探險家攻略 > 休閒玩樂 / 城中探秘 / 旅遊 > 其他 / 特色景點 / 古蹟 / 公園 / 長線旅遊 > 成都。寬窄巷子﹑人民公園

成都。寬窄巷子﹑人民公園

由平凡人於 2014-10-07 00:40:00 發表 | 累積瀏覽 594

分類：其他長線旅遊特色景點古蹟公園；地區：中國

< 北京﹑西安﹑成都﹑雲南23天遊 >

第十二天

又一天新開始^^今日原定計劃會去樂山大佛，之後再到峨嵋山，第二日就可以上峨嵋金頂睇日出；不過可能覺得成都太舒服，唔想四圍走來走去所以就放棄左樂山峨嵋呢個決定，寧願係成都懶一下；早上出門先到對面「鍾水餃」食早餐，清清地食一碗清湯米線，早餐都係食清啖啲比較好

但亦都忍唔住叫左碗四川特產紅油抄手，睇個樣都感覺到辣，食落又幾好食


食完就慢慢坐巴士去新南門車站買明天去峨嵋山既車票，因為明天想坐第一班車所以買定比較好；其實要一日來回峨嵋山係極困難，峨嵋山真係最少要玩兩日先夠，唉...如果唔係咁懶今日就去左啦

買左車票就隨意四周圍走走，沿錦江向前行

行到去成都中心天府廣場

天府廣場站聲稱係全中國最大地鐵站，冇留意佢係唔係真係咁大


天府廣場其實都係一個普通廣場，唔覺得有咩特別；廣場就係市中心，附近有好多高樓大廈

穿過廣場就到人民公園


人民公園入面好熱鬧，好多人唱歌跳舞；好多地方公園都會有人聚集，但就未見過好似成都人民公園入面咁多人，睇來成都人都好鐘意呢種熱鬧生活



公園入面分開左好多個唔同劇團，有唱歌，有跳舞，有做表演，每個都有好多人圍觀；但我對唱歌跳舞冇興趣，而且好怕呢種嘈雜環境，好彩香港唔流行呢種文化；不過住係旺角同屯門既朋友就慘啦，日日有人係樓下開大個喇叭製造嘈音真係人都顛



2004年人民公園興建左紀念碑，紀念四川保路運動



見到有人寫大字bor；好多地方都可以發現書法家，我自問就寫唔出咁靚既字啦

除左寫字，仲有好多老人家捉棋，感覺同天壇公園差唔多；突然發覺好多伯伯都鐘意戴呢種皮帽，再加多件皮褸，睇落去好型

光禿禿既係銀杏樹，秋天來到就可以見到一大片金黃色銀杏海；一年之後有幸可以再次去到成都欣賞呢片銀杏美景



繼續漫無目的係公園遊盪，發現一個遊樂場，不過睇落呢個遊樂場好似唔係太跟得上呢個時代，所有機動遊戲都停留係幾十年前風格，所以玩既人唔多，得踫踫車有人幫襯

上面部過山車真係請我都唔敢玩


我諗玩呢啲會安全啲？不過都係一樣請都唔玩


仲有大量遊戲可供選擇，但都係一樣人影都唔多個...講真而家應該冇人會喜歡玩呢類咁舊式既遊戲啦？而且成都人消費能力好似唔太低，去玩都去成都歡樂谷玩啦，呢道完全比唔上

恐怖版比卡超


出左公園繼續向前行；成都好多地方都起緊地鐵，下次再去成都交通應該會比而家方便

人民公園行冇幾遠就去到寬窄巷子


冬天來成都既遊人唔多，寬窄巷子就變成市中心一個寧靜﹑優閒既好地方；寬窄巷子同錦里有少少相似，大家都係城市入面一個古式古鄉，可以令人放鬆心情既好地方，唔同既係錦里比人一種古代感覺，而寬窄巷子就係好似民初既感覺



同錦里一樣，呢道都係有一間古代版Starbucks

仲有好多民初特色建築



成都其中一個傳統特色就係了耳仔，睇落佢地都好專業，又好似了得好舒服，不過我都係唔敢試，比人了耳仔始終感覺好奇怪

冬天好多樹都冇晒樹葉，係其他季節來到一定會靚好多



係闊窄巷子行一圈就走lu

離開闊窄巷子，向hostel方向前進

繼西安後又係成都發現海港城


行到半路見到有間KFC，忍唔住就走左入去開餐啦；呢道可以食到「川辣嫩牛五方」，可能係四川KFC獨有都唔定，未係其他地方見過；嫩牛五方其實係一大塊白色既皮（北京雞卷個塊）包住菜同牛肉，而叫得做川辣當然係特別辣，我未試過係KFC食到咁辣既野，不過食落又真係好好食，不過我諗四川人只係當呢種辣係小兒科咋；話時話點解KFC都有薯條食既？

食完野係附近行下超級市場，要補給最重要既糧水（尤其係水，超級市場平好多架），然後就返hostel lu；係hostel大廳坐低傾下計，仲可以同兩隻超可愛既貓仔玩；貓仔細細隻勁得意，邊會估到一年後會變左做肥貓架！

貓仔好鐘意追住條竹，仲好鐘意爬入櫃底個細窿（唔驚黑？），好好玩架


有時又會訓上你道，想點玩都得

又到夜晚，雖然食左KFC唔肚餓，但都要食晚餐既，求其係hostel食野唔出去lu；朋友叫左個炒飯

而我就叫左蕃茄蛋麵，終於可以食到中國名菜蕃茄蛋啦


來到四川就緊係要食正宗麻婆豆腐啦！
不過蕃茄蛋麵配麻婆豆腐好似有少少九唔搭八...可能係比遊客食既關係呢個麻婆豆腐已經冇想像中咁辣啦，始終太辣唔係個個可以接受

明天要早起身去峨嵋山，今晚應該要早啲訓；係同隻貓玩緊既時候有位hostel職員突然問我一唔一齊玩三國殺，有美女邀請就緊係唔訓都玩啦，哈哈^^就係咁就同一班職員一齊玩，快樂不知時日過一玩就玩到半夜，冇咩時間訓覺lu；事隔一年多，當我再次去到hostel既時候，呢班一齊玩三國殺既職員大多數都唔見晒lu，只有hostel經理仍然係hostel工作，無緣再重溫三國殺之夜......