可以睇醫生,但朋友信唔過西安既醫院所以唔敢睇醫生,好彩最終都冇大礙


Hostel本身都可以算係一個古蹟景點;hostel以前係八路軍辦事處,其中一部份變成今日既hostel,而另一部份就係展覽館,不過另一部份冇去唔知係點既呢


餐廳對出佈置都好靚架






室內地方可以咁暖,就係靠呢啲煤爐;煤爐除左可以當暖爐用之外,仲可以煲水,一舉兩得




貓仔再見啦


係hostel留到大約一點半,就要出發去火車站繼續下一個旅程,西安再見








短短幾日西安旅程好快就結束lu,今次可以去到兵馬俑﹑華山,又見到雪,我已經好滿足啦^^細個時覺得兵馬俑好神秘,估唔到大個後有機會見到真真正正既兵馬俑,兵馬俑現場個種宏偉﹑霸氣唔係幾張相片可以表達,一定要親身感受一下先可以感受到箇中奧妙;華山亦都一樣,相片中未必可以見到華山種種險要之處,唯有親眼望望先會知道咩叫望而生畏;今之西安之旅真係冇去錯,Yeah!!!



鐘意SeeWide的分享,給我們一個Like吧!
  • 攻略日期:N/A
    攻略地點:中國
  • 攻略時間:1日以上
    是次消費:N/A
0人比"掂"
  • EEChan 於2014-09-27 22:37:44 留言
    呢間青年旅舍,看來不錯
  • 舉報 回覆
  • No.1
  • 平凡人 於2014-10-07 00:02:46 留言
    原文由 EEChan 於 2014-09-27 22:37:44 發表
    呢間青年旅舍,看來不錯
    呢間好有特色,唔錯
  • 舉報 回覆
  • No.3
  • 平凡人 於2014-10-07 00:04:14 留言
    原文由 炯仔的天空 於 2014-09-28 12:13:06 發表
    唔錯
    多謝
  • 舉報 回覆
  • No.4
  • 1874飛飛 於2014-10-08 10:51:10 留言
    間旅館幾靚呀, 旅遊唔舒服係幾煩既事, 唯有小心飲食, 不過有時水土不服都無法, 好在自己去可以調較行程。國內逢親要放下身上財物的地方都好唔安心, 如超市, 有時寧願唔入
  • 舉報 回覆
  • No.5
  • 平凡人 於2014-10-08 12:18:00 留言
    而家食野比以前小心左好多啦,以前咩都食左先算,而家有時都唔係太敢食野早十年入親超市都要放低個袋...不過好彩近年好似已經冇再試過要放低身上財物啦
  • 舉報 回覆
  • No.6
  • 1874飛飛 於2014-10-10 07:33:35 留言
    引用自 '平凡人' 的相片:

    回覆:又真係似玩具
  • 舉報 回覆
  • No.7
  • 平凡人 於2014-10-11 02:03:15 留言
    原文由 1874飛飛 於 2014-10-10 07:33:35 發表
    引用自 '平凡人' 的相片:

    回覆:又真係似玩具
    好可愛
  • 舉報 回覆
  • No.8

最多能輸入300字

累積瀏覽 112333

全部攻略 126

全部回應 1394