小溫太の廿六慶牛一 ● 收神秘禮物 + 愉景灣酒店遊
26 August,2014
多謝 !! 多謝大家既祝福喔~~ 小溫太非常多謝大家既祝福~ 真係好開心呀~ 雖然岩岩好事隔一個月, 我呢加有時間就寫下卜啦 ! 不經不覺廿六喇喂~~ 點都有D心郁郁都做阿媽, 耐何我肚皮唔多爭氣啦~ 哈哈哈 ! 心理壓力太大, 所以今年清一色願望就係祝我快D俾老公搞大~ 哈哈哈
哈 ! 當然仲有就係繼續開開心心, 身邊既家人朋友大家都要身體健康平安 !
好 ! 講返我生日前一晚姐係25號晚就同班金花姐妹食飯, 好早就返到屋企喇~ 就打算沖個涼, FU下MASK啦~~ 正當我吹緊頭, FU緊MASK, 岩岩搭正十二點, 我老友Suki就打俾我祝我生日快樂, 真係準時到呢~~ 哈哈 ! 咁當然FU住MASK都要嗲幾句, 突然Billy開房門, 送左部相機俾我, 嘩 ! 我都黎唔切反應呀 ~ 勁開心~ 我恨左好耐架喇~~~ 係最新出又方便輕巧又有自拍功能既SONY RX100M3相機, 開心到要同老友講BYEBYE~ 哈哈哈~~點解咁開心, 真係一出左無耐我就有留意到部機, 同BILLY講佢就叫我唔好買呀, 屋企咁多相機, 大大細細都有齊, 太多喇~ 唔準買~ 當然我個心就睇準機會就去買架喇~ 哈哈哈 ! 原來口不對心, 不過真係好開心呀 ! 加下成日都拎相機出機, 我部電話立即廢左影相功能~HAHA~ 現實~~ 不過都要多謝老公, 估唔到你咁細心~
第二就係生日前幾日, 老公就問定我正日同27號有無約人, 我話正日梗係留俾你啦 , 唔係你估自己地位咁低呀嘛~~ 哈哈 我問仲咩咁問, 原來佢訂左愉景灣酒店房一晚, 真係堅開心, 因為我之前講過好想去住一晚, 原來佢有記係心(感動)
出發前我去左上環等佢放工, 岩岩好食埋Lunch再去坐船, Lunch就去左蓮香樓飲茶, 又係想試好耐架喇~ 今個生日好滿足呀~ 真係樣樣都心想事成, 我記得王生講過, 只要開心面對, 樣樣事都得心應手~ 我相信是真的 : )
蓮香樓
感覺回到舊時代
我未去過咁舊式既茶樓, 我既年代已經係酒樓黎架喇~ 人越大越想舊事~
熟手老伯伯沖茶
老公幾經辛苦先搶到點心返黎, 佢話真係用搶先能夠形容~ 哈哈哈~ 不過點心好好味, 糯米雞同叉燒包好好味呀 ! 真材實料~
點心姐姐好難得先行到黎, 一出就俾人圍實~ 以前應該都係咁~ 好懷舊~
影張相先~ 自拍無難度~
食飽飽係中環行去碼頭坐船過愉景灣, 大約三十分鍾左右就到 , 一出碼頭靠左邊就係巴士站, 有免費接駁巴士, 不過我地遇唔到, 就問人坐咩巴士到酒店~ 都有成7-8個站~
沿途架巴士坐滿人, 不過好似身在外國咁, 天色又好, 環境清優~ 真係好住~ 終於黎到酒店喇~ 今次我地入住Auberge Dbay Hotel, 原來都幾多人黎住返晚, 都幾好架, 近近地當渡假~ CHECK IN登記ID時, 發現我今日生日, 免費幫我upgrade左間海景套房, 好驚喜呀 ! 好開心~ 多謝
酒店房間以藍湖水綠色主調, 感覺好似好海洋~ 感覺環境好舒服~
好喜歡浴色既color~ 好似俾海洋包圍住咁~
最邊邊係沖涼位置, 之前係可以有浸浴功能, 因設計問題永久停用~ 好可惜~ 沖涼記得拉浴簾, 我地用之前當然check過啦~ 其實咁大既落地玻璃係無意思既, 因為下面係泳池一定望到你, 唔好諗住望海沖涼咁爽皮呀~ 我地係旁邊露台望到入浴室的~哈哈~
不過如果真係望住呢度既景~ 真係好舒服~ 可以好放鬆~
酒店送上既小心意, 不過晚上太飽無去享用~
露台望出去既景觀~ 好舒服呀~ 真係好舒服~ 之後去左遊水~ 太開心~
大約六點幾我地就出發返碼頭個邊搵食喇~
我地今晚食西班牙菜~
飲杯~ 多謝我自己又大一歲~ 祝大家都開心幸福~
welcome bread~ 好香的包~
等食中~
食物都好細份, 不過就好好味~最愛蘑菇意粉~ 好濃好香~
主菜西班牙烤乳豬, 好好食~ 真係超脆~ 可惜等太耐, 由唔飽走去叫沙律食飽左, 乳豬先到, 不過都食左件, 好好味~ 食完幸福感倍升~
飲杯, 跟我慶祝吧~
多謝老公~ ♥
Solera Spanish Cuisine Concepts
地址: 愉景灣D’Deck 1 樓101號舖
食飽真係要行下散下步先得~ 其實日頭呢度影相應該幾靚, 不過無時間~ 聽日一早就出返去~ 就行下經過見到小教堂, 我見入面好靚~ 好似關島咁行禮~ 好浪漫~
十一點酒店送上蛋糕~ 當然係老公買架啦~ 其實我都知~哈哈~
好想試既其中一間蛋糕店 Ms B's Cakery 個盒好靚~有好色彩鮮艷既蝴蝶圖案
"OMG" >>蛋糕名黎架~ 哈哈~ MY 26th Birthday~ 多謝 ♥
♥ 好開心~
多謝老公~ 多謝你無時無刻都咁錫我, 時常為我著想, 俾我做我想做既事, 凡事都支持我, 我真係好幸福~ 我知道的, 多謝你帶俾我咁多開心歡樂~ 我一定會令你成為最幸福的老公~ love u~
我既願望~ 一定要實現喔~
● 26 ●
START NOW
好彩買左細蛋糕~ 都好飽~ 食唔哂~ MS B's 既蛋糕, 我只會說一切都很精美, 蛋糕連視覺都覺得精美, 味道也不錯, 整件蛋糕我會俾80分, 因我唔鍾意食中間白色的部份, 感覺乾乾粉粉的, 但又唔知係咩 , 只要在飽的時候吃什麼都是普普通通~
我的廿六歲開始, 只想每天開心快樂, 雖然八月廿六很快樂, 但九月廿六很傷心, 哭到自己都麻木, 內心現已平靜. 只要一想起, 一看天就回想那親切的笑容, 人生在出生時眾人皆喜樂, 離開時眾人為你而哭, 也是感欣的。傷心後也要起來, 做回那每天笑看人生的我~ : )
感謝 仙蒂小溫太 提供以上資料
個人日誌: http://cindylittlemrswan.blogspot.hk/
Ms B's Cakery
旮旯 The Glock
旮旯 The Glock
T.O.P.商場地庫
La Famille (海港城海洋中心店)
滔滔甜品(井財街)
JUICY Fresh Juice Bar
Tokyo Milk Cheese Factory (銅鑼灣店)