探險家攻略 > 城中探秘 / 美食之旅 / 旅遊 > 特色景點 / 餐廳 / 長線旅遊 > 成都。大熊貓繁育研究基地﹑錦里

成都。大熊貓繁育研究基地﹑錦里

由平凡人於 2014-09-28 02:20:00 發表 | 累積瀏覽 603

分類：長線旅遊餐廳特色景點；地區：中國

< 北京﹑西安﹑成都﹑雲南23天遊 >

第十天(續)

下午要由西安坐火車去成都啦！本來都冇諗過要去成都，但諗諗下由西安去雲南好似有少少麻煩，所以就決定加入成都作為中轉站，而且成都又未去過可以順便係成都玩下呢，所以就因為咁去左成都啦！

入火車站之前先係KFC買左一大桶雞上車慢慢食，平時香港KFC職員做野都出名慢，西安KFC就更慢，買一買就成半個鐘！又要衝去火車站趕火車！火車站咁多人想快都冇得快......

去到候車室大家已經上緊車啦！難得今次係買軟臥票，本來可以去專用侯車室等車，又可以優先上車，而家邊道都唔洗去啦直接入閘上車就可以



坐到去總站落車，唔怕坐過龍

搵返自己個車箱先

搵到自己個車箱就即刻放低背囊休息下，雖然話個背囊咩得舒服，不過一放低就成個人輕鬆晒

軟臥一間房有四張床，比起硬臥呢道張床又闊又高又大，就算上臥坐起身都唔會撞頭，當然價錢會貴少少；一般一列火車只有一個軟臥車箱，想買就要快手啦



火車準備開了，西安再見啦


一路食住KFC一路欣賞沿途風景


西安附近好多地方都係平原



亦都有山，仲發現好多窯洞；原本以為窯洞係陝西北部同山西黃土高原先有，原來西安南面都有



火車一直向南行，向南面成都進發

山區有積雪
四川係一個盤地，四面都被高山包圍，由陸路進入成都就要先爬過一座座高山，所以無論由邊坐火車去成都車程都係比較耐，因為火車要爬山好辛苦架

去到山中間一啲不知名既地方；當時冇得用google map，所以唔會知道火車去到邊，就算見到地方名都唔識呢個地方，我地識既野實在太渺少啦

夜晚關門訓覺，好安全；同係軟臥車箱，旁邊住左好多軍人，而且膊頭上有好多粒星星，應該係軍官，所以呢班車一定好安全

第十一天

晚上好好訓，一覺訓到天光；火車已經去到四川境內，我都係時候刷牙洗面，迎接成都到來；我對成都都有少少期待，四川最出名除左熊貓，仲有就係麻辣美食，雖然唔係太食得辣不過點都要試一下，等緊挑戰麻婆豆腐！仲有另一樣期待既就係四川美女啦^^好多人都話四川多美女，唔知係唔係真既呢？

終於到達成都落車啦

出到火車站大約九點十分，先去hostel放低行李，然後就可以玩足一日；我除左鐘意坐火車既感覺，另外最鐘意就係火車既行車時間，好多時火車都係夕發朝至，一覺醒來已經去到一個新既地方，唔需要再浪費時間係交通之上；不過最重要既係要適應火車上訓覺，如果火車上訓唔著第二日將會好辛苦



火車站對出就係地鐵站，可以坐地鐵去hostel放低行李再出去玩；當時成都地鐵只係用左唔夠四個月，所有設施都好新



好多人丫

三個站就落車，一出地鐵站就係hostel，好快到；放好行李後就食四川第一餐啦，係hostel對面簡簡單單食個四川特產鍾水餃，辣辣地好好食

食飽後就迫巴士去第一個地方玩，大約二十分鐘就去到武侯祠


叫得武侯祠當然係記念諸葛亮，不過見到入場費要六十蚊...即時唔想入去...咁細個地方都收六十蚊真係好過去搶

唔入去武侯祠就去旁邊既錦里睇睇


就快到新年啦！因為當時準備迎接兔年，錦里好多地方都掛滿兔仔裝飾，又幾有新年氣氛



上面有個戲台，不過就遇唔岩時間所以冇野睇



錦里入面有一條食街，好多四川小食可以品嚐，不過我想搵個舒服啲既地方食午餐，所以就冇係呢道食野lu

見到一間外面古色古香既餐廳，入到去原來係快餐店！見啲位置又坐得幾舒服，所以就決定係呢道開餐啦

呢間就係德克士！第一次見呢間快餐店，原來佢係中國第三大西式快餐店，排係麥當勞﹑肯德基之後，不過呢間有少少特別，係有飯食架！而且係可以飯配薯條，岩晒我；之後仲會係好多地方見到德克士出現



飯後係錦里四圍閒逛一下，小橋流水，環境清清靜靜又幾舒服

由呢道望出去，又有少少江南水鄉感覺


由呢道睇，又有少少麗江古城感覺


係道慢慢散散步又真係幾悠閒，似乎感染到成都人悠閒輕鬆既生活，做咩都得別慢﹑特別輕鬆



賣女孩的小火柴


又見到呢款糖，真係整得好靚架！之前曾經係南京食過

行完錦里就去成都最想去既大熊貓繁育研究基地
因為坐巴士去比較麻煩，所以就懶慢慢搵車，係錦里門口直接坐的士去；講起搭的士就嬲，啲司機最鐘意係見你係遊客就兜你路，熊貓基地明明就係成都北面，但部的士就先向南行，再向東行又向西行，心諗佢兜路都唔洗兜得咁明顯掛？當人傻既咩？不過就算我知道又可以點？係人地地方人生路不熟，唔通跳車走人定死都唔比錢咩...最後咪又係乖乖送錢比人洗......

認住你個XX！

終於去到熊貓基地啦


由入口去到睇熊貓既地方有少少距離，懶行既話可以坐車仔上去，十蚊來回；我見晏晏地，又唔知要行幾遠所以就坐車仔啦，不過路程其實真係好近，如果行快少少十分鐘都可以行到，所以唔坐車都冇問題，就算係買左來回票我都費事坐車返去門口啦，自己行仲開心



好快就到左熊貓住既地方

見到啦

有隻大熊貓係道開餐

呢隻又係開緊餐

呢隻都係係道開餐（佢呢個位好似好舒服咁bor）

發現有隻爬左上樹訓教

咁呢隻肥肥白白既熊貓又係道做咩呢？

訓緊？

呢隻又係道食野；所以個個都話熊貓唔係食就係訓，真係好難見到佢地做其他野


終於發現到隻比較活潑既熊貓BB

細細隻爬來爬去好可愛丫



成隻趴地熊咁，超得意


睇左咁多熊貓，沿竹林行去第道再睇，呢道啲熊貓多到睇唔晒

行行下去到下個地方，原來係小熊貓；小熊貓比較少見，佢就係Firefox啦（而家我就係用緊Firefox上網，哈哈^^）；小熊貓睇落去好似狸貓，不過同狸貓完全唔同，小熊貓得意好多



啲孔雀竟然可以跳到咁高


繼續四圍行，沿路環境都幾靚



行到去一個劇場有影片睇，介紹熊貓既生活同所有關於熊貓既野，有時間睇睇都唔錯，可以學到野

呢棵野個名咁奇怪既？

行行下去左個室內地方，原來係熊貓BB屋企！超可愛！

一窩熊貓BB係道郁下郁下，好好好好好可愛丫！

有一隻好似想爬落地bor？

真係爬左落地，不過比樓梯卡住，哈哈^^上面又有隻好似想落去

熊貓BB：「好辛苦丫！終於申到隻腳上去啦！」

過完樓梯一關，仲要過多一關，穿過鐵欄！咁大隻點穿得過丫！

就得啦就得啦，穿左一半過去啦！

Yeah！成功過關有野食！其他熊貓有得睇冇得食

睇完熊貓BB，出到來就繼續睇啲唔係食就係訓既大熊貓


訓到成個波咁



熊貓出世既地方？

唔知熊貓糞便係咩樣既呢？

竹林種滿熊貓食既竹，咁多竹唔怕餓親佢地啦


咁多熊貓真係會睇到悶，所以都係時候走人啦；熊貓基地入面除左熊貓仲有其他動物

天鵝湖又真係有天鵝



有間大熊貓博物館，不過就冇入去睇，直接走人lu

熊貓基地就係咁睇完啦；不過講真除左熊貓BB吸引少少之外，其他隻隻熊貓都差唔多，睇都睇到悶...所以睇熊貓真係要適可而止，唔可以睇咁多架，哈哈^^由熊貓基地門口上巴士離開，巴士細細部，而且又有人拎住袋雞上車，好有農村感覺

去到昭覺寺巴士總站轉車返成都市區（而家轉車係去動物園唔係昭覺寺啦！）

係總站揀個靚位，慢慢坐返去市中心

去到近春熙路既地方落車，周圍都人山人海；市區雖然多人，但感覺上成都人比起好多地方都文明，路人唔會亂過馬路，又守秩序，路面上又唔多見有垃圾，好乾淨，睇落成都環境唔錯

成都都有青年空間？唔知係唔係同香港既青年空間一樣呢？

就快天黑啦

去到春熙路lu；不過呢啲步行街都唔岩我行，我又唔買野去呢道真係冇咩用，只係見個個都去我又去埋一份，順便睇下有冇適合晚餐既地方（傳說春熙路多美女出沒）

去到其中一個商場，隨意入左一間食辣既鋪頭開餐，個名好正叫「辣妹子」；來到成都當然要試試成都最出名既竦野啦，所有就叫左一碗麻辣米線，辣度算可以接受；見食得太多快餐太耐冇食過菜，所以都叫多個菜加餸，仲以為四川連菜都係辣，好彩呢個係正常唔辣既

食完就行返去hostel lu；睇地圖好近，但行返去都ok遠，要行大約三十分鐘，食飽散下步都唔錯，不過下次有機會都係搭巴士好啲

返到hostel都夜啦，坐係大廳上上網，冇幾訓就返房訓覺lu；成都呢個地方好舒服，環境靚生活又悠閒，就算係冬天都唔似之前北京西安咁凍，選擇去成都果然係冇錯